ကံကြမ္မာဖျက်ဆီးခြင်း ဧကရာဇ်၏ ခရီးလမ်း စာစဉ် (၁၇)
မူရင်းရေးသားသူ - lazySageDao
ဘာသာပြန်သူ - Fortuna(ကြည်ဖြူ) (ရိုးရာ)
အခန်း(၂၃၇) : တတိယပွဲစဉ်
ဝမ်ဝေ့က မိုရှင်းယွင်တစ်ယောက် ယင်ကိုးပါး ရုပ်ခန္ဓာပိုင်ရှင်အား အလွယ်တကူ အနိုင်ယူလိုက်ပြီး ပြိုင်ဘက်၏ ရုပ်ခန္ဓာအား ဝါးမျိုလိုက်သည်ကို ကြည့်နေမိသည်။ သို့သော်လည်း သူ အာရုံစိုက်ထားသည်က နောက်ပိုင်းအဖြစ်အပျက်ကို ဖြစ်၏။
တစ်ယောက်က ကျူးကျော်လာကာ ကြည့်ရှုသူများ၏ အမြင်ကို တားဆီးဖို့ အစီအရင်တစ်ခု လုပ်ထားခဲ့သည်။ ကြည့်ရသည်မှာ မိုရှင်းယွင်က တစ်ယောက်ယောက်နှင့် စကားပြောနေပုံပေါ်၏။
" သူမ ဘယ်သူနဲ့ ပြောနေတယ်ဆိုတာရော သိခဲ့လား" ဝမ်ဝေ့က မေးလိုက်သည်။
" ကံမကောင်းစွာနဲ့ မသိခဲ့ရပါဘူး" ဝမ်ကျူက ဆက်သွယ်ရေးအဆောင်မှတဆင့် ပြန်ဖြေလာသည်။
" အခုလတ်တလော အနောက်ပိုင်းကုန်းမြေမှာ မိုမိသားစုဆီက လှုပ်ရှားမှုရှိသေးလား"
" ဂိုဏ်းက သူတို့တစ်ခုခုရှာနေတဲ့ အရိပ်အယောင် သတိထားမိတယ်လို့တော့ ပြောပါတယ်။ ဒါပေမဲ့ တစ်ကမ္ဘာလုံးက သူတို့ကို စောင့်ကြည့်နေမှန်း သိပြီးတဲ့နောက် မိုမိသားစုက ချက်ချင်း ရပ်တန့်လိုက်ကြတယ်"
ဝမ်ဝေ့က မိုရှင်းယွင်ကို မြင့်မားသည့် အန္တရာယ်အဖြစ် သတ်မှတ်လိုက်ကာ ခေါင်းညိတ်လိုက်သည်။ ထို့ကြောင့် သူက ပြိုင်ပွဲအတွင်း သူမ၏ အပြုအမူများကို အာရုံစိုက်ထားလိုက်သည်။
ဝမ်ဝေ့အနေနှင့် သူမက အဆင့် ၉ ယင်ကိုးပါး ရုပ်ခန္ဓာပိုင်ရှင်နှင့် အဆင့် ၁၀ ကြယ်တာရာအုပ်စိုးသူ ရုပ်ခန္ဓာပိုင်ရှင်တို့ကို သတ်ဖြတ်ပြီး ဝါးမျိုလိုက်သည်ကို ကြည့်နေလိုက်သည်။ အလွှာနိမ့်မှ ထိုလူများက သူမအား စိန်ခေါ်မှု မဖြစ်စေပေ။ ထို့ကြောင့် အလွှာနိမ့်မှ ကောင်းကင်ရွေးချယ်ခံများက အလွှာမြင့်ကမ္ဘာများတွင် အမှန်တကယ် အောင်မြင်လာဖို့ရာ မည်မျှခက်ခဲကြောင်း ပြသနေသည်။
