النفاثات في العقد

الجزء 43

رانيا: تتذكري مش قلت ليك حاكلمك بي حاجة بس اوعديني ماتتغيري مني؟
حنين: اي
رانيا: اوعديني هسة.
حنين: وعد وربنا يقدرني اوفي بيو.
رانيا: انا بعالج الناس بس ما اي زول.
حنين: والمشكلة وين في دا.
رانيا: انا بعرف في الامور الروحانية.
حنين : روحانية..! يعني جن سجمي..!
رانيا: براحة ارخي صوتك ، وقفلت لي خشمي.
حنين: يعني انتي برضو طلعتي ساحرة؟؟؟؟
رانيا: انا ماساحرة وما فكرت اذي زول ولافكرت اضر انسان مهما كان.

سكت وماعرفت اقول شنو لي رانيا الطلعت مية مبرر لي نفسها.
حنين: يعني اختك العلمتك ولا انتي العلمتيها؟؟
رانيا: اتعلمت من الكتب.
حنين: اهاااا يعني الكتابين الشفتهم المرة الفاتت ومنعتيني اشوفهم .
رانيا: ايوا بالضبط.

حكت لي رانيا عن الروحانيات والعالم الخفي وعن النجوم والكواكب ، لقيت مداركا واسعة وراسا مليان في الحتة دي .

بمرور الايام اتعلمت من رانيا بعض الاسرار وضرب الرمل وطريقة فتح باب المندل و اتعلمت منها حاجات كتيرة ومن ضمنها طريقة ربط السبعة اجراس، و زي مابقولو الصاحب ساحب بس انا كمان مافكرت استخدم اي حاجة من العلمتني ليهم رانيا ولا اشتغلت بالموضوع دا من اساس.

شيخ حمزة قرر يجي السودان عشان يطمن على رانيا واختها ، ايوا اختها الساحرة ماهي برضو بتهم وكلهم بحبوها..

وانا بي جاي حياتي كانت مستقرة ومتغير فيها حاجات كتيرة ،حاجات كانت مضايقاني وحاجات مفرحاني بس كنت فاقدة فيها تبيان الخلت القراية لاسباب مجهولة، كانت الجامعة من غيرا مسيخة.

عديت ايامي طبيعية الا كانت علاقتي مع رانيا بتقوى اكتر لدرجة اني نسيت صحباتي وحتى تبيان بقيت مامتواصلة معاها واخبارها شبه مقطوعة.

يتبع...