ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၂၂)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း (၃၀၂) : စူးစမ်းလေ့လာရှာဖွေခြင်း
အရိပ်က သခင်လေးချူး၏ အခန်းအတွင်းသို့ ရောက်ရှိလာသည့်အခါ စာရွက်ပုံကြား နစ်မြုပ်ကာ ပိုးဝတ်စုံ ဝတ်ဆင်ထားသည့် ရုပ်ချောချော လူငယ်လေးတစ်ဦးကို မြင်လိုက်ရသည်။ သူက အလုပ်ကို အာရုံစိုက်ထားပြီး ထိုစာရွက်များကို ဆယ်မိနစ် ဆက်တိုက် ကြည့်နေလေသည်။
အရိပ်က ထိုသခင်လေးကို တိတ်တဆိတ် လေ့လာနေရင်း အချက်နှစ်ခုကို သတိပြုမိလိုက်သည့်အတွက် မျက်မှောင်ကြုတ်လိုက်သည်။ ပထမက သူ့ဆီမှ မည်သည့်သွေးမျိုးဆက် စွမ်းအားကိုမှ မခံစားမိပေ။ ဒုတိယအချက်က ဤလူတွင် သူ့ခန္ဓာကိုယ်အတွင်း ကျင့်ကြံဆင့် သို့မဟုတ် စွမ်းအားများ ရှိမနေဘဲ နိဝမ်ဆုံမှတ်နှင့် အသိစိတ်ပင်လယ် ဖွင့်လှစ်ထားသည်။
ထိုဟာကွက်များကို သတိပြုမိပြီးနောက် အရိပ်က ဘာမှမလုပ်ခင် နောက်တစ်နာရီကြာ ဆက်လက် စောင့်ကြည့်ဖို့ ဆုံးဖြတ်လိုက်သည်။ သူက မမြင်နိုင်သည့် အဖြူရောင် အလင်းတန်းအဖြစ် ပြောင်းလဲသွားကာ ချူးလီ၏ အသိစိတ်ပင်လယ်အတွင်း ဝင်ရောက်သွားသည်။
ထိုစဉ် အရိပ်က တစ်ခုခု မှားယွင်းသွားကြောင်း တွေ့ရှိသွားလေသည်။ သူက အသိစိတ်ပင်လယ်အတွင်းတွင် တိမ်လိုမျိုး အရာတစ်ခု လွင့်မြောနေကြောင်း မြင်လိုက်ရသည်။ ဤသည်က ချူးလီ၏ ဝိညာဉ် ဖြစ်ကြောင်း သိသော်လည်း သူ့အား အံ့အားသင့်သွားစေသည်က ချူးလီ၏ ဝိညာဉ်သည် မပြီးပြတ်သေးသည့် ပလ္လင် သို့မဟုတ် ကျောင်းဆောင်ပေါ်တွင် လွင့်မြောနေလေ၏။
အရိပ်က ခဏအကြာ စောင့်ကြည့်ပြီးနောက် ချက်ချင်း မလှုပ်ရှားသေးပေ။ သူ ရရှိထားသည့် သတင်းအချက်အလက်များကို မှတ်သားပြီးနောက် ချူးလီ၏ ဝိညာဉ်ဆီ ချဉ်းကပ်လာလိုက်သည်။ သူက ထိုလူ၏ မှတ်ဉာဏ်များကို ရှာဖွေရန် ဝိညာဉ်ရှာဖွေရေး နည်းစနစ်ကို တိတ်တဆိတ် အသုံးပြုချင်ခဲ့သည်။ သို့သော်လည်း သူ နီးကပ်သွားသည့်အခါ ထိုဝိညာဉ်နှင့် ဆက်နွယ်နေသည့် အဖြူရောင် အလင်းတစ်ခုကို တွေ့ရှိသွားသည်။ ထိုအလင်းက တခြားအားကောင်းသည့် သက်ရှိနှင့် ဆက်နွယ်နေဟန်ပေါ်သည်။
