النفاثات في العقد

الجزء 73

بسم الله بسم الله بسم الله ، امي ياامي اصحي ، الكلب ياامي الكلب .
ظهر لي الكلب جنب السرير وكان بعاين لي بحقد وبقدر ماصحيت امي ماصحت حتى الايات طارت من لساني ماعرفت اتصرف غير اغمض عيوني وارحل جنب امي ، بكيت وبكيت ولو مت الليلة جنودو مابخلوني.
بأمانة انا كيف اقدر انوم الليلة احسن ابقى صاحية لحدي الصباح.

فتحت عيوني لقيت الكلب مافي وبقيت اعاين في الغرفة كلها مافي اثر لي كلب ولاغيرو.

بقيت فاتحة عيوني على امل ما انوم لكن غالبني النوم ونمت حتى حلمت حلم كدا مامفهوم.
جريت النوم يمكن قريب الظهر.
حنين: ليه ماصحيتيني بدري؟
امي: شكلك تعبانة وامس الليل كلو تهضربي عشان كدا خليتك ترتاحي.
حنين: يعني كنتي صاحية وانا بنادي فيك ماسمعتيني؟
امي: انتي عارفة نومي خفيف واقل صوت بصحى بيو.

دا شنو الحصل دا انا متأكدة كنت صاحية لمن ظهر الكلب وقدر ماصحيت امي ماصحت.

الليلة لازم امشي لي عبدالله عشان يعرف الحصل.
ركبت امجاد ومشيت اول مادخلت ضحك ضحكة خبيثة.
عبدالله: عارفك حتجيني راجعة ، يا ابنتي انتي وكت ماقدر الحاجة دي ماكان تقولي عايزة تتعلمي تحضير الارواح.
حنين: انا ماكنت قايلة الوضوع حيبقى كدا وبعدين انتو الجريتوني للمهالك دي ، كان من البداية تقول
حيحصل ليك كدا وكدا ، لكن انتو عندكم فهم في العملتو دا.
عبدالله: والمطلوب مني شنو هسة.
حنين: ما اتعرض للخطر انا وامي.
عبدالاه: اطمني امك مابحصل ليها شي لكن انتي لازم تنقرصي.
حنين: مالازم حرام عليك.
عبدالله: دا كلامو هو.

عرفت اني ما ح انجى من انتقام السفلي لكن على الاقل اطمنت على امي.
رجعت البيت ولقيت رانيا متصلة علي كتير ، اتكلمت معاها وحكيت ليها بكل شي حتى بتاع الركشة، رانيا رفضت رفض قاطع انو اطلب المساعدة من الزول القالو لي بتاع الركشة وكان عندها اقتراح تاني.
اللي هو شنو؟
رانيا: نكلم شيخ حمزة.
حنين: لالا شيخ حمزة لا.
رانيا: ليه.
حنين: شيخ حمزة خاتي لي صورة وماعايزة اشوها قدامو.
رانيا: يابت الناس دي غلطة وكلنا بنغلط انا من رأيي تكلميو.
حنين: حتى لو كلمتو هو بعيد عني ماحيحل لي حاجة.
رانيا: انتي جربي كلمي بس، والله يقطع تذكرة ويجيك ولد عمي وانا بعرفو.

مشيت بي كلام رانيا وكلمت شيخ حمزة وكان مصدوم من القلتو وافتكرتو حيقلب فيني الدنيا بس ماقال اي شي.

يتبع...