رانيا: اختي كانت بتقول ليك في شنو دا كلو؟
حنين: ههه دا سر، بس تصدقي اختك طلعت طيبانة، سبحان الله صوتها زي صوتك بس مابتتكلم بي مياصة زيك ههههه.
رانيا: انا مايصة ، شكرا ليك هههه.
حنين: بالمناسبة شيخ حمزة امس قالي عندو رقية في (....) بعد صلاة المغرب وقالي لازم تحضريها.
رانيا: اي انا زاتي كلمني.
حنين: خلاص رجعيني البيت وبعدين بحاول اطلع، ولو انو عمي صعب لكن بحنكو.
رجعت البيت الساعة 3 واخدت لي غفوة.
في مستشفى كبير وجميل، الدكتور جا راجع بي عدة العملية وقال لي ابوك ماحيعمل العملية ماحتنفع.
اعوذ بالله اعوذبالله دي شنو الاحلام السخيفة دي ، يعني الواحد يا اتخلع من الاصوات ولا اتخلع من الكوابيس، النوم دا زاتو خلينا.
عاينت للساعة عاملة 5 وربع، الليلة اتاخرت مفروض امشي احنك عمي.
اتصلت على امي طمنتني علي ابوي واخواني اتكلمو معاي وكانو منتظرين جيتي بس كلمتهم بالحجز والمشاكل الفيو لكن ان شاءالله الاسبوع الجاي معاكم.
منوية، عمو عاصم ماجاء من الشغل ؟
منى: لسة.
حنين: عمتو وينا؟
منى: في المطبخ.
استأذنتا من عمتي ورجعت اتصلت على امي كلمتها مامعروفة الدنيا والبحصل شنو احسن تكون عارفة انا وين، جاتني رانيا وطلعنا طوالي.
جينا داخلين وكان شتتي الملح مابقع ، كمية نسوان وشفع .
حنين: هي ديك للا خديجة؟
رانيا: اي ارح نسلم عليها.
حنين: كيفك ي للا ؟
خديجة: حمدلله من ربي مزيان بس من خلقو ماكيخليونا في حال سبيلنا.
خديجة سلمت علينا سلام بايخ ، انا ورانيا عاينا لي بعض وعرفنا انو شيخ حمزة كلم مرتو خديجة بموضوع الزواج .
قعدنا في اخر زاوية بنتونس انا ورانيا ، فجأة جات خديجة مسكتني من كتفي
خديجة : ربي يخليك ..خليه ليا باش تعيشي سعيدة...!
وكان قصدها ربنا يخليك خليهو لي عشان تعيشي سعيدة.
نزلت من عيونا دموع كتيرة، دموع بتدل على شدة حبها وغيرتا على زوجها ، دا كلام عمل فيها كدا طيب لو اتزوجنا حيتعمل شنو.
رانيا: حنين قالت ليك شنو؟
رانيا: ردي علي قالت ليك شنو؟
رانيا: حنين..!
حنين: انسي.
رانيا:طيب.
دخل شيخ حمزة بعدما اصدر اوامرو من برة اي مرة تتغطى كويس، وخديجة قامت قعدت قدام الستارة القاعد وراها زوجها عشان تساعدو لو احتاج، اتمنيت لو الارض تنشق وتبلعني من الغيرة، هههه اي غيرة وحدة غريبة على راجل مرة من مرتو، دي انا بالضبط كدة بغير على شيخ حمزة من مرتو ، لا والله ماقلة ادب ولاقوة عين مني، دا احساس مر مهما حاولت ادسو مابتدسا.
شيخ حمزة لي زي ماهو ليها وحيتقدم لي بعد ابوي يبقى طيب ان شاءالله، امي عارفة كل شي واتكلم معاها بس ظروف ابوي حاليا مابتسمح لينا نعمل حاجة.
ابتدأ شيخ حمزة يقرا ويردد في الايات وطبعا في الناس البتصنعو وفي النسوان البتصيبهم هستيريا جماعية وفي الناس العيانين جد جد والحاجة دي بعرفا الشيخ بالخبرة .
( قل اعوذ برب الفلق•من شر ماخلق• ومن شر غاسق اذا وقب• ومن شر النفاثات في العقد
ومن شر النفاثات في العقد
ومن شر النفاثات في العقد
ومن شر النفاثات في العقد
ومن شر النفاثات في العقد
ومن شر النفاثات في العقد
ومن شر النفاثات في العقد•
حاجات كتيرة بتخليك تبكي ودموعك تنزل غصب عنك ، زي لمن تشوف وحدة بتدردق في الارض وتصرخ بأعلى صوتا بتقول النار قايدة فيها.
الاية دي حركت الاسحار المعقودة المنفوثة في كتير من بناتنا ، بنات ماعندهم ذنب ، بس القلوب مافيها رحمة ونفوس مابتعرف الخوف من ربنا.
سهام ، سهام بت كان حلمها حلم كل بت انها تتزوج وتعيش حياة سعيدة
سهام طولت من 10 سنين مربوطة من الزواج ويوما الاتزوجت زوجها كرها وطلقا والرابطاها مرة ابوها كدا بس كراهية عشان ماعندها جنا، مرة ابوها زي ماكتلت امها بالسحر ربطتا هي كمان عشان حياتا تكون مجهجهة.
سهام دورت للعلاج في كل مكان وماخلت زول مشعوذ مامشت ليو ماعملو ليها حاجة غير مرضوها زيادة، اخيرا دلوها على طريق الرقاة والحمدلله ماشة في تحسن، البشوف سهام وغير سهام من المسحورات يحمد ربو على نعمو.
ربي يخليك ، خليه ليا باش تعيشي سعيدة.
كلام خديجة دا خلاني افكر الف مرة قبل مااقول قبلت بي حمزة زوجا لي ، كان قصدها واضح لو اتزوجتي راجلي ماحتعيشي سعيدة ومابعيد يحصل لي الحصل مع سهام ونادية السحرتا مرة راجلا الاولى.
يتبع..