النفاثات في العقد

الجزء 39

وصلت البيت وكلام رانيا عن اختها مخوفني وانا اساسا ماطبيعية من خلعة ايناس لي.
ضربت لي رانيا زي الساعة 1 بالليل اطمنت عليها واصريت لازم اسألا من الحاجة الفي راسي.
حنين: يارانيا يااختي انتي عارفة الحصل معنا انا وامام وعارفة اننا ماكنا ممكن في يوم نفترق وانتي اكتر زولة عارفة ان اخوك كان جادي ولي اخر لحظة دايرني ،عليك الله وريني الغير امام شنو مني انتي اختو وادرى
رانيا: والله ماعارفة ،انا بحاول افهم منو لكن مابديني اي اقوال.
حنين ببكاء: يعني ماانتي السبب؟؟
رانيا بتبكي وبتحلف انها ماعارفة الحصل وبكت عشان ظنيت فيها السوء ، من كلام رانيا فهمت انها ماالسبب في تغيير امام.
غيرت الموضوع لمن شفت رانيا مضايقة.
حنين: بالمناسبة ود عمك ظريف.
رانيا: هههه ظريف ولا عايزة تنسيني.
حنين: ه ههههه بالضبط كدا لكن انا جادة ود عمك ظريف شديد.
رانيا: ولو اتونس معاك مابتشبعي من ونستو.
عارفة ياحنين شيخ حمزة اقرب من اخوي امام بالنسبة لي ، واول واحد من اولاد اهلي اعرفو معرفة عميقة.
زي ماقلت ليك كان عايش في المغرب وماجاء السودان الا قبل 5 سنوات لمن اتوفى عمي الله يرحمو ، جاب جثمان عمي هنا بناءا على طلبو ومنها بقى يجي السودان طوالي ويقعد بالشهور.

حنين: مرتو وبتو بقعد معاهم منو؟
رانيا: قاعدة مع والدتو ومرات بتجي هنا لي زوجها لمن يكون قاعد كتير.
حنين: شكلك بتحبيو ههههه.
رانيا: اي بحبو حب خوة بس.
حنين:طيب ومالو لو حبيتيو عشان تتزوجيو على الاقل يكون عندو مرة في السودان ومايتجهجه.
رانيا: مستحييييل طبعا، اولا مرتو طيبة معاي وحبوبة ولمن تجي مابتفارقني دقيقة.
حنين: مابتغير منك على زوجها؟
رانيا: اكيد الغيرة موجودة لكن هي عارفة طبيعة علاقتي مع حمزة شنو.
حنين: دقيقة قلتي لي شيخ حمزة..هو شيخ ولاشنو؟
رانيا: اي درس علوم شريعة في المغرب وحضر فيها ماجستير وهسة ساعي يعمل الدكتوراه درس اللغة الالمانية والفرنسية والانجليزية وغير كدا بعالج بالرقية الشرعية.
حنين : عشان كدا قلتي شيخ.. طيب مافكر يعالج اختك ليه؟
رانيا: حاول كتير لكن اختي بقت بتتعامل بالسحر وعندها اعداد من الشياطين السفلية يعني علاجا صعب وهسة تشوف العمى ماتشوفو.

انتهت مكالمتي مع رانيا بعد حوارات طويلة حكت لي فيها حاجات كتيرة بتخصها وبتخص اسرتا ، رانيا كانت كتاب مفتوح بالنسبة لي.
فضلت اتقلب طوال الليل ماقادرة انوم شوية اركب السماعات اسمع وشوية افتح الصور واقلب فيها ، جات صورة ريان بت سهيلة وانا شايلاها واتذكرتا
الايام العصيبة المرت بيها سهيلة ،جات في بالي فكرة ..ليه ما اساعد سهيلة؟؟
مش سهيلة ممسوسة؟
طيب انا لو ساعدتها عن طريق شيخ حمزة يبقى ماقصرت.
فكرت اتصل بي رانيا احكي ليها بي سهيلة ، اتصلت مرتين ماردت.
رانيا حتكون نايمة زي الوكت دا الساعة قريب 4 فجر ، نمت وانا بفكر وكنت متفائلة بانو ود عم رانيا يساعدني.

يتبع...