النفاثات في العقد

الجزء 40

حنين.. اصحي بعدا عشان تمشي معاي السوق ..!

حنين: سوق شنو الظهر ياامي، خلي بالليل.
امي: بالليل حنستف الشنط ولانسيتي.

يالطيف سفرنا بعد بكرة وانا ناسية .. لازم احكي لي رانيا الليلة عشان ألحق قبل مااسافر.
رفعت التلفون عشان اتصل لي رانيا لقيتا متصلة علي ، رجعت ليها وحكيت ليها بأي حاجة من طقطق للسلام عليكم على امل تسأل ود عمها.
طلعنا السوق انا وامي ورجعنا محملين بالاكياس والكرور.

رانيا اتصلت علي العصر عشان تكلمني بموافقة ود عمها بي علاج سهيلة بس واجهتنا مشكلة.
سهيلة ماكانت في الخرطوم ومافي طريقة تاني الا لمن ارجع من السعودية واحتمال القى شيخ حمزة رجع المغرب.

جونا الناس عشان يودعونا اصلها امي قالت ليهم نحن مسافرين بكرة عشان يوم بكرة دا نرتاح فيو ونصحى نسافر بي مزاج.

الساعة 9 ونص الباب دق:

امي: اجي دا منو؟
امشي افتحي اباب.

نعععمة حبيبتي اتفضلو ياخالتو صافية والله مشتاقة ليكم.
صافية: قلنا وداع التلفون ماوداع قطعنا تزاكر وجينا نودعكم بالصح.

ناس خالتي صافية جونا من البلد يودعونا ، دخلنا انا ونعمة وغيث المطبخ نجهز العشاء.
حنين: عليكم الله كيف البلد طولنا منها من عيد الضحية ماشفتها تاني.
غيث: البلد تمام بس فاقداكم.
حنين: وناس اميمة وبطة والجيران كلهم كيف؟
نعمة : كويسين واميمة كانت جاية معانا لكن ولدا عيان.

غيث: مزاهر مرة حسن بتسلم عليك وجاية من بورسودان تصوم رمضان معانا وقالت ليك جيبي ليها تلفون من السعودية.
حنين: هههه ان شاءالله ، المرة الفاتت وصتني عباية ونسيت اجيبا ليها.
الا قولو لي سهيلة جاية الخرطوم متين؟
نعمة : بري ماعارفين عنها اي شي المخلوقة دي.
حنين: حاصل شنو..!؟
نعمة : بري مابعرف.
غيث: نعمة مابتوريك بتخاف ، يازولة سهيلة دي بقت مجنونة رسمي وبقت تعمل حاجات غريبة.
حنين: زي شنو؟
غيث: ماعارفين.
حنين: يللا ماعلينا ، انا بصراحة كنت عايزة اساعدا لكن شكلها هي المارضة روحا.

رصينا العشاء وكانت نفسي مسدودة يمكن عشان دخلت نفسي في حتة ضيقة مع رانيا وشيخ حمزة ، ياح انا دايما متسرعة ماكان احكي ليها .

صافية : البنو سرحتي بي غنم ابليس خلاص. اكلي يامعصعصة.
نمت وحلمت بي شيخ حمزة بتكلم معاي بقول لي مسافر معاك مكة وفجأة ظهر بطول شبر قال لي مسافر معاكم.
صحيت وماقادرة احرك يد ولارجل ولاحتى اكورك لي نعمة الراقدة جنبي الاقريت اية الكرسي حتى قدرت اتحرر ، عرفتو دا الجاثوم او شلل النوم بس وش الراجل كان مخيف الله ينعلو.

حكيت لي رانيا بالحلم وقالت لي فعلا حمزة مسافر يصوم رمضان في مكة وامو ومرتو وبتو حيجوهو بهناك.

يتبع...