النفاثات في العقد

الجزء 60

الو..!

رانيا: انا جنب كبري الحرية، انتي وين؟

حنين: انا قريبة اديني دقيقتين بجيك.

رانيا: مالك مفشفشة كدا ههههه.

حنين: البتابعك ببقى طين مش مفشفش ، زيدي المكيف دا.

رانيا: عموما ياستي مشتاقين.

حنين: كتير ياقلبي، يلا مشينا.

اتصلت على امي اكلما بأني ماشة مع رانيا واحتمال اتأخر.

-------------------

في بيت رانيا:

رانيا: تاني ماشة فوق، انتي مابتسمعي الكلام.

حنين: استني دقايق وبجي نازلة.

-------------------
ايناس: نورتي ياغالية اتفضلي.
حنين: غريبة الليلة القاك قريبة من الباب.
ايناس: كلموني بجيتك ، قلت استقبلك ، اها على موعدنا ولاغيرتي رايك؟

حنين: ماغيرت لكن المشية دي خايفة منها.
ايناس: ماتخافي انا معاك.
حنين: حيوصلنا لي خالك منو وبعدين المكان الساكن فيهو خالك دا ماقريب.
ايناس: انا حتصرف، خليكي هنا لحظة.
حنين: لالالا تخليني وين، رجلي في رجلك مابقعد براي هنا.
ايناس: حنين ..! لازم تتعلمي الشجاعة.

نزلت ايناس وطولت وهي بتتكلم مع رانيا وشكلها رانيا كانت رافضة توصلنا لي بيت خالها ، لكن في النهاية قبلت تودينا.

اللفت انتباهي اكتر ايناس اللابسة عباية ومحجبة طرحتا..!
حنين : طيب انتي زولة كويسة والله لبسك مزبوط افتكرتك مابتعرفي حاجة اسمها حجاب.
ايناس: وحكمتي علي كدا ليه؟
حنين: عشان ماحصل شفتك لابسة اسكيرت تحت الركبة ، لبسك كلو فوق الركبة ههههه.
ايناس: في البيت بس اما الشارع من سنين ماطلعت.. لكن من زمان انا محجبة.
حنين: طيب مابجوك زوار؟
ايناس: مابطلع ليهم.
حنين: لاقصدي زوار في غرفتك.

ايناس فهمت قصدي وفهمت الداير في راسي.

ايناس: اي بجوني.
حنين: اكيد فيهم رجال او اغلبهم رجال.
ايناس: ايوا.
حنين: وماببتغطي منهم ليه؟

سكتت ايناس وماجاوبتني وكانو كلامي دا نبهها لي حاجة.

ايوا انا كنت قاصدة الجن، زي ماربنا امرنا نتغطى من الانس برضو مفروض نتغطى من الجن.
كتير بقولو لينا في البيت ماتقعدو بالعريان والخفيف وماتلبسي الاحمر والاسود العريان لمن تجي تنومي الا لمن تتزوجي ولي زوجك بس.
دا البجيب المس العاشق وماادراك مالعاشق.
حتى لوكنا في بيتنا مفروض ننستر ولو انو عالم خفي مابتشاف الا في بعض الحالات.

بس ايناس كانت بتشوفهم يقظة وبتتكلم معاهم وكانو حلقة وصل بينا وبين خالها ،وكانت بتحكي لي عن عالمهم المابختلف عن عالمنا كتير.

رانيا: وانا رايك في لبسي شنو؟
حنين: انتي الزيك منو بس مابتعرفي تلفي الطرحة وقصتك الكبيرة دي احسن تشوفي ليها مع شعرك حل ههههه.

رانيا: انتي عارفة يانوسة لو امي عرفت نحن مشينا لي خالو عبدالله ماحتريحنا.
ايناس بنهرة: هي امي وينا هسة.
رانيا: المشكلة مابتسالك انتي حتشرشحني انا ومابعيد تشيل العربية مني.

ايناس: مابتعمل ليك شي.

كان المشوار طويل ومع زحمة الشارع طال زيادة.

وصلنا اخيرا لي بيت خالهم وشكلو كان متواضع جدا بالنسبة لي بيتهم.

رانيا: انزلو وبعد تخلصو اتصلو علي.
حنين: يافردة ماشة وين مخليانا.
رانيا: زي ماقلت ليكم.
ايناس: خليها براحتا بس ماتنسي انو دا خالك الوحيد البقى لينا زي ابونا الله يرحمو.

يتبع ...