النفاثات في العقد

الجزء 06

تاني قاطع افكاري غيث قالي : ارح نجيب جرادل الطلس من ناس دار السلام.
فرحت شديد بالمشوار الصغير دا اخيييرا حاشوف البلد المافهمت ليها حاجة من وصولي لبست طرحتي ونزلت جري من السرير وامي تكورك لي : يابت تعالي ماشة وين؟ كلمتها وانا جارية : مع غيث لي ناس دار السلام ومشينا وانا وغيث بنتونس ونضحك لجدي ماوصلنا ، لقينا ناس خالتو دار السلام شادين رز بي لبن كرامة لي ود بتها القرصتو العقرب ،
دار السلام او دارللي زي مابقولو ليها جارة ناس خالتي في نفس الشارع مرة شقيانة ومكافحة وفي نفس الوكت البسمة مابتفارق وشها رحبت بينا : حبابكم ادخلو ، كيفنك يابت بدرية؟ لعلو ابوك شديد وطيب؟
رديت بالحمدلله ، وكان في صدري ضيقة كدا ماطبيعية وبالي مشغول وماقادرة اركز مشغول في شنو بالضبط وكنت سرحانة في شجرة النبق الجنب باب ناس داريللي.
شلنا الجرادل وملت لينا جردل بلاستيك رز بي لبن وطلعنا
فجأة انتبهت علي حاجة شدتني بي قوة من هدومي قلت بسم الله ، اتلفت لقيت تونكتي عالقة في طرف حديدة في زقاق حوشهم ، جريتا براحة ،غيث قعد يضحك طبعا هو زول بتاع درامات ونكت وخالتو دار السلام تشيل وتتبسمل وتقول : كر علي سحروك يابت بدرية ، ضحكت وقلت ليها : حصل خير ياخالتي ، ودعتنا وكلها ابتسامة .
طلعنا بي شارع المدرسة عشان نغشى دكان عم ود مسعود نشتري باسطة ،اصلو باسطتو من سنين معروفة وبصراحة انا اشتقت لي نكهتا في حلقي.
غشينا عم ود مسعود وسلمت عليو قاطعنا غيث : دي ماعرفتها منو؟
رد : ماعرفتها لكن فيها دم عيلة ناس فلان ،
بسسس ياعمي ياني زاتي وانا ابوي فلان ،
جاني عمو ود مسعود مارق برة وسلم علي سلام حار وقعد يتذكر في ابوي وعيادتو الكان فاتحة لي الناس الغلابة ودموعو نزلت وانا كمان غلبتني دموعي والذكرى الحلوة والناس الراحو واتذكرت حبوبة فاطمة الله يرحما وريدتا لي اولاد بدرية وكل حاجة حلوة لي اولاد بدرية ، دخل عمو وجاب لينا الباسطة وشيلنا صينية كاملة بتاعة باسطة وحلف من القروش وادانا صندوق بارد وكانو عارف انا من عشاق الببسي، شكرناهو وشلنا الحاجات ومشينا ، رجعنا بي نفس شارع المدرسة المضلم وانا شايلة الصينية في راسي وغيث شايل صندوق البارد وماشين ونتونس ، وغيث جاب سيرة سهيلة وقعد يتكلم عنها لكن بي كل خير ، قلت ليو : انا كمان حبيتا بت خدومة وهادية يدوب فيصل عرس،
فيصل كان متزوج وحدة قبل سهيل لاجمال لا اخلاق متصنعة ولئيمة و زي مابقولو عرستو بالكتابة .

يتبع...