النفاثات في العقد

الجزء 22

شفت ناس بدق في طشاتة لونا اصفر وكان دق مزعج وبهدجو بي صوت مخيف ودم في كل مكان ، صحيت مخلوعة وبقيت اردد في اية الكرسي ، لقيت كنو نايمة في السرير المقابلني ، قمت اتوضيت وصليت الظهر الفاتني ورجعت اقرا تاني في الكتاب ، شلت تلفوني عشان اضرب لي امامي لقيت ماعندي رصيد ، لبست التوب وشلت محفظتي ومشيت اجيب رصيد
عندك رصيد زين؟
بتاع الدكان : في ولو مافي نجيب ليك
عاينت ليو من تحت لي فوق
جيب كرتين زين ، مديت ليو عشرتين جراني من يدي.

انت واحد قليل ادب احترم نفسك ياخ ، رجعت البيت وانا متعصبة واطنطن.
نزلت الرصيد وضربت لي بيبي اطمنت عليو ، قفلت الخط واتونست تاني مع ابوي ورجعت نمت لحدي ماجات امي ونعمة من اليومية وحكو لينا بالدرامات الحصلت ، سالتهم عن خالتو سميرة قالو بتجي بعد مايرمو العظام في البحر وقت الغروب حتى ترجع.

ياخ والله حيرتونا شي ضبح وشي رمي عظام في البحر اها المرة الجاية ان شاءالله يقول ليكم اضبحو زول الله يشفيكم بس .

نعمة : انتي غايتو الله يستر عليك من لسانك دا ، بياذوك وبجننوك

حنين : مافي حاجة بتصيبنا غير الكاتبة ربنا ، الا قولي لي المرة الفاتت انتي كيف عرفتي امام مع اني ماكلمتك بيو

نعمة: ههههههه اتي براك بتهضربي بيو بالليل.

وكيييف انا مااهضرب بيك يااحلى حاجة في عمري ، ربنا يجمعنا في بيت الحلال قريب.

حنين: يعني انتي بالليل بتكوني صاحية؟
نعمة : اي وبسمع البتسمعي انتي بس مابتكلم عشان مادايراك تخافي ، سهيلة دي كل مرة تجينا الاصوات والحركات بالليل بتكتر.
حنين: وهي بتكون صاحية برضو؟

نعمة : مابعرف ، فيصل اخوي زاتو اشتكى من الحاجة دي لمن كانو في الدمازين وقال في زول بجي برقد في نصهم بفرقهم من بعض وبتها فاتن دي مرات تقعد تبكي وتقول زول شين هنا وتأشر مكان امها قاعدة

نعمة حكت لي مواقف كتيرة حصلت ليها هي وامها واخوانا مع سهيلة ومن ضمنها قالت لي انو سهيلة بتعرف والفيها بكلما بأي حاجة

حنين : طيب انتو بتشجعوها عشان تدق الظار ليه وانتو عارفين انها تتعالج بالقران افضل.

نعمة : يعالجا راجلا نحن مالنا ومالا.

حسيت انو سهيلة مغلوبة على امرها وللاسف هي و زيها كتير هم البدفعو تمن الجهل والتخلف.

يتبع...