النفاثات في العقد

الجزء 61

ايناس اقنعت اختها تنزل تسلم على خالها اخيرا.

استقبلنا واحد والظاهر عليو ماخالها.
ايناس: بابا عبدالله وين؟
الراجل: ومنو انتي؟
رانيا: قوليو بنات جميلة.
الراجل: اتفضلو شيخ عبدالله جوة.

الراجل كان لصيص وبعاين لي وبتفحصني وعرفني غريبة عنهم.
الراجل: ودي برضو بت جميلة؟
رانيا: وانت مالك ، زح خلينا ندخل.

دخلنا واستقبلتنا مرتو بي ترحاب وجابت لينا العصير واتونست معانا شوية ومشت وكان في كمية من النسوان وبعض الرجال منتظرين برة الغرفة الهو فيها.

ايناس طوالي دخلت لي خالها وماانتظرت.

حنين: والناس الكتيرين ديل شنو.
رانيا: هههههه اكيد جايين عشان خالي يعمل ليهم عمولات ويتعالجو بالشعوذة.
حنين: اسكتي جايز الحيطان يكون ليها اضنين .
رانيا: خالي عارفني بقطع فيو وعارف وجهة نظري في البعمل فيو دا.
حنين: طيب هسة هو بكون مشغول ايناس خشت ليو ليه؟
رانيا: ياحبيتي ديل في الهوا سوا فالموضوع عادي ومابعيد تكون مشت تساعدو هسة.

طلعت لينا ايناس بعد مسافة وقالت لينا تعالو
رانيا: ماداخلة خلي يطلع لينا برة.
ايناس: رنو ادخلي وماتعاندي خالي ماحيجيك هنا حضرتك وبعدين القطيعة دي خليها.
حنين: يلا يارانيا.
رانيا: حنين انتي ماقلتي لي نوسة جابتك لشنو.

بصراحة ارتبكت وماعرفت اقول لي رانيا شنو لكن ايناس انقذت الموقف بس رانيا كانت حاسة بي حاجة ماطبيعية تجاه الجية دي.

ايناس: جاية تسال خالو عبدالله من حاجة.
رانيا: الله يستر عليك غايتو.

دخلنا لي خالهم وكانت الغرفة البشتغل فيها مضلمة الا على نور كشاف وكأنو الحاجة دي ورثا لي ايناس بت اختو.
سلم على رانيا بالاحضان رغم اشمئزازها منو ومن اختها وعمايلهم.
عاين لي وعاين لي ايناس القالت ليو دي حنين صديقتي الكلمتك عنها.
رانيا طلعت فورا من الغرفة بعد سلمت وخلتني انا واختها.

عبدالله: تعالي اقعدي هنا ياحنين.
قعدني جنبو وبدا يسأل فيني وكان في واحد معاهو ، اعوذ بالله دا ظهر من وين قبيل ماشفتو ، الظاهر كان قاعد في الزاوية ونحن ماشفناه.

عبدالله: نوسة كلمتني عنك وعن القدرات العندك.
حنين: بس انا عادية ماعندي قدرات.
عبدالله: لا عندك ، بتحسي بالحاجة قبل وقوعا واحلامك بتتحقق وانا شايف في عيونك حاجة تانية هههههه.
حنين: احيانا.
عبدالله: انا وصديقتك حنساعدك تستغلي قدراتك دي في حاجة تنفع الناس ، عمرك كم؟
حنين:20 سنة.
نطق الراجل الجنبو فجاة: 20 سنة صغيرة الا 40 سنة.
عبدالله: لا ما الا 40 ، هدي ايناس من 19 سنة اتعلمت، وبعدين ماتنسى لمن علمتك كان عمرك 24 سنة.

ايوا كان عمري 20 سنة وعايزة اخشش نفسي في متاهات مامنها طلعة.

عبدالله: مستعدة ياحنين تستغلي قدراتك لي نفع الناس؟
حنين: ماعارفة.
عبدالله: لا الحاجات دي مافيها عارفة ولا ماعارفة ابقي على كلمة.

صراحة كنت خايفة وكنت حتراجع عن قبولي بالتعلم لكن ايناس كانت بتعاين لي بنظراتا المفزعة عشان اوافق.
حنين: خلاص ياشيخ عبدالله انا ماعندي مشكلة بشرط ما ادخل في اعمال محرمة.
شيخ عبدالله: لالا نحن ماعندنا محرمات وكلام زي دا نحن شغلنا مساعدة الناس بس.

ههههههه مساعدة الناس وارضاء الله دا الكلام الاوهمتني بيهو ايناس وشيخ عبدالله اقصد الساحر عبدالله.

عاينت في وشوشهم الاتنين وكان الخبث ظاهر فيها قسما قلب رانيا كان حاسي انو ايناس حتوقعني في بلاويها، لكن يازولة مافرقت حتى لو غيرتي رايك اهو تكوني استفدتي حاجة ولو بسيطة بس اهم شي ماتدخلي غضب ربنا.

ههههه لسة الغضب جاي هو انتي شفتي حاجة.
__________________________

ساقنا الراجل الكان معاو في الغرفة بأمر منو عشان يشرح لي حاجات وطلب مني اجيب سبعة ابخرة من العطارة بلخبطوها مع حاجة وبقولو عليها ابخرة التنزيل.
المشعوذ: جيبيها يوم الخميس العصر.
حنين: ان شاءالله.
طلعنا من بيت خالها وضميري بياكل فيني اكل وغير نظرات رانيا المليانة حسرة علي، اما اختها فكانت مبسوطة وجارية تحت كرعي جري.

يتبع...