صباح الخير امي ياخ والله مشتاقة ليك كيف.
امي: اسألي مني طيب، قولي امي دي اكلت ولا شربت ولا الحاصل عليها شنو بقيتي ليك فترة ساجنة نفسك في الغرفة حتى التلفزيون خليتي.
حنين: حقك علي ياامي عليك الله ماتزعلي مني.
امي: انا لوكنت بزعل منك ، كان سخط ربنا نزل عليك.
حنين: ليه يا امي انا زعلتك في شي؟
امي: ترفضي شيخ حمزة ليه؟ مالو عيبو شنو؟
حنين: ما مايل لكن ياامي انا ماممكن اعرس لي راجل مرة وبعدين مرتو ظاهر عليها صعبة وانا وهي مابننفع مع بعض.
امي: ما هدي بت خالتك عرستو راجل مرتين الحصل ليها شنو ،عايشة احسن عيشة.
حنين: بت خالتي راجلها هنا و شيخ حمزة في بلد بعيدة ياامي لا ساعة لا ساعتين وهناك ماعندي زول يعني لو حصلت اي مشكلة انا بعيدة ومافي زول حيكون جنبي.
امي: خليك هنا في بلدك دا يمشي ويجيك.
حنين: بالمنطق كدا ماف راجل برضى يخلي عروسو في بلد تاني ، وبعدين انتي ياامي عايزة تشيليني وترميني في جحيم تعبتي مني امي : البقرة يابتي مابتعيا من قرونا ، انا دايرة اشوفك مع الزول البقدرك ومايذلك راجل يتحمل المسؤولية ومايحوجك لي شي ، يمكن بكرة اموت ، اخليك لي الناس يعملوك ممسحة.
حنين: بعد الشر عنك ياامي ، ماتقولي كدا ، وبعدين شنو جو النكد الدخلتينا فيو دا ابوي امس شايفاو تمام وقال احتمال ينهي اقامتو ويرجع لمن يقدر يمشي.
امي: كفيلو جزاو الله خير ماقصر معانا وقال ليو انا بجدد ليك اقامتك لحدي ماتبقى كويس وترجع تشتغل.
حنين: اي والله راجل خير .
____________________
في الجامعة:
ليه بقيتي مابتجي الجامعة غيابك كتر؟
حنين: والله انا حرة وكت ما احب اجي بجي ماليك شغلة.
عبدو: ماقاصد حاجة بس اسمك نزل في الانذار.
حنين: نعععم ، ارح معاي نشوفو.
مشيت ولقيت في البورد انذار اربعة مواد، احيييييا انا زاتي كترتها مامشكلة من يوم السبت بنتظم ان شاءالله.
رجعت البيت بعد يوم تقيل على قلبي وكالعادة ايناس قابضة الجولة في الونسة اقصد الوسوسة وكلمتها بموضوع الانذار .
ايناس: ههههه قلتي لي انذار.
حنين: اي والله وخايفة المرة الجاية حرمان بصراحة ماضامنة نفسي غيابي بقى كتير.
ايناس: اديني اسماء اساتذة المواد بس.
حنين: لا طبعا كل شي ولا الغش.
ايناس: عارفة اكتر حاجة بتعجبني فيك المثالية.
مثالية؟ اي مثالية دي ؟ اسحر الناس واعبد الشيطان دي مثالية؟ يمكن في نظرها هي بس المثالية دي.
حنين: بالمناسبة رانيا قالت خلصت اجراءاتها واحتمال تسافر يوم 5 /5.
ايناس: كلمتني لكن انا عايزاها ترجع.
حنين: ترجع وين يابيبي مستقبلها اهم من انها تقعد معاك تونسيها بي فتحة الحيطة.
ايناس: ماعارفة انا متضايقة من سفرا دا في حاجة ماعايزة اقولها.
حنين: طيب لو ماقادرة تفارقيها الحقيها، يلا بالاذن ماشة اخد لي دش عشان اقعد اقرا بي مزاج.
ايناس: سلام.
_________________
شلت ملابسي وعلى الحمام اول مافتحت الباب شفت كلب اسود ضخم بحجم عجل بنبح بصوت مرعب ، في اللحظة دي مسكتا نفسي رغم الخلعة الدخلت فيني قفلت الباب بسرعة ومشيت الصالة شعر جسمي واقف.
امي: اجي صوت الكلب دا شنو؟
حنين: يمكن كلب الجيران.
امي: يابتي مالك منططة عيونك كدا، كلب جيران شنو الفي الحمام.
حنين: يعني انتي سمعتيو زي ما انا سمعتو؟
امي: اي الكلب دا هنا في البيت دا ، في شنو يابت خايفة كدا؟
حنين: لا ماف شي بس راسي لفة شوية.
حتى امي سمعت نباح الكلب وقدرت تحدد مكان نبيحو.
دخلت استحميت وكل ثانية بتلفت وراي لدرجة اني غسلت وشي وعيوني فاتحة.
اتصلت على ايناس اكلما بس ماردت علي ، قعدت اقرا شوية ورجعت افكر في الكلب الفي الحمام وطول اليوم مافكرت ادخل الحمام الا ساعة النوم.
يتبع...