هذا اكو واحد كلاوجي مسوي نفسه امام ( يعني رجل دين يسمونه بذاك الوكت امام) لابسله عمامة وسبحة ويضحك عالناس السذج
فد يوم التوت رجله وهو يمشي فتأذه بس مو هواي لاحظ الناس اهتمتله هواي فبناله خيمة بالبر وكال للناس هناك اتعبد انتم يهو يريد اندعيله او اصليله خل يجيب المقسوم
كعد بالخيمة وكام لو شاف الناس يسوي نفسه يصلي لو يتعبد وهو كاضيها نوم واذا واحد دخل عليه ولكاه نايم يضل يون ويكول انا مريض ورجلي لهسه توجعني
والناس السذج تجيبله اكل وشرب وفلوس وكلشي وهو مستفاد
ومن بين هاي الناس مرة تجيبله كله اكلات دسمة سمج شوي او دجاج مطبك وغيرها وهذا من يشوفها يضل يون تكله امامنه شنو اليوجعك يكلها رجليه ياريت تدلكيهن حتى يرتاحن وبالحقيقة هو لازك بيها جي حلوة وغبية ورجلها منهوب من وراها ويومية يشوفها تطبخ طبخ يخبل وهو وجهاله ياكلون اكل بسيط يكلها المن تودينه تكله للأمام الونان
فطلعت وتبعها رجلها ولمن دخلت لخيمة الونان سمعه يستغلها دلكيني وكليني وهاي مصدكه حسبالها يشور وعنده جاه
جان يطب رجلها ويضربها وكلها رجعي للبيت ولزم الامام الونان من ياخته وكله لك انت واحد فاسد روح منا ماريد اشوفك واذا اشوفك ابتلي بيك وراح اشهرك بديرتنه يعني مالك رزق هنا بعد
فهذا الدجال خاف لم غراضه وشرد
هذه القصة وان كانت بسيطة الا انها بيها شي موجود بحياتنا وهي السذاجة والجهل بالدين يقدسون ناس دجالين او مراقد مزيفة ومالها اي صحة وهؤلاء مستفادين من السذج
تثقف بدينك وتعلم لكي لا يخدعك الدجالون
YOU ARE READING
حكايات اهلنا
Short Storyقد لا اجيد الكتابة وتأليف القصص وتنميق الكلمات وترتيبها الا اني احببت ان اكتب قصصا كنت اسمعها من اهلنا منها ماهو خيالي ومسلي ومنها ما هو حقيقي حدث مع اشخاص حكوها بأنفسهم . فأرجوا ان تنال اعجابكم وارجوا ايضا ان تستخلصوا منها الفائدة
