النفاثات في العقد

الجزء 77

الخميس 2 اغسطس 2014:
وصل ابوي السودان ماشي برجولو ودي اكبر كرامة
ابوي اتعالج بالرقية الشرعية وكان محافظ على قراءة سورة البقرة وهو زول ذاكر وصالح ربنا يحفظو.
باع ابوي قطع الاراضي واشترى لينا البيت زي ماوعدني وطلع بيتنا قريب لي للحي الفيهو بيت ناس رانيا.

________________________

الجمعة 28 نوفمبر 2014:

ظهرت نتيجة تشخيص اخوي ابو حسام وطلع مصاب بسرطان الكبد وانتشر المرض بصورة سريعة جدا ، كل انواع الكيماوي مااجدت نفع.

كلام شيخ حمزة في محلو ، السحر المشروب والمأكول لو مااتعالج احتمال كبير يسبب السرطان.
الله يشفيك ياخوي براك ابيت تسمع الكلام وتتم علاجك الكان بسيط ، عليك الله ماكان احسن من البشتنة والعلعلة دي.

________________________

الخميس 8 اكتوبر 2015:

الليلة يوم تخرجي ويم فرحتي وياما انتظرتو كتير اليوم دا ، بس اليوم دا ماحلو من غير رانيا الله يرحما
كنت متمنية اشوفا بين الجموع واطلعا ترقص معاي في الاستيج ، الحمدلله على كل حال.

_______________
الجمعة 13 نوفمبر 2015:

الساعة 7 صباحا:

حنين، حنين اصحي ان شاءالله البركة فينا وفيك
حنين: ابو حسام اتوفى؟؟؟؟
ابوي: الله يرحمو انتي الكلمك منو؟
حنين ببكاء: مافي زول كلمني انا حلمت يابوي ، حلمت قبل يومين باليوم الحيتوفى فيو اخوي ابو حسام.
بكيت وحزنت شديد على اخوي الله يرحمو،
اخوي اتوفى بسبب السرطان.
يمكن يكون السبب الاساسي للسرطان العندو السحر واحتمال برضو عوامل تانية.
بس صدقوني اخوي عانى كتير بسبب السحر الاكلو امورو كلها كانت معكسة ومشاكلو وهمو اكبر من عمرو الله يرحمو.

_______________

الثلاثاء 4 يناير 2016:

دخلت في حلقة تحفيظ القران في الجامع الجنبنا
وكانت بداية لاعادة تأهيل حياتي من جديد.

__________________

الاربعاء 20 ابريل 2016:

طلب مني امام المسجد اجي ادرس البنات في الخلوة الصيفية ، عشان قراءتي سليمة وبتمسك باحكام التجويد.
اخترت 3 ايام ماشغالة فيهم وبدأت تدريس الطالبات.
بعد خلصنا قراية قران اول درس اديتو ليهم كان في العقيدة اتكلمت ليهم عن السحر والزار المنتشرين عندنا ونحن بنحاول نطمس الحقيقة دي.
__________________

الخميس 27 مايو 2016:
لاقيت سهيلة في عرس ود اهلنا في البلد.
حنين: سهيلة؟؟؟ اصلو مابصدق..!
وين انتي يازولة سنين مالاقيتك الا اسمع بيك سمع.

سهيلة حكت لي انها اتعالجت عند شيخ في بلدا باصرار من زوجها وبقت على احسن حال الحمدلله وجابت ولد عسولي سمتو ملهم ، سبحان الله سهيلة حتى شكلها اتغير اول مرة اشوفا بالجمال والجيهة دي ، ماكتبت عن معاناتها الا بعد اخدتا موافقتها.

دي كانت قصة حنين، ومازالت بتعاني من قوى الشر والكوابيس المزعجة والاضطرابات النفسية.

لكن دقيقة لو...!

لو سهيلة ماكانت اتعالجت شنو كان ممكن يحصل؟
لو اتزوجت شيخ حمزة كان حياتي حتكون سعيدة ولا كئيبة؟

لو كنت بقيت ساحرة كم زول حيكون زي ابوي وكم زول كان حيكون زي امجد وكم زول كان ممكن يموت زي اخوي حسام بسبب السحر، كم وحدة حتكون مربوطة ومعقدة زي سهام وغيرا ، كم وكم من الناس كنت حأتسبب في بأسهم وشقاهم؟؟؟؟

واخيرا لو رانيا عايشة حتكون اول المتابعين للقصة واول المشجعين لي.

ملاحظة: كل الاسماء الواردة في القصة مستعارة
ماعدا ( امام - رانيا-حمزة-ايناس -اشرف)..

انتهت..