النفاثات في العقد

الجزء 26

الساعة 10:43م :
دا منو السغيل البضرب مع وكت المسلسل دا؟

رقم غريب..!
الو؟

اهلين معاي حنين؟ قالتا بكل مياصة ودلع يقلب البطن..!
عرفتها من كلاما ولدغتا الفي لسانا ، وليه مااعرفا وانا اتكلمت معاها مرتين وكلاما كلو كان ماموزون وكلو تريقة واستهتار.

حنين بزهج : اي

معاك رانيا..!
اهلا يارانيا ان شاءالله كويسة؟

رانيا : الحمدلله ، مشتاقين..!
حنين: تسلمي

وبقت تمعط فيني وتسالني اسألة غبية زيها وانا مضايقة مسلسلي قرب يبدأ.

رانيا: معليش اخدت من وقتك كتير بس ممكن اوصف ليك البيت تجيني بكرة؟

حنين: اجيكم البيت؟ خير ؟
رانيا: لا خير
حنين: مابقدر معليش
رانيا : طيب خلاص نتلاقى في اي مكان
حنين: انتي ضروري تلاقيني يعني؟
رانيا : محتاجة اتكلم معاك..!

رانيا عايزة تتكلم معاي؟ وفي شنو؟ اكيد في امام ،
دي رانيا اخت امام اكيد جايبة لي عنو خبر اول مااتذكرت امام اتحرك جواي شي خلاني اوافق الاقي البت الكلها اعوج دي.
اتفقنا نتلاقى وكان مكان في الخرطوم .

ركبت المواصلات من جنب الجامعه وصلت مكان محدد وكانت منتظراني بي عربيتا.
وصلنا الحتة الاتفقنا نتلاقى فيها

وكان تعاملا ظريف ووشها بدي غير عن رانيا الاتكلمت معاها.

بت جميلة في وشها وبياضها صافي وفيها شبه من الفنانة بلقيس وقامتا توحي ليك بعارضات الازياء باين عليها الراحة شديد ، ايوا هي الصغيرة ومامتزوجة وكل السمح ليها ، طلعنا في العمر انداد بس هي خلت الدراسة ومسافرة روسيا تدرس هناك قال ماعاجبا السودان.

اتونست معاي وكانها عايزة تستدرجني بالكلام ، طلبت لينا غداء.
اعتبرت اليوم داك مثابة تعارف وافتح صفحة جديدة بيني وبين رانيا

انتي بت طيبة وظاهر عليك بت ناس امام حكى لي عنك كتير وقاللي لمن تشوفيها وتتعرفي بيها حاتغيري نظرتك ليها ، وانا غيرت نظرتي ليك وحبيتك اخت لي اخت ، بس بي صراحة عايزة اقوليك حاجة عشان انا مابقبل يحصل لي كدا ، امام دا خلاص حيتزوج وحدة هناك ونحن رافضين
الزيجة دي..!
اتصدمت وبقيت ماسامعه الحوليني والدنيا ضلمت في وشي..

مبروك ، ان شاءالله ربنا يسعدو وانا بدعي ربنا تكون عايزة تغيظني بس.

انا جادة والله لو برضى الكلام دا في روحي ماكان كلمتك .

ماقلت ليك مبروك ربنا يتمم ليهم على خير.

شلت شنطتي وكانت هي جارية وراي واصرت توصلني ، وصلتني وطول الطريق ساكتين.

دخلت البيت وكنت في حالة الله لاكتبا لي مؤمن.

شلت تلفوني ورسلت مسج لي امام
{ الف مبروك ياالكنت راجياك وضيعت زمني معاك ربنا يهنيك وحقي مايتردة فيك ..كان تعزمنا عشان العشرة الكانت زمان على الاقل}..

يتبع...