صباح السبت:
حنين: الراجل دا محاضرتو طويلة ، كلها معديها ونسة.
ميادة: الصبر بس.
من وراي جاء صوت :
منو المضايق العسل؟
حنين: انت.
عبدو: الله يسامحك، انا برضو البضايقك؟
حنين: اي.
ميادة: هههه الزول دا هسة السالو منو.
حنين: داير يخفف دمو، يلا ماعلينا.
ميادة: انا ماشة احنك صحبو يشرح لي هستو.
حنين: ذكرتيني اصور شيت الهستو.
ميادة : امشي المكتبة الجنب الجامعة بصورو ليك كامل وبي غلافو بي 10 ج.
روان: انتي تبيان جمدت ليه ؟
حنين: امها عيانة.
روان: الله يشفيها ، سافرت تتعالج برة؟
حنين: لا قاعدة هنا.
كنت بتحجج لي تبيان بي مرض امها، امها ماكانت عيانة دا كان عذر بطلعو ليها لمن يسالوني، في الحقيقة انا ماكنت عارفة تبيان بقت مابتسال مني ليه وكل مااضرب ليها تلفونا مغلق وامشي ليها في البيت ماف زول بفتح لي الباب.
انتهى اليوم الدراسي وكان الجو سخن لمن اتبلمت وانا ماشة على المواصلات.
حنين: امي ننو عملو ليها العملية؟
امي: قبيل ، خلصتي؟
حنين: اي وجاية عليكم.
امي : تجي وين، انا جيت البيت.
اتصلت على رانيا:
حنين: هلا بالغلا.
رانيا: وين انتي من امس قاطعة
حنين: امس كانو معانا اهلي.
رانيا: الليلة فاضية؟
حنين: اي خلصت قبيل وهسة طالعة من الجامعة وضربت ليك عشان اسالك من ايناس.
رانيا: يعني مااتصلتي تسالي عني؟
حنين: ياخ انتي واختك كلكم واحد ههههع.
رانيا: ههههه عايزة تعملي مفتحة ، يلا دقايق وجاياك.
حنين: لا يامزة انا جنب المواصلات بجيكم براااي.
رانيا: لا ماتجي براك ، حتتنا مقطعية وبعدين مواصلاتنا صعبة.
حنين: خلاص بنتظرك في العربي.
الجو سخن والموقف زحمة والرايح والجاي يشاغل، قبيح هو التحرش اللفظي تماما كالجسدي.
الحاجة المؤسفة لابسة عباية واسعة طرحتي ملفوفة تمام وحتى عيوني مغطية بالفريم و روجي خفيف ، مع دا كلو بتشاغل هههههه ، انا وحدة من مليون بت بتتعرض لي التحرش اللفظي وحتى الجسدي احيانا واذا حاولت ادافع عن نفسي بتهموني باني مالابسة كويس ، طيب حتى لو مالابسة كويس دا ماسبب يخليك انت تشاغل، مثلا لو اختك ولا بتك مالابسة كويس وشاغلوها حترضى؟
لو ماعندك غيرة على اخواتك شاغل زي ماعايز.
يا اخت لوسمحتي انتي واقفة في الطريق .
حنين: اها معليش ماانتبهت ، شكرا.
بتاع العربية: ماشة حتة معينة؟
حنين: مستنية اختي.
بتاع العربية: جد لو مالاقية مواصلات بوصلك.
حنين: شكرا ليك اختي حتجي هسة ان شاءالله.
اتحرك بتاع العربية، شكلو كان بدق لي بوري من قبيل وانا سرحانة بكلم روحي على العموم شكلو زول عايز يعمل خير ماقليل ادب، ماكل زول بقيف لي بت بالعربية معناها عايز يقل ادبو ولا كل بت بتركب عربية نسيئ الظن فيها.
لقيت الشمس حارة ، مشيت وقفت جنب كشك العصير.
الو..!
ياخ انتي وين انا مشحوطة لي عشرين ساعة.
رانيا: ههههه عشرين ساعة بالسوداني ولا شنو.
حنين: عايني لو حتتأخري انا راجعة ماممكن معاك.
رانيا: سبعة ثواني بالسوداني واكون معاك هههه.
حنين: بطلي خفة دم، يلا سريع.
☆ انحنا بلدنا نتحدابا.. بي خيرا الوفير وشبابا.. لوننهض جميع بي صلابة.. لوننهض جميع بي صلابة مابتلقونا تاني غلابة☆
معليش ممكن اسالك؟
البغني دا منو؟
بتاع العصير: الفنان حسن خليفة العطبراوي.
حنين: سمعتها بصوت نانسي عجاج.
بتاع العصير: اصلا غناها العطبراوي.
حنين: ممكن تحولا لي؟
بتاع العصير: جدا"
حنين: شكرا.
الزول كونو يسمع اغنية وطنية نفسيا برتاح.. اي السودان دا هو بلدنا البلمنا ومقيمنا مهما ضاقت المعيشة فيهو يبقى بلدنا.
بتاع العصير: ياشابة انتي سامعاني؟
حنين: ايوا معاك.
بتاع العصير: افتحي بلوتوث.
رسل الاغنية وبقيت خاتة التلفون جنب اضاني رغم الجوطة وزحمة العربات وبواري الحافلات الطالعة لكن سمعتها.
يتبع...