ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၂၅)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း (၃၄၃) : သေခြင်းတရားနတ်ဘုရား၏ ကံကြမ္မာ
လီကျွင်းက ကံကြမ္မာအရိပ်အား သူတို့၏ နောက်တာဝန်အကြောင်း ညွှန်ကြားပြီးသည့်နောက်တွင် တခြားလူများအား ကြည့်ကာ ပြောလိုက်သည် " ကောင်းပြီ။ ငါတို့တွေ သေခြင်းတရား နတ်ဘုရားရဲ့ ကောင်းကင်ဘုံဗိမာန်ကို ဖြေရှင်းကြမယ်"
သိပ်မကြာခင် သုံးယောက်သား ပျံသန်းသွားကြပြီး ဒုတိယကုန်းမြေသို့ ရောက်ရှိသွားကြသည်။ သူတို့နှင့်အတူတူရှိသည်က သေခြင်းတရား နတ်ဘုရား ဖြစ်၏။ သို့သော်လည်း သူ့အကြည့်များက ဗလာကျင်းနေကာ တုံ့ပြန်မှုမရှိပေ။
" သူ့ကို ရုပ်သေးရုပ်အဖြစ် ပြောင်းတာမှာ ပြဿနာရှိသေးလား" လီကျွင်းက မေးလိုက်သည်။
" အစတုန်းက သူ ခုခံသေးတယ်။ ဒါပေမဲ့ လီလင်းက ကောင်းကင်အဆင့် ဝိညာဉ်သန့်စင်ရေးဆေးလုံး ဖော်စပ်ပြီးတဲ့နောက်မှာ ဖြစ်စဉ်က ပိုပြီးတော့ ချောမွေ့သွားတယ်"
" ကောင်းပြီ စလိုက်ရအောင်"
ဝမ်ကျူက ခေါင်းညိတ်လိုက်ပြီးနောက် သေခြင်းတရား နတ်ဘုရားကို ထိန်းချုပ်လိုက်သည်။ မျက်နှာကို ဖုံးအုပ်ထားပြီး အနက်ရောင်ချပ်ဝတ် ဝတ်ဆင်ထားသည့် သူ၏ ကိုယ်ပွားများစွာက ပေါ်ထွက်လာသည်။ ထို့နောက် ချပ်ဝတ်ကိုယ်ပွားများက ကုန်းမြေ၏ နေရာအသီးသီးသို့ ပျံ့နှံ့သွားလေသည်။
ဖခင်မြို့တော်က ဤကုန်းမြေပေါ်တွင် အကြီးမားဆုံး မြို့တစ်မြို့ ဖြစ်ပေသည်။ လူဦးရေက သန်းလေးဆယ်ကျော် ရှိ၏။ အားလုံးက သေခြင်းတရား နတ်ဘုရားကို အစွန်းရောက် ကိုးကွယ်ကြသည့် သေမျိုးများသာ ဖြစ်ကြသည်။
ဒီနေ့တွင် တခြားနေ့ရက်များလို ပုံမှန်နေ့ရက်များသာ ဖြစ်၏။ လူများက သူတို့၏ နေ့စဉ်ဘဝအတိုင်း လှုပ်ရှားသွားလာနေကြသည်။ သို့သော်လည်း မမျှော်လင့်ထားသည့် အရာတစ်ခု ဖြစ်ပျက်လာခဲ့၏။ မြို့ရှိ အကြီးမားဆုံး ကျောင်းဆောင်က ရုတ်ချည်းဆိုသလို ကောင်းကင်အထိ ရွှေရောင်အလင်းများ တောက်ပသွားလေသည်။
