النفاثات في العقد

الجزء 13

بعد شوية مرقت المرة الشايلة مخلايتا دي ومعاها خالتي وبتها
خالتي : لكن عاد ياعواطف كيف ندقو ليها هنا.
عواطف : لا اتو جيبو حاجاتكم وشوفو ليكم ناس بعيدين ندقو عندهم
خالتي : سمح نشوف..
جو سلمو علي اميمة وغسلنا يدينا وجينا قعدنا فطرنا بس سهيلة ماجات فطرت
جبت صحن وقطعت ليها من العصيد وختيت حبة ملاح ووديتا ليها ، دخلت لقيتا تعبانة شديد وحالتا اكعب من ذي قبل
قعدت جنبها وبالتحانيس حتى اكلت ، جبت ليها موية شربت ،سالتني عن بناتا وبلغتها ماتخاف عليهن انا ونعمة ماسكنهم ،
مشيت المظلة كملت فطور ونعمة جهزت الجبنة ، قامت المرة قالتلي امشي نادي الفرسة
فرسة؟؟ الفرسة دي منو؟؟
الفرسة دي مرة ولدكم العندها الظار..!
نعمة قالت لي قصدها امشي نادي سهيلة..
مشيت كلمتها وجيت ، في لحظة لقيتا قدامي
انا باستهتار : هسة ماكنتي عيانة ياسهيلة سبقتيني
قبل ماتنطق سهيلة المرة ختفت الكلام : ماعندها الجماعة جابوها.. دايرين القهوة..!
قلو البن وجابو شممو ليها وخالتي قالت لي لوعندك عطر جيبي
جبت عطري من الشنطة وجيت ريحوها وبدت تعمل في حركات غريبة بتشم في العطر زي الزول الرايحة ليو جرعة مخدرات.. ودا كلو وسط استغرابي
الكل فاهم الا انا زي الاطرش في الزفة
دقو البن وورصو الفناجين وجهزو الجبنة وختوها
المرة كبت اول فنجان للفرسة زي ماقالت عواطف ولا ست المخلاية..
شربت الفنجان بتاعا ولسة بتعمل في حركات غريبة ، بعد شوية طلعت الفي بطنا كلو وبقت تتكلم لهجة غريبة زي الكأنها اريترية او حبشية كلام سريع ومافيو غلطة عشان نقول قاطعاهو من راسا.. لا دا كان كلام واااضح
وفجأة بقت تقول بلهجة مكسرة : مانخلي إشرب جبنة الا يدبه خروف اسود .. انا ملك هبش مانلعب..
انا اسكن في بهر يشيلو نرمي جوة بهر تاني مايتلع
والمرة تقوليو : سمح ياملك الحبش كل طلباتك مجابة
عاينت لي سهيلة في وشها كان مخيف وعيونا ابيضت وكأنها ميتة ومنظرا كان عجيب...
اترعبت وطلعت برة وانا بترجى امي تمرق معاي الحوش..
هدأتا المرة واتفقو يسوو اليومية في بلدا عند اهلها.

يتبع...