ركشة ، السلام عليكم ماشة جامعة (.....)
اركبي.
وصلت واصطبحت بالود السغيل الماعندو شغلة دا
عبدو : صباح الخير.
اهلا صباح النور ( هو الخير بجي من وين وانت اول زول الاقيو في وشي )
عبدو : الليلة شنو الاشعاع الحاصل دا؟
نعم؟ ( نعم دي طلعت مني بطريقة تهرش البودي قارد)
عبدو : لالا مافي شي.
طيب لمن مافي شي بطنطن مالك.
حنييين صباحوووو ، تعالي دايراك في موضوع ضروري.
لا عليك الله ياايمو انا جاية من البيت اخش المكتبة خلي المواضيع بعدين.
ايمان ، بالضبط كدا جاية الجامعة دي تلعب بس ومواضيعا كتييييرة مابتنتهي والبتظهرو ليك عكس الفي قلبها تماما الله يذكرا بالخير.
اصرت ايمو انها تتكلم في موضوعا.
ايمان: محتاجة مبلغ 750 ج
انا: 750 مرة وحدة؟!
ايمان : اي والله عندي موضوع ضروري ولازم اتمو ياريت تسلفيني لحد الشهر الجاي برجعهم ليك.
انا: انا زاتي ماعندي المبلغ دا حاليا ولو عندي كان كملت تصوير شيتات.
ايمان : عليك الله ان شاءالله لو نص المبلغ انا بدبر الباقي.
انا : شوفي حاليا ماعندي لكن ممكن الملم ليك من هنا ومن هنا لو موضوعك دا مهم شديد.
ايمان: مهم شديد ومزنوقة ياحنين فكي كربتي الله يفك كربك.
انا : خلاص حتصرف ارحكي معاي الكفتيريا ماشة اشتري شيت.
ايمان طلبت مني القروش وماطلبت من صحبتا المقربة عشان عارفاني مابعرف ارفض ليها.
واقفة في محل التصوير منتظرة دوري في التصوير وردتني مكالمة تاني من رانية ، ودي دايرة شنو المرض دي ياخ.
الو.. هلا رانية.
رانية : اهلين ياعسل انتي وين؟
حنين: في الجامعة ليه بتسألي؟
رانية: فاضية؟
حنين: داخلة المكتبة اقرا.
رانية: لمن تفضي اتصلي علي دايراك ضروري.
حنين : ان شاءالله.
يتبع....