النفاثات في العقد

الجزء 47

اتجهزنا في البيت على اساس الشيخ الجايبو حمزة يوصل الليلة بعد صلاة العشاء واخوي كمان غشانا من شغلو جاء يشوف ابوي، اتصلت علي رانيا وقالت لي افتحي الباب نحن تحت ، نزلت وكانت المفاجأه شيخ هو ال حيقرأ على ابوي.
طلب مني كم حاجة اجهزهم ليو ومنها موية وطشت في حالة لو استفرغ ابوي.
بدأ شيخ حمزة القراية وكان صوتو جميل وقرايتو بي تركيز.
ابوي ابتدت تظهر عليهو اعراض خفيفة زي رجفة وتجشؤ وتتريع وعرق ماطبيعي، استمر بالقراية لحدة ما ابوي نام وانا خفت يكون حصل ليو شي بس حمزة قال لينا ماتخافو خلوه ينام، ابوكي لو ربنا قدر نقرأ ليهو اكتر من 3 جلسات.
طلعنا من غرفة ابوي وبدأ يقرا لينا في الصالة وكان في اتنين من خالاتي وعمتي واخوي وانا وامي و رانيا.
قرأ الشيخ وقرأ ولمن وصل اية السحر كنت بسمع ابوي في الاوضة بهضرب بصوت عالي ومن هنا اخوي ابو حسام ملامحو اتغيرت ومسك بطنو ، دخلناهو الغرفة التانية وجبت الطشت فيو موية زي ماقال لي شيخ حمزة وبقى يستفرغ ويطلع اصوات غريبة واستمر الوضع قرابة ساعة ونحن يدينا في قلوبنا بقينا خايفين على اابوي واخوي، انا بصراحة غلبني وبقيت ابكي بصوت عالي لدرجة القاعدين افتكروني برضو كمان فيني شي ،شيخ حمزة لمن سمعني جاني برة وبقى يسأل فيني بي خوف ، طمنتو وقلت ليو انا ببكي عشان الحاصل مع ابوي واخوي ، ابتسم ابتسامة عمري ما انساها وقال لي هم في امس الحاجة لي دعاك والدعاء قد يرد الله به مصيبة عنكم.

مصيبة؟؟
ابتسامتك اكبر مصيبة.
وإمام؟؟
عليك الله ياراسي ماتقلب علي المواجع، كل ماجيت افرح تذكرني امام وتنكد علي، شكلك ناسي العملو في قلبي و مستمر تعاقب فيني الله ينكد عليك يا بلوة.

رانيا: ياسرحان عبدالبصير بتكلم مع انا الحيطة ولاشنو، بنادي فيك لي ساعة.
حنين: نعم نعم نعم ياخ انتو الواحد ماياخد مع نفسو دقيقة ولا كيف.
راني: هههاااااي شنو قلبك رجع يرفس ولا شنو؟، يلا وريني قاليك شنو؟
حنين: ماقال شي ،انا ماشة اشوف ابوي.

لقيت ابوي نايم والعرق خف منو ، لحقتني قريبتنا
قريبتنا: اها ابوك كيف؟
حنين: كويس احسن من قبيل.
قريبتنا بخباثة: والشيخ دا الجابو منو ؟
حنين : جابتو البت القاعدة برة ، دا ولد عمها
قريبتنا : و كان بنضم معاك شن بقوليك؟
حنين بضيق خلق: عايني ماتسأليني كتير ، عندك سؤال امشي اسألي البت ديك.

طلع شيخ حمزة بعد قراية الساعة ونص لي اخوي وقال لي امي انا لازم اواصل لي ابو حسام بكرة ان شاءالله.
طلعو هو ورانيا وقدمتهم للباب
شيخ حمزة: اخوك عندو سحر مأكول ولو ماطلعو كلو من بطنو ممكن يسبب مرض عضوي مثل السرطان اجاره واجارنا واجارك الله.
حنين: وانت ماطلعتو ليه؟
حمزة: اخوك استفرغ كتير اليوم وانا افضل العلاج تدريجي حتى لايتأذى اخوك.
حنين: بكرة يعني حتجي؟
حمزة: ان شاءالله.

طلعت اطمنت على اخوي الحمدلله بقى احسن وابوي كان نايم مستقر.
حنين: تفتكر منو المضر دا الممكن يعمل ليك سحر؟ متشاكل مع زول انت يااخوي؟
ابوحسام: والله يا اخيتي ماعارف، لكن انا شاكي في زول كان شغال معانا وطردتو بسبب غيابو المتكرر والله اعلم.
حنين: على قولك الله اعلم الزمن دا بقينا مابنعرف عدونا من صليحنا.

خالتي: الشيخ دا متزوج؟
حنين: ههههه عندك ليو عروس؟ اطمني متزوج وعندو بنوتة شبه القمرا.
خالتي: ربنا يجعلو من نصيبك.

شنووو؟؟!!!
معقول حركاتي مفضوحة للدرجة الخلت خالتي تلاحظ، لالا انا اصلا مااتكلمت معاو الا بس لمن طلب مني الطشت والموية.

حنين باستهتار: وليه قلتي كدا يعني؟
خالتي: احساس بس.
حنين: هههه تعيشي وتعيش احاسيسك ياخالتو، طيب حسي لي حانجح السنة دي ولا لا ههههه.
خالتي: ماتتبايخي وقومي اديني موية نحن ماشين بعدا.

قدمت ناس خالتي جزاهم الله خير ماقصرو معانا الليلة.
خلاص ياخالتو مها ابو حسام قال حيوصلكم ويوصل عمتي وقريبة ابوي.

طفينا الانوار وجيت رقدت مع ابوي في الاوضة، الحمدلله مطمنة عليك يابا ربنا يشفيك شفاءا لايغادر سقما ، نمت وانا بقرا الايات والادعية القالا لي شيخ حمزة.

يتبع...