النفاثات في العقد

الجزء 52

الو.. رنوية صباح الخير..
رانيا: حبي صباح النور كيفك؟
حنين: الليلة فاضية؟
رانيا: ولاعندي اي شي.
حنين: خلاص الليلة ماعندنا لاب تعالي لي عشان الاقي ايناس.
رانيا: بس مسافة الطريق.
_______________________

اتأخرتي يارانيا..!

يلا اتوكلنا على ربنا.

وصلنا بيت ناس رانيا دي تاني مرة اشوفو واليلة بالذات ركزت فيهو فعلا البيت دا فيهو حاجة خفية، وكل سلمة بطلعا بحس بي قشعريرة ولو مارانيا جاراني من يدي لي فوق كان هربت.
دقت رانيا باب الغرفة تلاتة مرات ودخلنا، اقيفي افتحي النور.
هششش ماتطلعي صوت.
حنين: انا خايفة.
رانيا: اسكتي، ماتخافي.

غرفة ايناس كانت مضلمة وعتمة شكلو النور من سنين ماخشة فيها، وغير كدا فيها ريحة تقلب البطن دي ريحة لحم..!
لكزتني رانيا عشان اقول السلام .
حنين: السلام عليكم.
ايناس: وعليكم السلام.
دي بتتكلم جنبنا ، الله ينعلك يارانيا وقفتينا جنبها.
ايناس: كيفك ياحنين؟
حنين: الحمدلله ، بس انا ماشايفة شي وبخاف من الضلام يااخت.

ايناس مشت ولعت لمبة كشاف، بالله دي بتشوف كيف وبتعرف مكان حاجاتا في الضلمة دي ، اعوذ بالله وشها مخيف جنب الكشاف.
ايناس: اتفضلي، نحن هنا اغلب وقتنا مضلمين.
حنين بي كبكبة: مافرقت انا كدة شايفة .

الكشاف منور جزء كبير من غرفة ايناس ، ظاهر عليها مرتبة اتوقعت اشوف جماجم وقزازات فيها سوائل ملونة وخفافيش وحلة فيها زول مطبوخ ومكنسة بتطير زي افلام الكرتون ههههه،معليش اول مرة ادخل غرفة ساحرة.

غرفتها كان فيها دولاب ومكتبة وسجادات وبساطات معلقة في الحيط وفي سجادة في الارض وفيها مخدة تقريبا دا مكان بتنوم.

حنين: طلبتي تتكلمي معاي صح.
ايناس: ايوا ، حبيت اتعرف عليك واعتذر على الحصل.

طالما ايناس عايزة تعتذر معناها ما زولة كعبة زي ماافتكرت.
بالضبط ايناس طلعت راكزة في كلاما وبتوزن كل كلمة قبل ماتطلع منها.
حنين: وانا لي الشرف بمعرفتك.
ما اظن دا السبب الخلا اخت رانيا تناديني.
اخت رانيا كان عندها راي فيني، اتكلمت كلمتين بالاول وبقت ساكتة انا البتكلم ، زي مابقولو وصلتني نص البحر وخلتني ، صراحة رانيا ختتني في موقف لااحسد عليه وفاتت خلتني مع اختها المخيفة دي.
لكن انا كنت بدرعا للواحد في وشو .
حنين: يااخت ايناس دا ماالسبب الجبتيني ليو من هناك.

سحفت وجات قعدت جنبي :
ايناس: انتي النوع البعجبني ، بتفهميها وهي طايرة.
حنين: طيب كنتي عايزاني لشنو؟
ايناس: عايزة اقوليك انتي عندك رفيق، جاني في اوضتي المرة الفاتت ودا السبب الخلاني اطلع ليك.
حنين: معليش فهميني وحدة وحدة.
ايناس: يااختي عندك جن مرافقك، جاني هنا في مكاني ولمن جيت من وراك كنت عايزة اعرف الجن دا جاء مع منو.
حنين بخوف: معنى كلامك انا ممسوسة ولا شنو؟
ايناس: لا، هو مرافقك وبتحين الفرصة عشان يمسك، والليلة جاء معاك .
حنين: هسة معاي؟
ايناس: مابسمح ليو يخش هنا تاني.

ماصدقت كلام ايناس في الاول، لكن تاني اقنعتني واقتنعت لانو الحاجات البتحصل معاي من صفير واحلام واصوات وحركة مرات لمن اكون راقدة بحس بزول بجرني من رجولي حتى احيانا بكون نايمة بسمع زول بتكلم في اضاني ولغة مامفهومة والادهى والامر في صوت بوسوس لي بي حاجة حتحصل وبتحصل.
اقتنعت بي كلام ، اي ايناس ماقالت الكلام دا من فراغ نبهتني لي حاجة كان ممكن توديني في مصيبة.
حنين: طيب حضرت جلسات قران كتير وماحصل لي شي.
ايناس: عشان انتي ماممسوسة، انتي مرافقك بمشي معاك مكان ماتمشي.
حنين: صاح طوالي بسمع خطوات وراي واتلفت ماالقى زول ، اها دا اتفكة منو كيف؟
ايناس: اتحصني واذكري ربنا وحافظي على صلاتك.

سبحان الله ايناس بتقول لي صلي؟ مش عندها جنون سفلية كفرة؟ غريبة تقول كلاما دا.
كانها قرت افكاري:
ايناس: الصلاة زيها مافي بالذات صلاة الفجر والعشاء لو حافظتي عليهم الشيطان مابقربك، انا نفسي اصلي.

حنين: المانعك شنو؟
ايناس: مابقدر لو وقفت بس في السجادة بلقى روحي عكس القبلة.
انا ربنا غضبان علي.
صاح انا بتعامل بالسحر لكن والله ماحصل اذيت انسان.

حنين: طيب السحر هو اذى الناس وانتي قلتي ما اذيتي زول ، كيف تكوني ساحرة؟
ايناس: لو اتعلمتي ترسمي مجسم العدد الفردي معناها انتي ساحرة.
حنين: طيب ياايناس انتي الجابرك شنو على دا كلو
ايناس: مامني والله ما مني.

الكلام كان طويل مع ايناس (ملاحظة: باقي الكلام محذوف لانو سر وحيبقى سر زي ماوعدتها)..

ايناس كانت بتعاني شديد من الحاجة العندها وماكانت مرتاحة زي ما كنت قايلة وكانت مضطرة تطيع اوامر السفلي العندها ولو على حساب دينا وعلاقتا مع ربها
عندها كمية من الكتب اشكالها غريبة بعضها مقطع وبعضها مخيط بخيوط وبعضها مجلد بي جلد.

الكتب دي ماحكت لي اتحصلت عليها كيف ، بس انا اكتر حاجة كانت شاداني شكلها.

دي كانت الزيارة الاولى لأخت رانيا ، شالت مني وعد عشان ازورا تاني وتالت.

يتبع...