ထိုနှစ်များမှာ မြတ်နိုးဖွေရှာ

Part 51

ယွီရှီ တွေးလိုက်သည်။ ကြည့်စမ်း၊ ဒီလူကတော့ ငါ့အတွက် စိတ်ပူနေပြန်ပြီ။

ဤသူသည် မည်ကဲ့သို့များ တာဝန်ယူစိတ် ပြင်းထန်လျက် အထီးကျန်သော လူတစ်ယောက် ဖြစ်လာရသနည်း။

ကျုံးဝမ်၏ ခန့်မှန်းချက်တို့ မှန်ခဲ့လေသည်။ အရာအားလုံးတွင် အပေးအယူရှိသည်။ ယွီရှီ ကျုံးဝမ်ကို ခေါင်းမာစွာ ကာကွယ်ချင်သည်ဆိုမှတော့ ချုံအန်းမင်းကြီးအား စိတ်ရင်းစေတနာတချို့ ပြသရပေမည်။

မနက်လွှတ်တော်အပြီးတွင် ယွီရှီသည် ချုံအန်းမင်းကြီးနှင့် ညှိနှိုင်းရန် ကျန်ရစ်ခဲ့သည်။

ယနေ့ကိစ္စများနှင့်ပတ်သတ်၍ ပြဿနာများဖန်တီးရန် တစ်ယောက်ယောက်က ရွှမ်ချုံကို အသုံးပြုလိုက်သည်မှာ ထင်ရှားသည်။ ချုံအန်းမင်းကြီး အမုန်းဆုံးအရာမှာ တော်ဝင်မင်းသားများအား အခြားသူများက ခြယ်လှယ်ခြင်းဖြစ်သည်။ ဤအကြောင်းကြောင့် ကျုံးဝမ်အား ကူညီရန် ယွီရှီက ခေါင်းမာမာနှင့် တောင်းဆိုလာသည့်အခါ ချုံအန်းမင်းကြီးက အလျှော့ပေးလိုက်ခြင်းဖြစ်သည်။ သူ ယွီရှီကို အလိုလိုက်ခြင်း တစ်ခုတည်းကြောင့်သာမဟုတ်၊ ပြဿနာဖန်တီးနေသည့် လူကို သေချာသိနိုင်ရန် ဤနောက်ကျိနေသည့် နက်ရှိုင်းလှသော ရေကန်ကို ရှင်းလင်းချင်ခြင်းကြောင့်သာဖြစ်သည်။

သို့သော် ချန်အန်းမင်းသားအား ရာထူးချနိုင်သည့် အခွင့်အရေးကို ဆုံးရှုံးလိုက်ရကတည်းက ချုံအန်းမင်းကြီးအနေနှင့် အလျော်အစားတော့ ပြန်တောင်းမှာ အသေအချာပင်။

ဥပမာအားဖြင့် ယွီရှီ နေ့စဉ် မနက်လွှတ်တော်တက်ရန်။

ထို့အပြင် သူ၏တာဝန်ဝတ္တရားတို့ကို လက်ထောက်အကြီးအကဲများနှင့် လွှဲမထားရန်။ သူပါဝင်သင့်သည့် အုပ်ချုပ်ရေးဆိုင်ရာ အမှုကိစ္စများတွင် ပါဝင်ရန်။

အခြားဥပမာတစ်ခုမှာ ဤအမှုကို ဖြေရှင်းပြီးလျှင် သူ့လုပ်ရပ်မှားတို့ကို ပြန်ဆင်ခြင်သည့်အနေဖြင့် နေအိမ်အကျယ်ချုပ် ငါးရက်နေရန်။ ထိုမှသာ တော်ဝင်အကဲဖြတ်တို့၏ ပါးစပ်များကို ပိတ်သွားစေမည်ဖြစ်သည်။