النفاثات في العقد

الجزء 12

دخلت جوة الاوضة لقيت خالتي وامي وبت خالتي قاعدين حولين سهيلة،
في شنو؟
امي شيلتني ريان بت سهيلة الصغيرة وقالت لي امشي بيها برة.
شلت ريان ومشيت بعد شوية وانا قاعدة في المظلة جات مرة شايلة مخلاية معاها مزاهر ودخلت جوة، وبعدها بي ثواني جات مزاهر مرة حسن ود خالتي التاني شالت فحم من الكانون في المبخر ودخلت جوة وانا بقيت مافاهمة شي،لكن قعدت في المظلة الاعب ريان وفاتن بنات فيصل ود خالتي فاتن كانت اكبر من ريان بي سنة ونص وكان عمرها زي سنتين ، فصيحة ماشاءالله وبتفهم اي حاجة رغم صغر سنها.
دخلت جوة وجات جارية ، قعدت في الارض وتفرفر بي كرعيها ، كوركت فيها ، يابت قومي دا شنو البتسوي فيو دا
قالت لي امي بتعمل كدا
شلت ريان ومشيت عاينت بالشباك لقيت المرة قاعدة ليها جنب راسا وببخرو فيها بي بخور ريحتو عجيبة وبتقول : اعفو وارضو عنها
طلباتكم مجابة بس فكوها
وكانت سهيلة بتتكلم : انا هبش آوز يلبس اهمر.. آوز دم كتير..
جيبو خروف أسود تدبهو لينا ولا انا نمردو لهدي يموت..

دا شنو دا؟ انا مافاهمة حاجة قلتها والفضول بياكل فيني..
شلت الشافعة ودخلت دايرة اعرف الحاصل امي نهرتني وطلعتني برة وقفلت الباب..
مشيت قعدت في المظلة
جاني غيث وحكيت ليو بالشفتو وسمعتو قعد يضحك ويخوف فيني
غيث : عندها ظار..!
حنين: ودا شنو كمان ؟
بسمع بيو لكن ماعارفة معناهو شنو عشان عشت كتير برة السودان
غيث : عندها النصراني
حنين : مافاهمة حاجة يعني زول؟
غيث : ماعارف اسالي امي صافية تخصص.
غيث غير الموضوع قاللي بعد العصر ان شاءالله نمشي ناس بيبو ونطلع نتفسح ونمشي البحر..
انبسطت شديد ووافقت ، في الساعة ديك جات اميمة جارة ناس خالتي شايلة صينية الفطور ، ختت الصينية وقعدت تتونس معانا سالتنا عن الباقيين
طوالي انا البلهاء دايرة اوريها ، غيث غمز لي وقاطعنا : ناس امي ديل جوة بلمو في حاجات المرحومة دايرين يقسموها..

يتبع...