رانيا: اموت واعرف بتقعدي المدة دي كلها مع ايناس بتسوي شنو.
حنين: قاعدين نحب في بعض اها كدا ارتحتي؟
رانيا: انا جادة.
حنين: موضوع، عندي معاها موضووووع انتي مالك مابتفهمي.
رانيا: وقادرة تستحملي تقعدي كيف في الضلمة دي ياخ انا لو دخلت دقيقة بحس كرعي ماشايليني.
حنين: واقوليك حاجة العفاريت بجوني وبسلمو علي وبقدمو لي العصير كمان هههههه.
رانيا: لقيتك مستظرفة شديد.
حنين: من يومي يامزة.
حنين: لزي لي المينيو دي عليك الله خلينا نطفح.طلبنا الاتنين بيتزا ياسلاااام دي اكلتي المفضلة.
حنين: خفي على بطنك دي شوية ياشيخة مابعيد تقبلي تاكليني انا كمان هههه.
رانيا: وانتي فيك شنو بتأكل كلك عضام.
حنين: كلك زوق وزفت ، عايني الولد القاعد في الطربيزة الوراك علي اليمين.
رانيا: وينو ؟
حنين: ماتتلفتي ياخ ، براحة مابسوها كدا كشفتي حالنا.
رانيا: اها اختصري مالو عمل شنو؟
حنين: مركز معانا.
رانيا: يلا انتي ماتركزي معاو عشان هو مايركز معانا.
حنين: انقلعي بس دا كان الناقصنا ، عايني مشينا بعدا.طلعنا من المطعم وونسة على الاخر.
لوسمحتي يااخت..!
حنين ورانيا بصوت واحد: نعم؟؟الولد: شفتك وعجبتيني ومن قبيل قلت اجي اتعرف عليك ، ماشاءالله ربنا يحفظك.
حنين: عاين لو سمحت مافاضيين.
الولد: وانتي الاتكلم معاك منو انا بتكلم مع الدامة دي.
حنين: امشي ياطيرة اتعرف على اشكالك ،الدامة دي ضفرها البطيرو المقص انت مابتسواه يلا امشي من هنا.
__________________في عربية رانيا :
ههههههههههههههه واي يابطني ..حنين بغيظة: لا وريني حاجة مضحكة في الموضوع.
رانيا: بس عجبتيني والله عرفتي رديتي ليو.
حنين: يلا اتحركي عليك الله خلينا نصل سريع..
في البيت:ماما اصحي جبت ليك شاورما زي ماطلبتي.
امي: انتي يايمة تتباركي.
حنين: بالعافية عليك .
امي: لقيتي مواصلات؟
حنين: وصلتني رانيا.
امي: يابتي رانيا دي كترتي عليها.
حنين: بالعكس هي البتصر علي دايما نطلع سوا .
امي: بت اصيلة والله ، اها امها مارجعت؟
حنين: بري بتها قالت مامنها خبر وماعارفاها اصلا سافرت وين.
امي: عليك الله دي مرة عاقلة تهمل بنات زي ديل كدا.
حنين: ربنا يردها ليهم سالمة.
امي فجأة: انتي وين شيخ حمزة؟
حنين: سافر زمااان ، وب علي ياامي ماشفتي مرتو قالت لي شنو.
حكيت لي امي وكانت ردة فعلها عادية، اتوقعتها حتقول لي خليو ولا انسيو.امي: ماتشتغلي بي كلاما.
حنين: انتي لو شفتيها بكت كيف .
امي: قلت ليك ماتشتغلي بيها.حنين:طيب ، كدي خلينا منهم اها ماكلمتك.
امي: بشنو؟
حنين: لقيت لي شغل مع ود عمتي وقال بديني قروش كويسة.
امي: شغل شنو انتي اتهبلتي ولا شنو.
حنين: ليه ياامي احسن من مانفتشا عند الناس.
امي: تفي من خشمك كلامك الفارغ دا ، ابوك اداني نص قروشو الفي البنك عشان نعيش بيها.
نزلت دمعتي وفي خاطري الحزن ، حتى وانت عيان يابوي استكترت علي نفسك قروشك وشقاك.
حتى انتي ياامي ماقدرتي تمسكي دموعك الله يجبر بخاطرنا ونرجع نشوف ابوي احسن من الاول.حنين: امي؟
امي: ايوا ياماما.
حنين: تفتكري بابا حيقدر يمشي تاني؟
امي: ان شاءالله برحمة رب العالمين.
حنين: انا لسة مامستوعبة الحصل لي ابوي.امي: ربنا كريم عليهو.
حنين: امي..!
امي: اي ماما.
حنين: لسة بتحبي ابوي؟
امي: اكيد حبيبتي.
حنين: يعني الحب دا ماانتهى مع الزمن؟
امي: ياماما ، انتي لو حبيتي الراجل البستاهلك حبك ليو مابنقص مع الزمن بالعكس بزيد بغض النظر عن الخلافات البتحصل بين الزوجين.
حنين: يعني لازم اعرس الزول البحبو؟
امي: ما لازم ، الحب بجي من الالفة والمودة بين الزوجين.
حنين: امي؟
امي: نعم امي.
حنين: القروش الجبتيها دي رايك شنو نعمل منها مشروع صغير يغطي لينا مصاريفنا لحدة ما بابا يبقى كويس؟
امي: ولو دخلناها هسة اجيب مصاريف من وين تاني.
حنين: اشتغل انا.
امي: قومي من وشي ، بكرة وراك جامعة.
حنين: امي بكرة الجمعة بسم الله.
امي: لاحول ولاقوة الا بالله بقيت مابعرف الايام، ذكرتيني بكرة اعمامك وعماتك جايين يفطرو معانا ، امشي طلعي العدة غسليها.
حنين: حاضر.
يتبع....
أنت تقرأ
النفاثات في العقد
Horror📝 بقلم: حنين الروح رواية سودانية تتحدث عن السحر و التعامل مع العالم الآخر