النفاثات في العقد

الجزء 25

سافرنا انا وامي .
ايوا انا وامي ابوي كان رافض الداخليات دي خالص ، يمكن عشان بسمع الناس بتكلمو عن الداخليات وحكم من غير مايشوف.

نزلنا السودان واستأجرنا شقة في حي قريب للجامعة.
ونزلت اول محاضرة وكانت لغة عربية والدكتورة ماادتنا حاجة بس اتعرفت بينا
كانت المدرجات تعج بالطلبة والطالبات وابتدأنا نخش في بعض واتعرفت على نهاد وامل وديل كانو صحباتي الاوائل بقينا نطلع وننزل ونفطر سوا ، مااخبي عليكم كتير من الاولاد حاولو يتقربو لي خصوصا سنايري ، وانا لاحلوة ولا النوع البقشر
بالعكس كنت عادية جدا وبسيطة في اي حاجة وبحب اخش في الناس ودا يمكن الخلا الاولاد يحاولو يتقربو لي افتكروني النوع الساهل داك.

مرت الايام والشهور وكنا بنمشي البلد في المناسبات والاعياد ونتلمة كل مرة ، وكنت حالفة ماارجع السعودية تاني..!
بس في حاجة غريبة حاصلة بيني وبين امام.

امام ماعاد زي زمان بصادف اسبوع مايسأل عني وحتى في المسنجر والفيس مامتواجد كتير ، بس بضطر انا اسال عنو بقول حكم شغلو والبلد ديك مافيها يمة ارحميني.
لكن برضو في حاجة غريبة في كلامو معاي بقى يحاول يختصر المكالمات
وين ضحكو؟ وين هزلو ؟ وين مكاواتو لي؟
بقيت لمن اتكلم معاو بحس نفسي بتكلم مع زول غريب مابعرفو حتى بقيت اخجل اقوليو بيبي وحبيبي وروحي ولا حتى إمامي الاسم البحبو مني بقيت مابعرف اناديو بيو ، امي كمان حست بي تغييرو تجاهي.

مرت ايام كتيرة وإمام لسة متغير وكل مرة بزيد غيابو ، بقيت اتمنى لو يكلمني من اسبوع لي لي اسبوع بس على الاقل اسمع صوتو ، كتير بكيت وكتير حردت الاكل وامي كانت سندي ودعمي الاول ، كانت بتريد امام زي ولدا عشان كان جادي وما زول لعب.

وتمر الايام وامام متغير حاولت اسالو مالو لكن مالقيت جواب .
قربت السنة تنتهي وانا بصراحة خاشة على امتحانات ومافي داعي لأي جوطة راس بلا إمام بلا نفسيات الله يقطع اليوم العرفتك فيو، ماحسال فيو نهائي الا يرجع يضرب هو براو قلتها وانا مغبونة وجوة قلبي مليان.

فعلا قويت قلبي وبقيت خاتة اعصابي في تلاجة وكان لي صديقة ولسة هي صديقتي بس فرقتنا الايام.

تبيان هي صديقتي الاوفي بين صديقاتي الصاحبتهم ، صاحبتها من اولى كانت دنيتنا حلوة نبرمج ونطلع واي بلوة ومصيبة نحن عاملينها ونضحك ومبسوطين الوكت كلو وطز في امام وفي اي راجل.

يتبع...