النفاثات في العقد

الجزء 08

رجعت لي الشلة وقعدنا نتونس وقامو اولاد خالتي عشان يوصلو بنات خالتي التانية بيتم ابوهم صعب ومابخليهم يبيتو برة البيت ودعناهم وجينا جهزنا الفرش للنوم ، الليلة مابنوم برة البرد بدا ينزل قالتها خالتي صافية.
فعلا ماف زول نام برة والناس فاتو من بيت البكا وبقينا نحن بس مع ناس خالتي.
المهم كنت ناوية الليلة دي انوم مع ناس امي وخالتي صافية لكن نعمة اصرت انوم معاها هي ومرة اخوها ، طفينا الانوار ورقدنا قعدنا نتونس ،
نعمة وسهيلة نمتو ولا شنو؟
ماف وحدة ردت علي شكلهم نامو ،بقيت انا صاحية ،
رنة تلفوني باعلى صوت لقيت المتصل ابوي، انبسطت ورديت واتونست معاو وحكيت ليو بي عم ود مسعود وكرمو وعن الحياة وبساطتا وانو الناس مااتغيرت زي مابقولو لينا دايما، جرينا الونسة ووصاني ابقى عشرة على التذاكر والجوازات وانتهت المكالمة.
حسيت العبرة خنقتني عشان ابوي خليناو براو في الغربة وكان قلبي معاو ، اتقلبت يمين وشمال وبرضو اللليلة شكلو ماحجيني النوم اصلي مبرمجة من السعودية علي السهر ، حسيت الليل طويل وممل، شلت تلفوني وفتحت الاسماء وبقلب شفت اسم خلا قلبي يخفق بشدة
Emami UAE
Emami SDN
امام او امامي زي مابدلعو حبيبي والولد الراجل اتذكرت ونستنا في المسنجر والتلفون واول ايام اتعرفنا علي بعض اتذكرت حاجات كتيرة حلوة بينا وحاولت نفسي اضرب ليهو في رقم السودان بس اسمع صوتو على الاقل ، الشوق قتال ياناس.
ختيت التلفون تحت المخدة وبعت الفكرة وانا بكابر.
غمضت عيوني وقعدت اسبح عسى ولعل انوم ، شكلها مرت ساعات علي وانا لسة صاحية عرفتها من ضوء القمر الداخل بالشبابيك،
طق طق طق ، الصوت المابغبى علي بدت صوت الطقطقة من جديد بس الليلة مامصدرا الشباك ، حسيت قلبي حيطلع من محلو خصوصا الطقطقة دي جاية من كراع سريري بجهة راسي ، يارب يارب ترحمني الشي دا الليلة ياخنقني ياقطع راسي ، قلتها وعيوني اتملت دموع، قعدت اقرا واقرا اختفت الطقطقة فجأة، اطمنت بس ماحاولت اعاين ولاافتح عيني من اساس.

يتبع...