الاربعاء:
في بيت عبدالله:
عبدالله: ههههه مافيها حاجة اصلو التعاويذ دي اختبار ليك والحلم دا بظهر لي اي زول مبتدئ
مابضرك بي شي.
مجرد التفكير بس في الحلم بخليني متوترة طول اليوم ،معقول؟ انا اصلي عكس القبلة؟ دا كفر ودا حرام ، اي صاح بتذكر لمن ايناس قالت لي انا مابقدر اصلي ولو صليت بلقى روحي عكس القبلة ، اوعى يكون دا حيحصل معاي والله انتحر مادايرة اعيش زاتي.
عبدالله: في تعويذة تاني حتقراها معاك ايناس الليلة بالليل الساعة 2 صباحا.
حنين: 2 صباحا؟؟؟ ، امي مابتخليني اطلع ولا اصلا بكون صاحية.
عبدالله: بيتي معاها.
حنين: نهائي مابنفع.
عبدالله: ايناس تمشي تبيت معاك.
ايناس: انت عارف ياخالي مابقدر .
عبدالله: خلاص بقيتي تعصيني؟ علمتك ودربتك وبقيتي مابتسمعي كلامي؟ كلمة وحدة تمشي تبيتي معاها.
حنين: كلام شيخ عبدالله مزبوط تعالي بيتي معاي.
_________________________
في البيت:
امي: تعالي يا ايناس اتعشي.
حنين: امي نوسة مابتاكل الاكل دا.
ايناس: لا عادي باكل عشان خاطر خالتو.
امي كانت عارفة ايناس ساحرة بس حبتها عشان مهذبة،اتونست مع امي وكانها من سنين بتعرفا حتى قرت ليها الطالع زي ما رانيا كانت بتتسلى معاها بقراية الفنجان.
امي: يلا يانوسة حبيبتي تصبحي علي خير.
ايناس: وانتي من اهل الخير ، وسلمت على امي في راسا.
__________________
في غرفة حنين:
ايناس: بتقري شنو انتي صحي؟
حنين: مختبرات.
ايناس: امتحاناتك متين؟
حنين: باقي ليها شهرين.
ايناس: انا بساعدك تنجحي لو ساعدتيني.
حنين: اساعدك بشنو.
ايناس: موضوعك انتي.
حنين: الا صحي يانوسة انتي ماقلتي لي شغالة بموضوعي دا شديد ليه؟
ايناس: عايزاك تبقي زولة فيك خير للناس بكدا تقدري تساعدي ابوك وامك.
طبعا انا زول يقول لي امك وابوك دا خلاص زولي بجد، ايناس استغلت نقطة ضعف تانية ومسكت لي موضوع ابوي وقدرت تقنعني باني حأساعدو ، وزينت لي الشعوذة حتى اني بقيت عندي الرغبة الشديدة اتعلم كل حاجة في السحر ودا الكانت خايفة منو رانيا زي ماقالت لي خايفة يجي اليوم البشوفك تكتبي الاسحار وتستعيني بالجن وتعذبي الناس.
حنين: تعالي ارقدي في السرير انا حنوم في الارض.
ايناس: لا خليك انتي في السرير بصحيك الساعة 2 الا ربع.
رقدت وانا بفكر في الجاي ممكن يكون شنو؟
لاحظت ايناس قاعدة وبتتمتم وتهمهم صاح كان متملكني خوف لكن خلاص اتعودت عليها.
الساعة 2 الا ربع ولسة انا صاحية افكر:
حنين: نوسة ، نوسة صاحية؟
ايناس: هو انا بنوم ولا بشوف النوم هههههه.
حنين: يلا البلكونة.
ايناس: يلا القمر كويس الليلة ، جيبي معاك السكين وصحن وورقتين وقشة او قلم خربان.
طلعنا البلكونة وبدأنا نعمل طقوسنا ، ظهر لينا غراب من العدم مسكتو ايناس زي ماخالها قال ليها وقطعت راسو بدون رحمة ولاشفقة ، كبت الدم في الصحن وبقت تشيل من الدم بي قشة الكبريت وترسم مرة في الورق ومرة في وشي وتتمتم وتنفث في وشي ويدي ورجولي، اشمئزيت من القرف الانا فيو دا بس قلت نكمل نشوف النهاية شنو.
انتهت طقوسنا وشالت ايناس الورق المكتوب بالدم ودخلتو في كتاب ماقدرت اشوفو كويس عشان الدنيا ليل .
صبحنا الصباح وانا قرفانة من وشي والحصل امس وخصوصا ايناس امرتني ما اغسل وشي ولا يدي الا الصباح.
طلعت سريع البلكونة عشان اشيل الصحن والسكين والغراب الميت لكن ايناس قالت لي شلتهم وحديهم لي خالي يتصرف فيهم.
حنين: انتي متلبسة كدا ماشة وين؟
ايناس: ماشة لي خالي ومنها للبيت.
حنين: طيب انتظري اشربي الشاي.
ايناس: مابقدر.
حنين: حتمشي مع منو؟
ايناس: خالي حيرسل صلاح الساعة 6 ونص.
مشت ايناس من عندنا وصحيت امي والليلة نفسياتي في السما ، وعايزة امشي الجامعة واقعد اقرا واعمل اي حاجة حلوة.
امي: ايناس ليه مشت بدري كدا؟
حنين: خالها دايرا عندو في البيت .
امي: لكن البت دي ماشاءالله كلاما كلو مزبوط لحدي خاتم حبوبتك الاتسرق من علبتا ورتني السرقتو.
حنين : انا حابقى ليك احسن من ايناس ياامي ههههه.
امي: دايرة تتعلمي الكشف ولا شنو ؟
حنين: عايزة اسالك ياامي ، هسة لو بقيت اعالج الناس واقضي ليهم حاجاتهم رايك شنو؟
امي: هوي يابت امشي علي جامعتك ناس شنو البتعالجيهم.
حنين بضحك: بتشوفي براك بي عينك.
امي بعدم اهتمام: كدي تمي قرايتك اول شي بعداك اقعي النار.
اقع النار؟ البسوي فيو دا عليك الله مابوقع في النار؟ الله يهديني بس.
يتبع...