النفاثات في العقد

الجزء 24

قربت اجازتنا تنتهي ، سافرنا الخرطوم لي خالتي اخت امي وانا قلبي متعلق بالبلد واللمات وحوامة العصريات.

زرتا اهلنا الهناك ومرت الاجازة باسرع ماكنت بتصور وامام حبيبي كان بضرب لي طوالي ودي الحاجة الكانت مطمناني برضو عدينا ايام حلوة في الخرطوم وكان صدفنا مبارة مصر والجزائر وجاء يوم سفرنا وكان قاسي اقسى من كل شي ، ودعنا الاهل وكل الغاليين وكان سفرنا يوم اربعاء وطيارتنا الساعة 5 .
وصلنا جدة وبرضو كانت راجيانا سفرية داخلية تاني
وصلنا وكان البرد قارص اصلا دي نهاية ديسمبر.

مرت الايام والغربة ياها الغربة ماف جديد بس بنخلق جونا فيها برضو وكل مرة نتذكر الاهل والشهر ونص العديناهم في السودان وبديت احن للرجعة وحتى سهيلة ودراماتا اشتقت ليها وكتبت كل الحصل معاي في السودان في مذكراتي الخاصة حقيقة ماكان في امل ارجع السودان قريب ، ابوي قرر ادرس الجامعة في الهند مع اخواني وانا ماكنت عايزة الفكرة دي ابدا خصوصا اخواني قربو يخلصو بس البقنع ابوي شنو
بدأنا في اجراءات الالتحاق بي جامعة بونا وكل مرة بجرجرو فينا ناس معهد الانجليزي طبعا لازمني اقرا لغة على الاقل سنة عشان اقدر اخش الجامعة وكان المعهد تابع للجامعه تقريبا ،سبحان الله عشان قلبي اباها ومادرتها رغم اني كانت امنيتي ازور الهند
لكن امي وابوي مصرين وانا ببكي ليل نهار وادعي مااسافر لو اسيب القراية ماعايزة اقرا هناك.
وكان امام برضو في صف امي وابوي عايزيني اقرا هناك ، 5 شهور ناس القنصلية الهندية في جدة يجرجرو فينا لحدة ماشهر 5 جا وانا حسمت كلامي مع ناس بيتنا انتو ضيعتو علي سنة هسة كان مشيت تانية جامعة وماحاسمح تضيع لي سنة تاني بسبب الهند.
زعلت وبكيت وضربت لي عمي الكان في جدة .
وكلمتو يساعدني في موضوعي ، قاللي انا افتكرتك انتي العايزة تمشي الهند.
وفعلا اتكلم مع ابوي كتير حتى ابوي بدا ينسى فكرة الهند
وعمي في السودان وعدني انو يساعدني عشان اخش احسن جامعة وبالضبط دا الحصل.
لمن فتح التقديم للجامعات عمي اوفى بوعدو بس واجهتني مشكلة تاني من ابوي ، قرر اني اقرا تخصث وامي قالت اقرا تخصص تاني وانا رغبتي زي امي ،
خلاص يئست قلت ليهم اي حاجة دخلوني المهم ماتضيع سنة ولمن عمي قدم لي لقى حتى الشواغر في صيدلة واسنان اتملت وقال لي في مقاعد في مختبرات
وافقت رغم انو كان عندي قول فيها، اتقبلت الحمدلله وبديت اجهز لي السفر قبل يوم 1/11/2010 اللي هو اول يوم دراسي في جامعتي.
ماتتخيلو كنت مبسوطة كيف وحتى امام كان مبسوط لي شديد وبدعي لي طوالي.

يتبع...