အခန်း ၇၁: နားကပ်
အမှန်စင်စစ် အိပ်မက်ဆိုးဟူသည် ကူးစက်ရောဂါတစ်ခုကဲ့သို့ပင် ပျံ့နှံ့တတ်၏။ တစ်နေ့ထက်တစ်နေ့ ပိုဆိုးလာခဲ့သည်။
ဤကျောင်းမှ ကျောင်းသားများသည် သည်အဖြစ်၏ ဂန္တဝင်သာဓကများဖြစ်သည်။
သူတို့အတန်းဖော်များမက်သော အိပ်မက်များကို မှီငြမ်းပြီး သူတို့ နောက်တစ်နေ့ညမက်သော အိပ်မက်များသည် ပိုလို့ပင် အမျိုးစုံလင်နေလိမ့်မည်။
သည်လိုနှင့် ရက်စက်ကြမ်းကြုတ်သော သံသရာတစ်ခုဖြစ်လာခဲ့သည်။
သိသာအထင်ရှားဆုံးအရာမှာ —— ယခင်က သူတို့၏အခန်းများ မပြိုပျက်သေးသည်ကပင် ကံကောင်းနေသေးသည်။ ယနေ့တော့ အဆောက်အအုံနှစ်ခုစလုံး ပြိုလဲကျသွား၏။
ယောက်ျားလေးနှင့်မိန်းကလေးဆောင်များသည် တစ်ခုနှင့်တစ်ခု လမ်းသေးလေးတစ်လမ်းသာခြား၍ မျက်နှာချင်းဆိုင် တည်ရှိကြ၏။ ယောက်ျားလေးများ မိန်းကလေးများ၏ လသာဆောင်ကို ကြည့်ရှုခြင်းကို ဟန့်တားရန် ဟိုဘက်အထပ်နှင့် သည်ဘက်အထပ်ကို ဖြောင့်တန်းမနေအောင် အနည်းငယ် တန်းလွှဲကာ ဆောက်ထားသည်။
ဘေးပတ်ဝန်းကျင်မှခြံစည်းရိုးများသည် မြားတစ်စင်းကဲ့သို့ ကောင်းကင်ထက်သို့ ချွန်တက်နေသည်ဖြစ်ရာ အဆော့သန်သော ကလေးများ ခိုးမဝင်အောင် ခြောက်လှန့်နေသည်။
ပုံမှန်အားဖြင့် သူတို့လုပ်နိုင်သောအရာမှ အတော်လေး အနည်းအကျဉ်းမျှသာရှိသော်လည်း ယခုမူ မိန်းကလေးဆောင်တစ်ခုလုံးသည် လဲကျလာကာ ယောက်ျားလေးဆောင်သို့ ဝင်တိုက်သွားလေသည်။
မိန်းကလေးများ အုပ်စုလိုက် ကောင်းကင်မှ ဆင်းသက်လာသည်ကို တွေ့လိုက်သောအခါ အော်ဟစ်နေသော ကောင်လေးများသည် ချက်ချင်းဆိုသလို ဟန်ကိုယ့်ဖို့ သိက္ခာထိန်းလိုက်ကြသည်။
ဆယ်ကျော်သက်ကလေးများသည် အလွန်ကာကွယ်လိုစိတ် ပြင်းထန်ကြသည်။ သူတို့က ချက်ချင်း အားပြန်မွေးကာ မိန်းကလေးများကို ဘေးကင်းရာသို့ ရွှေ့ပြောင်းပေးကြသည်။
သို့ရာတွင် မိနစ်အနည်းငယ်အတွင်း သူတို့ အထင်လွဲမှားနေတာဖြစ်နိုင်သည်ဟု သိသွားကြသည်။
YOU ARE READING
တစ်ကမ္ဘာလုံးဆိုင်ရာ စာမေးပွဲ (GUEE)_Unicode
ActionOfficial English Title (Global Examination) mostly known as Global University Entrance Examination_GUEE တစ်ကမ္ဘာလုံးဆိုင်ရာ စာမေးပွဲလို့ခေါ်တဲ့ system ထဲကို ရုတ်တရတ် ခေါ်သွင်းခြင်းခံလိုက်ရတဲ့ ယိုဟော့.. အဲဒီမှာ သူလိုပဲ ကံမကောင်းတဲ့ တခြားဖြေဆိုသူတွေန...