النفاثات في العقد

الجزء 56

الخميس الموعود:
رانيا: طيب اتونسي معاي شوية عندي ليك شمار من امو.
حنين: شماراتك خليها لبعدين.
رانيا: انتي خلاص مخك دا استعوضي فيو ربنا.
حنين: ماعندك شغلة، يلا لي بعدين .
رانيا: ماتتأخري انا منتظراك، الليلة عازماني انتي.
حنين : ههههه اصلك مابتنسي.

*في غرفة ايناس*

ايناس دي بتتكلم مع منو؟ يمكن بالتلفون، اه نسيت هي ماعندها تلفون.
انتبهت ايناس لوجودي اخيرا ، لي عشرة دقايق واقفة في الباب.

ايناس: كان تدخلي وتقفلي الباب وراك.
حنين: شايفاك مشغولة.
ايناس: كنت باخد الاذن في شغل.
حنين: شغل شنو؟
ايناس: تعالي بس دا شغل مابتعرفي.
حنين: ماتقفلي الباب مكتومة من ريحة البلوة الحارقاها دي اففف.
ايناس: لازم اقفلو .

كان في كمية من المواد المحروقة مسببة دخان كثيف في الغرفة وريحتها تقلب البطن.
ايناس ختت جنبنا كمية اوراق وقلمين، ادتني واحد ومسكت هي واحد.
فتحت اكبر كتاب وبدأت توريني كل رقم ومعناه والاسم البحملو
ايناس: ختي قاعدة في راسك كل رقم يساوي حرف معين، ومابنشتغل بي الرقم واحد لانو معناه الواحد الاحد الفرد الصمد وربنا واحد.

والارقام من 2 الى 15 لو عايزين نرسل خادم معين بنكتب الاعداد البتساوي حروف اسمو حول الطلسم.
وبنكتب تحت الطلسم (الوحا العجل الساعة)
حنين: طيب والطلسم شنو؟
ايناس: الطلسم معناه الرمز والطلاسم عبارة عن رموز وارقام بتتكتب حول واحد من الخواتيم.

حنين: والخواتيم شنو؟
ايناس: اسهل مثال خاتم سليمان الرسمناهو قبل شوية.
حنين: اهااااا كدا يعني.
ايناس: ايوا .

**ملاحظة: الخادم المذكور في القصة مقصود بيهو الخادم من الجن سفلي او علوي كان**
علمتني ارسم كتير من الطلاسم والخواتم واطلعني على اسرار كتيرة من ضمنها اسماء ملوك الجن السبعة العلويين والسبعة السفليين وايامهم البكونو فيها واسم ملوك الكنوز وماكنت قايلة االدنيا دي غريبة كدا.

ايناس: دا كلو مامهم بالنسبة لي، الاهم كيف تاخدي الاذن عشان تقدري تحضري الجن من غير ماتتأذي.

حنين: والاذن بجيبو من منو وكيف؟
ايناس: عن طريق زول عندو معرفة بالتحضير.
حنين: الزول دا بتعرفيو؟
ايناس: ايوا خالي.
ايناس كانت معترفة بأنها ساحرة وكانت بتقول حيجي اليوم البسحر وبكتب وبعقد الناس، بس ماهسة.
ايناس حكت لي بي خالها وبي خبرتو في امور التحضير، وقالت هو العلما تتعامل بالسحر لما كانت قاعدة معاو عشان كدا امها قاطعتو وحرمت عليو يدخل بيتهم ومنعتا تمشي ليهم في بيتو.

حنين: وخالك دا وين؟
ايناس: ساكن في (....) ، ممكن نمشي ليو انا وانتي.

حنين: انتي مش مابتطلعي من البيت؟

ايناس: الا لي ضرورة،جيبي تلفونك، عايزة اتصل عليه.
شالت ايناس التلفون وطلعت ورقة شكلها كاتبة فيها الارقام.
اتصلت على خالها و زحت مني لي ركن الغرفة اتكلمت معاو مسافة وجات قعدت جنبي بتبشرني بموافقة خالها وكان مفروض نلاقيهو السبت القدامنا دا.

حنين: يلا نوسة انا لازم امشي وعلى فكرة معزومة معانا.

ايناس بحسرة: مافي طريقة.

حنين: ليه وراك شنو؟

ايناس بنظرة مخيفة: ماتتكلمي معاي زي مابتتكلمي مع باقي الخلق ، اتعلمي فرقي.

حنين: طيب طيب .! ، ماقلتي ليه مافي طريقة؟

ايناس: بتضايق من الجوطة والزحمة وبخاف من البشر.

ايوا ايناس بتتضايق من العالم الخارجي، اتأقلمت من 4 سنين على الوحدة والظلام والعالم الاخر.
رانيا قالت لي كانت اجتماعية وبتحب الناس وصلواتها مابتفرط فيها ومصحفا مابفارقا.
شفت غرفة ايناس القديمة البقت مخزن للكرور حاليا.
غرفتا الاولى فعلا بتعكس صدق كلام رانيا ايناس وحدة من ملايين الناس الاتجبرو يعملو حاجات ماعايزينها، وايناس قصة شاذة من بين القصص المرت علي.

حنين: خير يااختي نتقابل قريب ان شاءالله.

يتبع...