النفاثات في العقد

الجزء 67

الثلاثاء 23 ابريل 2012:

باقي ليك خطوتين بس تعمليهم وبعدها تملكي الدنيا وتتصرفي في عقول الناس زي ماعايزة
كانت ايناس طول الطريق بتقول لي كدا.

وصلنا بيت خالها البقى اكتر مكان محبب بالنسبة لي ولقيناو مشغول مع ناس.
نادانا عشان نحضر دق الزار في غرفة التنزيل اصلها دي غرفة المصايب والبلاوي.
دق الزار؟ مش كان عندي فيهو رأي؟ مش دا الانا عارضت سهيلة وناس خالتي وعواطف عشان يخلوهو؟
مش دا الامام قال لي شرك بالله؟
انا الكنت اول المعترضين علي الزار الليلة قعدت في نص الدق والنقزي، العيانة تنقز والسليمة تنقز والصغيرة والكبيرة تنقز الله يستر ما اقوم انا انقز معاهم ههههههه.
اليومية كانت لي بت عمرها ما اتعدى ال 16 سنة امها قالت الحبش تعبوها ومرضت وبقو ماعارفين ليها علاج لمن زول ود حلال وصف ليها شيخ عبدالله اقصد الساحر عبدالله.
ههههه صاح دا ود حلال شديد الوصفو ليكم دا.

الزار والشعوذة واحد طبعا المؤيدين بقولو لا الزار دا مزاج وحاجة طاهرة وبحب النظافة والريحة ومابضرك لو لبيت ليو طلباتو.
انا بقول الزار ريح احمر والريح الاحمر صنف من صنوف الجن يعني الزار تعامل مع الشيطان بدقو ليهو ويضبحو ليهو ودا اهم شي عندو من الحلاوة والبخور، اها وين الطهارة والنظافة البتقولو عليها هنا؟

جابو الخروف الاحمر ملبسينو خيوط حمراء مربط فيها ودع وكشاكيش يحليلو لوكان عارف روحو بنضبح لي شيطان كان انتحر.
هدرو دمو ظلم شي في الارض وشي في طاسة وبعداك رجعت تاني الكودية تغني بالدلوكة ومعاها البدقو بالطشاتة بتاعة النحاس.

اه نسيت تتذكر الحلم الحلمتو يوم دق اليومية بتاعة سهيلة قبل3 سنوات؟
شفت ناس كتيرين بدقو في طشاتة نحاس ودم في كل مكان ،بس ياهو دا الحلم اتحقق قدامي.
كلام خال ايناس صاح انا بشوف المستقبل والحاجة دي ربانية ،بس لمن بديت اعمل الطقوس السحرية زادت وبقت واضحة اكيد دي من عمايل الشيطان بحاول يقربني ليو بأي طريقة كانت.

ايناس دي بتوالس في خالها بتقول ليو في شنو ؟؟؟؟

يعني شنو نحن نقعد نحضر في النقزي والهبالة دي لمتين ،عندنا حاجات اهم من لولية وبشير والودع والجبنة والبخور ، اي خلاص انا حأبقى الساحرة ولولية دي خدامة مابرضى بيها عندي ههههههههه.
انا الساحرة الماعاجبني كلو بوديو في داهية بس اصبرو لي ياعباد الله.

بقلب في افكاري بين الاستكبار والانتقام، اي الانتقام...! دي اكبر فرصة لي انتقم من امام الباعني لازم اخد حقي و اكسرو واذلو.

ايناس: يلا نشوف شغلنا.
حنين: يلا..

مشينا الحوش الوراء
بدأنا نعمل في طقوسنا بس المرة دي كان فيها حاجة زيادة ، ايناس شالت الدم بتاع الخروف القبيل الفي الطاسة وامرتني اشرب منو.
حنين: انتي مجنونة..! دا مرض.
ايناس: لا حتشربي شئتي ام ابيتي دي اوامر ولازم تنفذيها.
حنين: يابت الناس دا سم شوفي شكلو بقى كيف.
ايناس: انتي ماتتكلمي كتير حتسمعي الكلام ولا اجبرك على حاجة ماعايزاها.
حنين: مابسمع الكلام ونادي لي عبدالله اتفاهم معاو.

نادت على خالها وحكت ليو الحصل ، بس خالها كان مفتح وماعايز يفقدني في مهمة الشيطان دي.

عبدالله: الدم دا لازم تشربيو يعني حاجة ضرورية ولو انتي قرفانة من دا هسة نضبح ديك وسريع تشربي منو ان شاءالله لو حاجة يسيرة.
حنين: لالالا دا مابحصل مستحيل.
عبدالله: يا ابنتي اسمعي الكلام.
حنين: خلاص كنسل كل شي انا ماعايزة اكمل ولاعايزة اي شي غير ارجع لأمي سالمة.
عبدالله: حترجعي ليها سالمة ماتخافي.
ايناس: هو على كيفك نكنسل ولانكمل، قايلة نفسك خاشة مسابقة ، عندك اوامر تنفذيها ولا بتدفعي التمن غالي.
عبدالله: ايناس خليها.
صلاح: كيف تخليها ياشيخ عبدالله كدا حتختني انا في موقف صعب مع (****).

ايوا كلهم كانو خايفين من السفلي(****) ، قالو خطير وممكن عادي يتسبب في مقتلك لو اتراجعت في تنفيذ اوامرو ، كدا حال السحرة عايشين تحت رحمة مردة الشياطين .
صلاح وايناس وعبدالله عايزين يتصرفو بأي طريقة ولو على حسابي وحساب ديني عشان مايتعاقبو العقاب المرير، اسهل حاجة يضحو بي بحجة انا الخليتهم ينزلو الكاهن المرسول من المارد الكبير عشان يعلمني السحر.
لكن عبدالله كان ادهى وماحب يستعمل معاي اسلوب الغصب وبطريقة ما، قدر يقنعني باني لازم اعمل حسابي ولو ماعملت البقولو لي حيحصل ما لايحمد عقباه ، انا ماكنت خايفة على نفسي ماعارفة جاني احساس انو الجن ينتقم مني في امي ومستعدة اعمل المطلوب عشان ادفع الاذى عنها.
وافقت اخيرا والكل كان مبسوط وانا الوحيدة الببكي وممغوصة على حالي.
شربت الدم ، ايوا انا العوافة البقرف من اي شي الليلة شربت الدم الحرمو ربنا علينا ، حقيقة افتكرت نفسي حأموت ولا اقلاها استفرغ معدتي والجهاز الهضمي كلو لكن لقيت نفسي مبسوطة لا وكمان عايزة زيادة ، ما دا الشيطان بحلي ليك النجاسة والقرف.

نفذت امر السفلي بكل بساطة ورجعت البيت وانا في قمة سعادتي خلاص انا البت المسكينة زمان منو تاني يقدر يزعلني الليلة انا بقيت ملكة.

يتبع....