النفاثات في العقد

الجزء 76

سافرت حنين مع امها السعودية وبرضو مالقت الراحة الهي بتفتش ليها.
قررت حنين تبدأ حياة جديدة واجتهدت عشان تتخلص من باقي نجاسة الشيطان وكان بساعدها شيخ حمزة بوريها تعمل شنو ودرسا امور دينها كلها ، حقا انا ممتنة لك.
عانت حنين عشان تتجاوز المرحلة الصعبة دي وفعلا اتجاوزت جزء كبير من الصعوبات.

______________________

رجعت السودان بعد اصرار من امي وابوي عشان ارحع اقرا واستمر في جامعتي.
كونت صداقات سطحية جديدة عشان بالرغم من انهم ماحيبقو لي زي رانيا ولا حألقى وحدة زيها ابدا.
مضى شهر ونص من الدراسة الحمدلله وبقيت طبيعية جدا بعدما فقدت الامل ودي نعمة من ربنا، حتى رجعت اضحك واهظر زي زمان بس لسة كنت بحس قوة الشر قاعدة فيني ، بقيت بفهم الناس وبعرف البقولو وراي وبعرف اي زول بخطط لشنو وكأنو في زول بكلمني.
شيخ حمزة بعد عالجني انقطعت اخبارو عني وايناس اختفت مابعرف مشت وين بس شيخ حمزة اكد لي انها سافرت مامعروف وين ، وامهم من سفرتا ديك مارجعت ومااتعرف ليها مكان ، اما امام فقال لي شيخ حمزة ساق مرتو وسافر مصر يعيش هناك مع اهل امو ، وعبدالله خال ايناس ورانيا لسة مازال بيعمل في البعمل فيو ومامعروف كم زول تاني وراي حصل ليو نفس الحصل لي وكم زول بقى ساحر على يدو ، اما حنين فحياتها كانت بتعكر صفوها حاجات كتيرة وحاجات كتيرة بتخليها سعيدة.

_______________________

حاول يتقرب لي ود اهلي وكلم امي بس هو كان لسة طالب في كلية الشرطة وعشت معاو علاقة حب ، او بالاصح حب من طرف واحد، من طرفو هو بس.
علاقتنا كانت 7 شهور ونهيتا بمشكلة بسيطة .

مازن: ليه ياحنين انا عملت ليك شنو؟
حنين: انتو اولاد ادم كلكم طينة وعجينة وحدة.
مازن: انا والله ماعايز غيرك ولا قادر اتخيل حياتي من غيرك.
حنين: كلكم بتقولو كدا خلاص يامازن انا ماعايزاك.
مازن: طيب وريني سبب.
حنين : ماف سبب كدا بس مزاج انتهينا.

صاح انا ندمانة على العملتو مع مازن وكان مفروض من البداية اقنعو بأنو مابنفع نحب بعض بدل البهدلة البهدلتها ليو ، لكن في حاجة جواي كانت بتقول لي انتقمي من الناس كلهم.
يمكن دا جزء من العقاب الاتعاقبتو او يمكن مرض نفسي بسبب الحصل لي

يتبع...