النفاثات في العقد

الجزء 10

قمت واتجهزت وصليت الفجر مشيت على المطبخ لقيت سهيله وخالتي في وشي بعملو في الشاي ، خالتي ادتني قروش امشي اجيب بسكويت ، مشيت جبت البسكويت وجيت راجعة لقيت سهيلة يا دوب فرشت المصلاية في الحوش عشان تصلي،
مشيت انا المظلة اجيب صينية الشاي ومشيت بي غادي اصحي نعمه، قعدت جنبها في السرير لقيتا صاحية عاينت لي باستغراب نظام صحاك شنو الليلة بدري، ضحكت وقلت ليها هاتف من رب العالمين اصحى بيو ، ضحكت وقالت لي هاتف ولا امام..؟
اتصدمت بس قلت يمكن قاصدة صوت امام المسجد وهو بصلي للفجر، لكن بادرتني بقولها: امام دا منو يا البنو..؟!
بلعت ريقي مرة ومرتين وانا ماعارفة ارد ليها ،علاقتي مع امام ماف زول بعرفا غير امي ، راسي بقى يودي ويجيب معقول تكون امي حكت ليهم ؟
لالا مستحيل امي تتكلم بحاجة زي دي هي عارفة نفوس الناس ويمكن يفهمو غلط...
قالت :مالك سرحتي بي غنم ابليس؟، يخسي عليك مابتحكي لي وانا الشلتك وربيتك كبرتي وبقيتي تدسي علي ،
قاطعتها فورا : انتي شايفة براك اليومين الفاتو كانو كيف وانتي ملخومة والناس في شنو وانا اجي احكي ليك بقصص فارغة،
اقنعتها بي كلامي دا ، وبديت احكي ليها عن امامي وعن المشكلة الاخيرة الحصلت وادتني نصايح واخيرا لقيت زول يحس بالعلي ،
شجعتني اضرب ليو ، جبت تلفوني من تحت المخدة ورسلت ليهو رسالة وكان محتواها:
السلام عليكم
كيف حالك وحال الاهل؟ اسال رب العرش العظيم تكونو على احسن حال.
حبيت اقوليك وصلت السودان قبل اربعة يوم..
سلام ، ضغط زر الارسال وكان زول ضاغط على قلبي وانا بقول في قلبي يارب مايخذلني ولايطنشني ، عشان اثبت لبت خالتي بحبني.

يتبع....