النفاثات في العقد

الجزء 55

7 مارس 2012:
نورتي ياامي البلد نورت
احسن حاجة عملتيها انك جيتي.
____________________________

ابوي شبه اتعافى من الالام وبقى يقدر يقعد بس المشي مابقدر ولابقدر يقيف حتى
ابوك ياحنين حس بي مرضو دا مامرض اطباء وصدق اخيرا وبقى يرقي نفسو بي نفسو ودا سبب شفاءو تدريجيا بإذن الله وفي فترة وجيزة.
--------------------------

حنين: اي شفتو نفس الراجل الظهر لي مرة في حلم قال لي مسافر معاكم،اعوذ بالله منو، بس المرة دي حلمت بيو على اطول ما زي المرة الفاتت كان طولو شبر من الارض.
ايناس: ماحيقدر يعمل ليك شي انتي بتتحصني كدا براو بطفش.

حنين: ممكن تديني الكتاب دا اقرا؟
ايناس : ممكن جدا.

شلت 3 كتب منها اقراهم وارجعهم
كتاب:
(****)، (***)، (******).
[حذفت اسماء الكتب حفاظا على عاشقين التجارب]

وكانت كتب قديمة مجلدة بالجلد والخيوط والورق مقدد من قدم الكتب.
احيانا الفضول بودي الواحد في مصيبة، ومن الفضول ماقتل بس بقت علي انا.
________________________

رانيا: لا انتي جنيتي،احذري تقريها او حتى تفتحيها، انا بكرة جاية اشيلهم منك.
حنين: رانيا ماتخليك عبيطة يعني شنو مجرد كتب انا عايزة اشوف الحاجات الغريبة المكتوبة جوة.
رانيا: ياخي افهميني ايناس اختي وانا بعرفا عايزة تجرك لي وكرها ماعايزة تكون براها في البتعمل فيو دا.
حنين: ايناس مااجبرتني اشيلهم انا الشلتهم.
رانيا: هي لو ماقارية افكارك وعارفاك بريئة مابتتعلق فيك كدا، السفلي الفيها عايز يجر الناس عشان تقع في براثنو ونجاستو ، احذري والله انا خايفة عليك.
حنين: كويس بس دي كتب عادية مااعتقد حتعمل لي حاجة.
________________________

فتحت الكتاب الاول وكان مابتقري كلام داخل في بعض واشكال مرسومة واعداد وطلاسم ماانزل الله بها من سلطان ، فتحت التاني كان اخف قدرا من الكتاب الكبير.
قلبي كان بقول لي ماتقري ولاحرف اقفليها.
ودا الحصل قفلت الكتب ودخلتها في شنطة وعلى الدولاب طوالي.
الشيطان حاول يلعب لي بي راسي اعمل وحدة من التجارب عشان اصدق بس كان في حاجة بترجع لي مخي الاتلحس فجاة دا.
____________________________

رانيا: جاية اشيل الكتب.
حنين: حامشي معاك اوصلها لي اختك.
___________________________

ايناس: يعني انتي ماقريتيها؟
حنين:لا
ايناس: رانيا منعتك
حنين: انا براي خليتهم.

نظرت فيني نظرة مافهمتها وكان ليها طلب تاني

ايناس: انتي بتعلبي معاي؟ شكلك مفكراني زي رانيا اختي.
حنين: يااختي اي صح انا شلت الكتب واتراجعت من قرايتا.
ايناس: السبب؟
حنين: مافهمت فيها حاجة.
ايناس: مستعدة افهمك الكتب دي والكتب العندي تعالي لي يوم الخميس الصباح.
حنين: اتفقنا.

شفت ابتسامة خبث في وشها المخيف وكأنها بتقولي مرحب بيك في عالم السحرة.
قبل مااطلع من عندها جات حضنتني ودي كانت اول مرة ايناس تسلم علي بالحضن، اتلبشت وافتكرتها حتغدرني لكن كان مجرد وداع واكيد عندها راي في الحضن دا.
_______________________

ركبت مع رانيا عشان توصلني وكان ظاهر عليها متعصبة.
رانيا: نوسة كانت بتقوليك في شنو ؟

طبعا محرم علي رانيا الدخول لمن ايناس تكون بتتكلم معاي.
حنين: ولاشي
رانيا: حنين انا بعرفك كويس عشان كدا ماتحاولي تدسي مني.
حنين: رجعت ليها الكتب زي ماقلتي لي.

رانيا اظهرت ارتياحها لكلامي وكان هم وانزاح منها.

رانيا: كويس بتسمعي كلامي ، بس انتبهي من تعاملك مع ايناس.
حنين: بالمناسبة يعني عندي زيارة تاني لي اختك
رانيا: شنو؟؟؟
حنين: زي ماسمعتي.
رانيا: والله يااختي انا حذرتك وعملت العلي وبعدا انتي حرة في اتخاذ قرارك ،ولوحصل ليك اي شي انا ماحاسامحك ، ايناس اختي وانا بعرفا عايزة تجرك لي طريقها زي ماحاولت معاي بس انا ماكنت زيك بسمع كلامها.

عن نفسي الفضول كان بياكل فيني وايناس قرت افكاري زي ماقالت اختها وقدرت تستغل نقطة ضعفي واظهرت لي الخير وانها بتريدني وصاحبتني ودا كلو عشان عندها كلام في راسا عايزة تنفذو او بالاصح الشيطان العندها عايز ينفذو.

___________________________

يعني خلاص مسافر بعد بكرة؟
حمزة: ان شاءالله.
حنين: حترجع متين؟
حمزة: بعد ذي الحجة ان شاءالله.
حنين: مرتك حتجي معاك تاني؟
حمزة: اذا طالت مدتي راها تلحقني.
حنين باستياء: ايوا لا كويس الله يديم المحبة، عموما بالسلامة ان شاءالله.
حمزة: حنين..! خديجة زوجتي وماش داعي لهاد الكلام.

حنين: ولما هي زوجتك بتفتش للتانية ليه؟

كلامي دا كان زي صدمة عليهو ماقدر يرد واكتفى بالصلاة على الرسول صلى الله عليه وسلم دليل على كلامي ماعجبو

حنين :على فكرة انا بحبها ومقدراها وليها كل الاحترام ولا في يوم بفكر اعكر حياتها
.
حمزة: شنو تقصدي؟؟
حنين: بعد ترجع انا بوريك قاصدة شنو يابو عائشة.

شيخ حمزة كان ذكي جدا وبفهم الحاجة البلمح ليها.

يتبع...