النفاثات في العقد

الجزء 70

في اليوم التاني رجعت لي ايناس وكلمتها وتاني رددت لي ماتخافي مهما تشوفي ماتخافي واوعك ثم اوعك تتخلعي تصرخي.
واهم شي لو ظهر ليك زول اتكلم معاك قولي ليو انا عايزة عهد (****) ، تاني بظهر ليك 3 مرات قولي ليو عايزة عهد(****).
دا في حال ظهر ليك ولو ماظهر ليك في الطريقة الاخيرة وتاخدي العهد وبعداك تاني يبقى ماعندك شي غير امتلاك الخدام بعد الفترة المقررة عليك.

مضت 4 ايام ماجاني اي شي غير اني كنت منهمكة في القراية بجدية ورانيا على تواصل دايم معاي وبقيت مابحكي ليها عن البعمل فيو.
واموري ماشة تمام ومافي مايعكر مزاجي الا سيرة الامتحانات.

رانيا: شدي حيلك عشان تتخرجي سريع وتجي تحضري ماستر في المانيا وانا متكفلة بدراستك ياحنين.

حنين: ان شاءالله بس دعواتك ياقلبي ، الا بالمناسبة ماغيرتي رأيك من القانون؟
رانيا:القانون التخصص المحبب لي قلبي عايزة ابقى زي عمي نصر الله يرحمو.
حنين: خلاص ننتظرك محامية كبيرة آآآآآد الدنيا ، يلا ناس قروبي قربو يدخلو اللاب بعدين نكمل باي.
------------------

الاحد 29 ابريل 2012:

الساعة 2 ظهر

عبدالله: قولي وراي الكلام دا وماتتراجعي مهما حصل ، عشان تنتهي بي سلام وكل خدام السفلي تحت طاعتك.

يلا رددي :
(****************************).
ملاحظة: الكلمات محذوفة.

رددت ورا المشعوذ بلا توقف لمدة يمكن تكون زادت عن 10 دقايق.
بعدها بقى يتمتم ويهمهم براو ويهز راسو بالايجاب كانو في زول بقوليو في كلام.

عبدالله: (****) مبسوط منك، هنيالك والله.

خلاص بعدا امشي مع ايناس عندك حاجة لازم تسويها ولو ماسويتيها كل العملتيو دا يذهب هباءا منثورا وحتتبهدلي وتبهدلينا معاك.

حنين: عارفة حتشربوني الدم تاني ، اصلا اتعودت.
عبدالله: امشي مع ايناس حتوريك تعملي شنو.

مشيت مع ايناس بيتها زي ماقال لي وعبدالله خالها دايما كان بخلي المهمات الصعبة ليها عشان عارف قسوتا وقوة شخصيتا.
جابت السجادة وفرشتا.
ايناس: صلي.
حنين: اصلي شنو.
ايناس: ركعتين.
حنين: طيب خليني اتوضا.
ايناس: تتوضي شنو صلي ساي.
حنين: في زول بصلي بدون وضوء؟
ايناس: وخلي بالك حتصلي مدية ظهرك القبلة يااستاذة.

حنين: شنووووو ،انا اصلي عكس اتجاه القبلة؟
ايناس: ماتحاوري كتير وتعالي اقيفي.
سحبتني ايناس بكل قوتا وكانت بتهدد وتتوعد لو ماعملت القالتو لي.
وانا كنت ببكي وبترجاها تخليني في حالي .

حنين: ياخ فكيني فكيني ماعايزة اعمل كدا.
ايناس: لا حتعملي البقولو ليك بالحرف الواحد.
لمن مارضخت لأوامرا اضطرت تستخدم معاي اسلوب تاني وبقت تكفت فيني بكل ما اوتيت من قوة لمن رعفت وكانت متعصبة ومصرة توقفني عكس القبلة واجبرتني بقوتها على السجود .

ايناس: الليلة ماتطلعي من هنا الا وانتي كافرة زيي وزي خالي ، اسجدي ليو زي ماسجدت انا ، اتدمري زي ما ادمرت انا ، ليه انا تظلموني ليه انا توسخو فايلي مع ربي الخلقني وخلقك وخلق (****).
حنين: حلفتك برب السماوات والارض تخليني في حالي انا ماعايزة اكون زيكم.
ايناس بانفعال: لا حتبقي زينا مش دا العايزة انتي ، مش دا العايزة تتعلمي يلا اتشوي بي نارو .

انا الليلة حأموت على يد ايناس اللي كل مااتكلم بتديني كف وتجرني من شعري ، ايناس طبعها قاسي مابتعرف الرحمة ولا بتهمها الدموع ولا الصريخ ، حاولت اتحرر منها لكن وين الليلة تدوسني بالارض وتفش عقدتا النفسية فيني ، دا كان ابسط عقاب تعاقبني بيو ، وقربت تخليني اصلي عكس اتجاه القبلة بس رحمة ربنا واسعة وقدرت اتفكة منها.
ايناس: انا بخليك لكن لو حصلت لي حاجة قسما اجيك في بيتك افصل راسك من جسمك.
عارفة نفسك دخلتينا ودخلتي نفسك في متاهة مامنها طلعة.
ايناس كانت بتتوعد ومنفعلة بشدة ، لمن فاض بي كمان ماخليتا تتمادى في الاساءة واتجننت فيها لمن فقدت المنطق ، لميت شعري ولبست طرحتي وطلعت من عندها وماصدقت نفسي لمن شفت الشارع.
مشيت في الشارع اسحب في شنطتي وماعرفت مخرج كل ماامشي بي شارع القى بيوت لفيت كتير حتى لقيت الاسفلت ، وقفت مسافة في الشارع مبلمة على امل القى مواصلات بس كان شارع فرعي مافيو مواصلات في النهاية ركبت ركشة وصلتني شارع الزلط ركبت امجاد.
كنت ببكي ماعشان الحصل لي ، ببكي عشان الجاي ممكن يكون شنو ؟ امي. ابوي. اخواني ممكن يحصل ليهم شنو بسببي انا؟
بتاع الامجاد: معليش ماقصدي اتدخل لكن مالك بتبكي ومالك شكلك بترعفي؟
حنين: ماف شي لمن ازعل برعف.
بتاع الامجاد: احكي لي اعتبريني اخوك.

سكت وماقدرت اتكلم غير ابكي بس لمن وصلت البيت حتى بتاع الامجاد رفض يشيل مني حق المشوار.

يتبع...