النفاثات في العقد

الجزء 46

حنين: انتي عرفتي الكلام دا كيف ؟ شغالة منجمة من وراي ؟ اعترفي.
رانيا: لا يا اختي عيب عليك، انا حاوريك القالت الكلام ، ايناس امس طلعت من علبها وكلمتني.
حنين: وانتي مصدقاها؟
رانيا: انا مابصدق الكهان لكن ايناس كلامها منطقي خصوصا لمن قالت ابوك قطع البحر واتحرك عليهو سحر قديم وهي مابتعرف ابوك ولاعارفاهو في السعودية كمان.

فعلا ايناس العرفا بأبوي شنو زي ماقالت رانيا ايناس مابتعرف عني حاجة، صراحة الشيطان لعب في راسي وصدقتها وانا بستغفر و زي مابقولو الغرقان بتعلق بي قشة.

حنين : طيب والحل شنو؟
رانيا: الحل عندك فكري..!
حنين: علاج ابوي عندك ولا عند ايناس يعني؟؟؟
بالمناسبة انا لو قبلت تعالجو ابوي كان انتي كان اختك ابوي ماحيقبل واحتمال يطردني من البيت كمان ، ابوي جنو وجن الفارغة.
رانيا: بس انا بستخدم العلاج الروحاني ف ماعندي تعامل بالشعوذة.
رانيا قدرت تقنعني وكلمت امي بس شيخ حمزة كان عندو رأي في علاج رانيا.
حنين: طيب هي قالت علاج روحاني بس.
حمزة: انا ماعارف كيفاش تعالج، لكن غالبا تنادي خدام السور من الجن..!
حنين: يعني؟؟
حمزة: يعني علاجها مشتبه فيه وانا من رأيي والدك محتاج لرقية شرعية.
حنين: طيب انت بتعالج بالرقية الشرعية اعمل في ابوي خير عليك الله.
حمزة: ياريت اقدر ، هاد الاسبوع مسافر الى اهلي في (.....)، لكن برسل واحد من الشباب المعايا يرقي والدك.

حنين : تكون ماقصرت وجزاك الله خير
بي قلبي كنت بقول ياريتك انت الحتعالج ابوي، لكن اهو كلو واحد اهم شي ابوي يطيب.
حمزة: ممكن سؤال؟
حنين: اتفضل يابو عائشة.
حمزة: كيف اتأكدتي ان والدك مسحور؟
حنين باضطراب: لا لا خمنت بس ، ومالو حتى لو ماعندو شي برضو القرآن شفاء امراض عضوية وروحية.
حمزة: حنين انا نعرفك مزيان، لاتكون هاضي رانيا قالت لك شي حاجة في الغيب.
حنين: اولا كلمني سوداني انا لهجتكم دي مابفهما وتاني شي رانيا مابتعلم الغيب.
حمزة: متأكدة؟
حنين باستهتار: لا مامتأكدة، اي طبعا متأكدة!

حاجة كنت بحبها في شيخ حمزة لمن يتكلم بي حزم او يتعصب بتكلم باللهجة المغربية، ولمن يتكلم سوداني بتكون طريقة كلامو حلوة حتى انا بحب احاكيهو دايما.

كلمت رانيا بكلام شيخ حمزة ، رانيا وافقت كان همها ابوي يبقى كويس بس.

يتبع...