النفاثات في العقد

الجزء 21

يابت حنين اصحي بعدا..!

حنين :امي خليني ارقد حبة مصدعة
امي : دا السهر والربربة في التلفون لي انصاص الليالي قووومي ساعدي بنات خالتك في النظافة انا وسميرة مارقين.

يالييييل دا شنو الهم دا غايتو امي دي دايما بتختني في مواقف ماليها داعي.
حنين: طيب يا امي لكن ماشين وين؟
امي: الليلة يومية مرة فيصل
حنين: شنووو؟ لا ماتمشي دا كلام فاضي وكلو بسبب المرة الدجالة الاسمها عواطف حراااام ياامي حرام ماتمشو خليها هي بي ظروفا
امي : انا ماشة مع خالتك سميرة قالت ماشة اخليها تمش كيف براها؟
حنين: والله انتو احرار بعدا انا برأت ذمتي قدام ربنا وريتكم الحاجة دي وراها بلاوي.

مرقت امي ومعاها خالتي سميرة وقمت انا اتسوكت وصليت ونظفنا البيت وفتحنا التلفزيون بنتفرج على فلم اجنبي.

رنة تلفوني وكان المتصل امام:

حنين: هلا بالحب
امام : صباحك حب ، اها في طريقة تطلعي هسة؟

حنين: هسة ما....
قاطعني امام : بطلي مواسيرك واطلعي ان شاءالله بسفنجة شيلي الكتاب وارجعي انا منتظرك جنب (....)

حنين: طيب..
لبست توب خالتي وسقت معاي كنو بت خالتي وانا مخزولة من منظري الطلعت بيو بس اول ماشفت امام وهدوم البيت اللابسا العقدة فكت وبقيت اضحك على منظرو ،
حنين :مالك مبشتن كدا؟
امام : زي ماانتي معشكبة ههههه ، بالمناسبة انا مسافر الخرطوم بعد شوية ومسافر ابوظبي بكرة ان شاءالله.
حنين: توصل بالسلامة وخلي بالك من نفسك شديد ، الحيوصلك منو الخرطوم؟
امام : براي بي عربيتي.

امام كان ود راحات اتولد في مصر وعاش هناك واهلو ناس اجاويد وخيرهم طافح واهل خير دا غير امو الاتوفت وخلت ليهو حاجات كتيرة في مصر وكمان هو شغلو ماهين في الامارات
اتولى منصب كويس في الشركة الهو فيها وعمرو مااتجاوز الثلاثين سنة ومع دا كلو امام كان متواضع جدا وبحب السودان والقرية البسيطة.

حنين: سوق براحة وتيك كير شديد في السواقة ،لا اله الا الله محمدرسول الله.
قلتها وانا مودعة ليو وكأنو ماحنتلاقى تاني للابد.

اداني كيس كان فيو عطر هدية ومسبحة وكتاب والكتاب كان اسمو ( التوابع والزوابع )
وصلنا البيت لقينا نعمة جهزت الفطور وكانت بتلبس!

كنو: ماشة وين قاشرة كدا؟

نعمة : ماشة دق الظار..!

كنو : ياخي انتو ناس ماجادين والله ظار شنو وشواطين شنو

حنين: خليها عليك الله ياكنو كلهم جاهلين
نعمة مرقت ولااشتغلت بي كلامنا

لمينا العدة وغسلناها وبخرنا البيت وقعدت اقرا الكتاب بي مزاج وقريت فيهو كم فصل لمن عيني شالا النوم ، الجو كان هادئ ومشجع لي نومة بعد الفطور .

يتبع...