حنين ، حنين اصحي نايمة كدا مالك؟
حنين: نعم ياامي.
امي : قومي شوفي منظرك نايمة كيف.
حنين: حاسة جسمي تقيل.
امي: قومي شوفي عاملة شنو في نفسك.
لقيت نفسي نايمة في طرف السرير وراسي لي تحت قريب للارض ، يعني كان ممكن اصحى وماانتبه اقع على راسي.
اعوذ بالله ، اعوذ بالله قعدت اردد بي خوف وهلع.
امي: يابت انتي مالك حاصل عليك شنو الايامات دي.
حنين: خايفة من الامتحانات.
امي: ماطول عمرك بتمتحني اشمعنا المرة دي.
حنين: انا تعبانة ياامي.
امي: مالك عندك شنو؟
حنين: نفسيا وجسديا.
امي: صحي شايفاك ضعفانة ووشك مخطوف ، حنين ياماما كلميني حاسة بشنو.
حنين: وريتك ياامي.
امي: خلاص ارح نوديك الدكتور.
حنين: مامحتاج ببقى كويسة ان شاءالله.
امي: تاني ماترقدي لي في الغرفة دي براك.
حنين: ليه؟
امي: بس ماترقدي فيها.
حنين: سمعتي فيها شنو.
امي: هو انا سمعت ، انا شفت عديييل كلب اسود زي السكن قدر الليلة وبكرة يحمر لي، لمن قريت اية الكرسي حتى اختفى.
الليلة سجم السجم دا الخايفة منو ، امي انا خايفة عليها شديد معناها انا لازم ارجع لي ايناس، لا انا كان رجعت ليها وعرفت انا خايفة علي امي حتمسكا لي نقطة ضعف وتجبرني انصاع لي امر السفلي.
العصر قررت امشي اسال جارنا امام الجامع من زول عندو معرفة بالامور دي وفعلا وصف لي شيخ معالج بالرقية وكان قريب مننا ، ركبت ركشة ونزلت مكان وصف لي
كان مافي انتظرتو لحدة ماجا ، سألتو على اساس انها وحدة بعرفا حصل معاها كدا.
ماساعدني في شي بل زاد الطين بلة فتحة خشمو قاللي ، الله يلعنا دي ساحرة دي لازم تتقتل حسيت كأنو بقول لي انتي لازم تموتي انتي ساحرة ملعونة ، اضطريت اخليو في مكانو يهرج وركبت الركشة الجيت بيها وانا ببكي واندب في اليوم العرفت فيو ايناس.
صاحب الركشة: لوسمحتي يااختي ممكن اسالك؟
حنين: احكي.
ص. الركشة: انا سمعت الحوار الدار بينكم والظاهر انتي طالبة مساعدتو، احكي لي الحصل بالتفصيل.
حنين: لا طبعا.
ص. الركشة: انا عايز اساعدكم والله.
حكيت لبتاع الركشة الكان مستمع جيد وقال عندو زول ممكن يساعدنا.
حنين: والزول دا شنو وكيف حيساعدنا؟
صاحب الركشة: الزول دا عندو روحاني مسلم بقدر يفتيكم في الحالة دي.
حنين: تاااني روحاني.
ص.الركشة: ماف زول بقدر يساعدكم غيرو.
حنين ببكاء: ماعارفة والله يااخوي اقوليك شنو انا غلبت خلاص.
ص.الركشة: شيلي رقمي ولو حبيتي فكرتي اتصلي علي ، الله يعينك غايتو.
___________________
امي: حنين تعالي هنا، مشيتي وين.
حنين: مشوار.
امي: طلعاتك ونزلاتك كترت زمان كنت بقول رانيا وهسة رانيا مافي ، انتي في شنو داسة علي.
حنين: مافي شي.
امي: انتي اي حاجة اسالك تقولي لي مافي شي.
حتى انتي ياامي معقول تكوني حسيتي بي، عليك الله حسي بي يمكن تساعديني ولا اقول احسن خليك بعيدة من الصورة انا خايفة عليك.
دخلت الغرفة لملمت كل شيتاتي وحاجاتي حتى هدومي نقلتها الدولاب التاني انا الغرفة دي مابقعد فيها تاني بعد الحصل لي الليلة.
يتبع...