النفاثات في العقد

الجزء 35

تاني يوم اتفقنا انا وتبيان نتلاقى محل ايسكريم ناكل ايسكريم ، اتلاقينا وكنت مقبلة على تبيان بنضحك ومبسوطين فجأة تبو لفتتني لي ورا.
تبيان : دي مش ايمان معاها حبيب صحبتا؟
حنين: سجمي !!! اي دا امجد!!
وشفتها ادت امجد حاجة وكأنها قروش..
تبيان: علاقتا شنو بأمجد؟
حنين: ماعارفة بس ظاهر حاجة اكبر من الاتوقعتها.
فكرت اضرب لي ايلاف لكن اتراجعت ماحبيت الفتنة ، بس لازم ايلاف تعرف عشان ماتبني املها ساي ، الاولاد ديل كلهم زفت ومابستاهلو نخلص ليهم.

طوالي ولا اتأخرت مشيت عليهم وايمان لمن شافتني لمن مافمت حاجة وامجد رد السلام ببياخة شديدة.

طلعنا انا وتبيان وكانت تبيان بتستفسر بس ما جاوبتها بكلمة ، كنت مصدومة من خيانة ايمان لي صحبتا.

حكيت لي رانية بكل شي ونصحتني بالسكوت عشان مااتعرض للمشاكل ، اخدتا بنصيحتا بس الموضوع لسة ماكل معاي.
ابدا ماسكت على موقف ايمان وامجد، اتصلت علي ايمان كم مرة ماردت علي والمرة الاخيرة كنسلت المكالمة في وشي في الاخير لمن ماردت لي رسلت ليها مسج كان فيو كلام حار واخطرتخا اني حاكلم ايلاف بس ردها لي كان فاجع رسلت لي رسالة فيها:
{اولعي بجاز وسخ انتي وايلاف واحب اطمنك انا وامجد بنحب بعض لينا مدة وهو ماعايز ايلاف البتحاول تفرض نفسها عليهو}..!
بس ماسكته على قدر ماكان كلاما شين ردي ليها كان اشنى :
{بس اريتو يصونك ويختك في عيونو لكن طالما اتخاففتي ارتاحي مابجيك ولو هو فيو خير لي ايلاف كان كمل معاها واعتقد ايلاف كدا حتكون سعيدة عشان بعد منها الولد الناقص دا اشبعي فيو انتي والطيور على اشكالها تقع}.

نمت وانا ممغوصة من ايمان شديد لدرجة اني حلمت بيها بنتشاكل.
الصباح اتصلت علي ايلاف بتبكي وتترجاني احكي ليها الحصل ،شكلها تبيان نشرت الخبر، صعبت علي ايلاف شديد

حنين: حلفتك ماتنزلي ولادمعه عشان خاطر زول مابستاهلك.
ايلاف: لكن ليه يعمل كدة ومع منو مع صديقتي البعتبرا مقربة !
حنين: ياحبيبتي دي خانت نفسها قبل تخونك ماتقولي عليها مقربة.

ايلاف قعدت تبكي بحرقة لحدي مابكتني معاها وحكت لي حاجات كتيرة هي عملتها عشان امجد بس امجد شكلو كان بحبها مصلحة وخصوصا هي اهلها في مسقط ومرتاحين ، امجد كان بشيل من ايلاف قروش وكل مااشترت تلفون جديد بشيلو منها ودا غير اللابتوبين الشالهم منها وهي ياحبة عيني عشان مسكينة وبتحبو مابتسألو نهائي وهو النذل استغل الحتة دي،اتأكدتا انو امجد بيستغل ايمان بس ايمان مقطعة وماحتقدر تعمل ليو زي ايلاف وحيخليها قريب.
ارتحت نفسيا للاستنتاج دا ودعيت عليها ربنا يوريني فيك يوم.

تصدقو اني حكيت لي رانية بالحصل ، للاسف انا بقيت بحكي لي رانية بأي شي حتى لو طعنتني شوكة بحكي ليها
دا شنو دا ، دا ماطبعي احكي مشاكل الناس لي زول الا للمساعدة بس غريبة انا بحكي لي رانية يمكن عشان ولفت عليها وبقت فردتي شديد وحتى هي كمان بتحكي لي خصوصياتا ودا معناها وثقت فيني.

يتبع...