النفاثات في العقد

الجزء 68

ايناس جابت تلفون عشان تتونس معاي وبقت ماسكة بي زمن طول اليوم بتضرب لي ومعاي في كل خطوة ووعدتني بعد العهد حنتواصل تاني بدون تلفون ونتونس مع بعض حتى لوكانت في امريكا من غير تلفون ولاوسيلة اتصال ، بقت توسوس لي زي الشيطان الرجيم وانا شاكة الشيطان زاتو بستعيذ بالله منها.

ايناس: الورق الجديد عندك وتبدي من الليلة تعملي المطلوب ولمدة تلاتة يوم ومهما يحصل معاك ماتخافي لو ظهر ليك عرش ابليس زاتو خليك ثابتة هي لحظات بس ولو اتخلعتي ولا خفتي يا اتجننتي يا اتلبسك.
حنين: اطمني انا بقيت شبه متعودة.
ايناس: الحمدلله تدريبي ليك مامشى في الهوا ساي ، لكن برضو ماتتخلعي ولاتظهري خوفك.
ياساتر شكلو الموضوع اكبر من جني بي راسين ولا وش حمار.
عملت كل القالتو ايناس بالحرف الواحد وعلى مدى التلاتة ايام وماظهرت لي اي حاجة مخيفة غير اني بحلم بكتب في كلام على فخارة قديمة حمدت ربنا الماظهرت لي حاجة خوفتني واكتر حاجة مطمناني اني لسة مستمرة بصلي ومافي اي اشكالية في الحتة دي حتى لمن نكون في بيت عبدالله او بيت ايناس بصلي عادي لمن يخش وكت الصلاة ، لكن هل صلواتي اتقبلت ولا ربنا راضي عني؟
لو مشيت لي عراف ساي صلاتك ماتتقبل 40 يوم فما بالك بالزول الحيبقى ساحر عابد شيطان..!

يتبع...