النفاثات في العقد

الجزء 32

مرت ايامي عادية ومافيها شي غير ضغوط الامتحانات.

جبتي لي القروش؟!!
ايمان؟! كدي قولي صباح الخير اول.
ايمان: صباح الخير اها مستعدة لامتحان الليلة؟
حنين : يعني ماشديد اصلا مادة الليلة مابتخوف ، والقروش حاجيبا ليك انا وعدتك.

سقت صحبتي تبيان وزحيت من جنب ايمان.

امتحنا وكان امتحان ماساهل عكس مااتوقعنا بس الحمدلله اشتغلنا كويس اتخارجت فورا من الجامعة عشان مااشوف وش ايمان.
وانا طالعة شفت ايلاف معاها حبيبا وكان اول مرة اشوفو ظاهر عليهو ود كشى مشى ساي حكمت عليو من شعرو المبرم وسستمو الواقع وطريقة شرابو للسجار ، ركزت معاو مسافة حتى ركبت على البيت طوالي.

دخلت لقيت عندنا ضيوف ، ياسلاااام خالتو دار السلام انبسطت لمن شفتها ، خالتو داريللي كانت جايبة حاجات رمضان لامي عشان كنا صايمين رمضان في السعودية.
بيتت معانا وسافرت الصباح.
امي: دار السلام قالت دايراك لي منتصر ولدا..!
حنين: نهائي مابنفع معاي.
امي: اها البنفع معاك منو؟ إمام الفات وخلاك؟

ماتتصورو كلام امي وقع علي كيف..
امي؟؟ بتعايرني بي إمام؟ اخر وحدة كنت اتوقع امي تستهزأ بي كدا..!
ايوا معاها حق تزلني بيهو انا الجبتو لي روحي وانا العلقت نفسي بي وهم.

وهم؟؟؟!
لا ابدا ماوهم امام من يومو كان حادي وكم مرة اصر على امي عشان يتكلم مع ابوي لكن انا الكنت كل مرة بقول اصبر مانستعجل ، استاهل.
مع دا كلو كان قلبي قابضني وحاسة انو امام دا مابراو ، في حاجة قلبتو 360 درجة ضدي بس انا مافضيت عشان اعرف هي شنو.

بعد امي قالت كلاما دا ماعقبتا عليهو ابدا ، دخلت غرفتي وقعدت ابكي لحدي ماهدأت براي.

يتبع...