Unicode
" အင်း"
တိချိုးဟယ်က ဟောပိုင်ကိုချီ၍ ဆိုဖာပေါ် ပွေ့တင်လိုက်သည်။ ထို့နောက် နားရွက်ဖျားလေးကို ပွတ်သပ်ပေးရင်း ဆက်ပြော၏။
" အဖိုးလဲ လုံခြုံရေးတွေရော သက်တော်စောင့်တွေပါ အများကြီးလိုအပ်တယ်.. တိဘီရန် ဘယ်လောက်ထိ လုပ်ထားမလဲ ဘယ်သူမှ မသိနိုင်ဘူး.. အချိန်ရတုန်း ယုံကြည်ရတဲ့သူတွေကိုပဲ ငှားမှဖြစ်မယ်"
ဟောပိုင်က တိချိုးဟယ်ကို ဖုန်းထုတ်ပေးလိုက်သည်။
" ရှင်းရှောင်ဖုန်းကို လုပ်ခိုင်းလိုက်လေ.. သူ့ကို ဒါတွေလုပ်ခိုင်းဖို့ လစာအများကြီးပေးထားတာ မဟုတ်ဘူးလား"
တိချိုးဟယ်က အဓိပ္ပါယ်ပါပါ တစ်ချက်ပြုံးလိုက်၏။
" မင်း ဒီရှင်းရှောင်ဖုန်းကို တော်တော်ယုံနေတယ်လို့ မထင်ဘူးလား"
ဟောပိုင်က တိချိုးဟယ်ကို မျက်စောင်းတစ်ချက်ထိုးလိုက်၏။
" တိချိုးဟယ် ခင်ဗျား ဒီနှစ် နှစ်ဆယ့်သုံးရှိပြီနော် တရုတ်ပြက္ခဒိန်နဲ့ဆို နှစ်ဆယ့်လေးထဲမှာ မဟုတ်ဘူးလား"
တိချိုးဟယ်က မျက်မှောင်ကြုံ့သည်။
"ကိုယ်က မင်းအတွက် အသက်အရမ်းကြီးနေလို့လား"
" ခင်ဗျားအသက်နဲ့စာရင် အတွေ့အကြုံ နည်းလွန်းလို့"
အသက်သုံးဆယ်ရှိနေပြီဖြစ်သော ဟောပိုင်က စိတ်ထဲမှ သက်ပြင်းချသည်။ တိချိုးဟယ်အသက်အရွယ်တွင် သူ ထိီပေါက်သည့်အတွက် ပျော်ပျော်ကြီး လျှောက်သွားနေပြီဖြစ်၏။ အခု တိချိုးဟယ်ကို ကြည့်ပါဦး...
တိချိုးဟယ်က ဟောပိုင် သူ့ကို ရန်စနေသည်ထင်ကာ ပြန်ပြောဖို့ စဥ်းစားပြီးမှ သူ သတိရသွားသည်။ ဒီအိမ်က ဟောပိုင်ဝယ်ထားတာပဲ.. အခု သူ ဝတ်ထားသည့်အင်္ကျီတွေကလဲ ဟောပိုင်ဝယ်ပေးထားတာ .. ဆိုတော့ ဒီ sugar hubby လေး ဟောပိုင်ကို သူ ဘယ်လိုလုပ် နိုင်အောင် ပြန်ပြောလို့ရမှာလဲ...
" ညနေစာအတွက် ဝက်ချိုချဥ်ကြော်လေး ချက်ပေးမယ်နော်... အရင်တစ်ခါကလို အရမ်းမချိုအောင် ဂရုစိုက်လိုက်မယ် "
လက်စားချေဖို့အစီအစဥ်ပျောက်ဆုံး၍ ခွေးပေါက်လေးအပေါ် ကောင်းပေးရန်သာ ဆုံးဖြတ်လိုက်သည်။
အိမ်ထောင်ဦးစီးဖြစ်နေသည်ဟု သူ့ကိုယ်သူ ခံစားလိုက်ရသည့် ဟောပိုင်မှာ ခေါင်းညိတ်၍ ပြုံးဖြီးဖြီးကြီး လုပ်နေ၏။
