النفاثات في العقد

الجزء 31

شلت شنطتي الاتوسخت من المصطبة نفضتها ومشيت لي رانية.
اتوجهنا لي نفس المكان الاتلاقينا فيو اول مرة ، واخدنا وادينا في الحكاوي وتلقائيا خكيت ليها الحصل من ايمان.

رانية : اقطع يدي من هنا لو ماكانت البت دي بتحب في حبيب صحبتا.
حنين: انا كمان قلت كدا.

السلام عليكم.!!

وعليكم السلام اتفضل..!!!

معليش ماقدرش نجلسو..!
رانية : طيب سلم على صحبتي.
الشاب: السلام عليكم كيف حالك؟
حنين : وعليكم السلام الحمدلله.
مشى الشاب للكاشير طلب حاجتو وجرة الكرسي بعيد مننا وقعد يتكلم مع رانية.

رانية: دا حمزة ولد عمي ماتخافي ماحيقعد معانا شايل اكلو وماشي.
حنين مضايقة: اتشرفنا.

رانية وحمزة ولد عمها كانو بتكلمو كلام دقاقة ماواضح وانا كمان ماركزت معاهم ، كنت مركزة في ايمان والممكن تكون عملتو ، اانتبهت الا على صوت الراجل بقول لي رانية مع السلامة.

رانية : طبعا قلت ليك دا الولد الوحيد لي عمي نصر وعايش في المغرب مع مرتو وبتو،و عمي الله يرحمو زاتو كان عايش هناك ومتزوج مغربية اللي هي ام حمزة دا.

ماشاءالله قلتها وانا تفكيري كلو مع البت الاسمها قشار ايمان دي.
طلبت رانيا الغدا وكنت باكل من غير نفس لكن عشلن اطيب خاطرا.

اقترحت رانية نمشي شارع النيل نشرب جبنة وافقت طوالي، اشتقت للقعدة جنب النيل اصلو النيل ياما شال ريحة حبايب واثكل امهات علي اولادن وبناتن وممكن كمان اكون انا واحدة من الشالم النيل في يوم.

وصلنا شارع النيل والجو كان سخن والموية مطلعة بوخ يململ الزول ..

حنين: رانية انتي قلتي عايزة تلاقيني ضروري ولي هسة ماشايفة انك قلتي حاجة ولاوريتيني سبب لقاءنا.
رانية: لو قلت ليك نطلع نتفسح ساي كنتي حتعترضي وتتحججي لي بالامتحانات ، حبيت اغير ليك جو ،الامتحانات عايزة نفسية مرتاحة وبعدين ياستي ماتنسي انا اشتقت ليك وانا ماصدقت اتعرف لي على صديقة.

حنين: تمام يازولة انا سعيدة بي صداقتك..

اخدنا وادينا في الونسة وحكت لي بالكبت الهي عايشة فيهو
رانية : عارفة ياحنين امي خوفتنا من الناس كتير وكرهتنا في اهل ابوي وكانت دايما بتتهم اهل ابوي بالتخلف والهمجية وماحصل خلتنا مشينا البلد لاهلنا رغم انهم بحبونا ولمن ابوي الله يرحمو يمشي ليهم بشيلوهو ماتشتهي الانفس من الفواكه والخضروات والبهايم ، بس لمن بجونا امي الله يهديها بتتعامل معاهم بالصورة الهمجية الهي بتتهمهم بيها لدرجة انها بتطلع تخلي ليهم البيت .

حنين: واهلها بتخليكم تمشو ليهم؟
رانية : اهلها !؟ هههههههه ، اهلها كل واحد بكره التاني ومابجونا الا من سنة لي سنة حتى حبوبتي مابتزورنا ولا بتعرفنا حيين ولاميتين.

سبحان الله يارانية تاريك انتي ماكعبة بس امك الله يهديها الكانت زارعة ليكم فكرة كراهية الناس من دون سبب.

حنين: وامك واخواتك وانتي كيف علاقتكم مع بعض؟؟

رانية : امي بس بتدينا القروش وتمنعنا من مخالطة الناس غير كدا ولابتعرف عننا اي حاجة تاني.
اما اختي الكبيرة سافرت من زمان لندن وعايشة هناك مع خال امي.
حنين: واختك القبلك وين؟

وجمت رانيا وشكلها ماحابة تحكي عن اختها ايناس واكتفت بقول الله يهديها.

لطفت الجو بي مزحة صغيرة واستأذنتها امشي الشمس قربت تغيب.
وصلتني رانية البيت وغصبتها تنزل تسلم على امي ، امي حبت رانية ومااتوقعتها تكون دي هي الكانت بتتلائم معاي ، ودعتنا رانية وفاتت رغم اصرار امي على شاي المغرب.

يتبع...