[Unicode]ရှောင်းယွီအတွက် အချပ်ပို(၃)
နွေရာသီရဲ့ အပူရှိန်အပြင်းထန်ဆုံးဖြစ်တဲ့ဇူလှိုင်လတွင် ယွီဖုန်းချန် နှင်းကျားသစ်တပ်မဟာမှ ထွက်ကာ အိမ်ပြန်လာခဲ့သည်။ သို့ပေမယ့် သူ အိမ်မှာ တစ်ရက်ကြာအောင်တောင် မနေခဲ့။ အထုတ်အပိုးများ ချပြီးတာနှင့် ပေ့ကျင်းကို အပြေးသွားတော့သည်။
သူ ပိုင်ရှင်းယွီကို ဖုန်းဆက်လိုက်ပေမယ့် ပိုင်ရှင်းယွီကတော့ သူ့ကို ကြိုဆိုလာခြင်း မရှိ။ ထပ်ခါတလဲလဲ အငြင်းခံနေရ၍လည်း ဖြစ်လိမ့်မည်၊ တစ်ခါတစ်လေကျ နာကျင်ခြင်းဆိုတာ သူ့အတွက် ထုံလို့နေခဲ့ပြီ။ ထို့ကြောင့် သူ အထူးတလည် ဝယ်လာတဲ့လက်ဆောင်များကို သယ်ဆောင်ရင်းသာ ပိုင်ရှင်းယွီအိမ် တန်းသွားလိုက်သည်။
ပိုင်ရှင်းယွီအမေက သူ့ကို နွေးနွေးထွေးထွေးပင် ကြိုဆိုလာသည်။ သူ့အရှေ့က မြူးတူးရွှင်ပျ၍ တက်ကြွနေသည့် ဒီအမေဖြစ်သူကို ကြည့်ရင်း သူ့စိတ်ထဲ ရင်းနှီးနေသလိုခံစားလိုက်ရသည်။ ပိုင်ရှင်းယွီက အမေတူသားလေးဖြစ်သည်။ ရယ်မောနေရတာလည်း သဘောကျသလို လွယ်လင့်တကူ ပေါ်မလာတတ်သည့် အပြစ်ကင်းစင်မှုများဖြင့် အလိုလိုက်ခံထားရလို့သာ ဆိုးသွမ်းနေသည့်ကောင်လေးတစ်ယောက်ပင်။
ပိုင်ရှင်းယွီ အလုပ်မှ အိမ်ပြန်လာပြီး သူ့ကို မြင်သွားသည့်အချိန် ခဏတာမျှ မျက်နှာအမူအရာက ဖြူတစ်လှည့်ပြာတစ်လှည့်ဖြစ်နေတာမို့ သူ တိတ်တဆိတ် လက်သီးကျစ်ကျစ်ဆုပ်ထားရုံသာ တတ်နိုင်ခဲ့သည်။ နေရာကသာ မှားမနေပါက သူ ပိုင်ရှင်းယွီကို နံရံနှင့်ဖိကပ်ပြီး အကြမ်းပတမ်း နမ်းရှိုက်ချင်မိသည်သာ။ ဒီလူအပေါ် ထားသည့်အတွေးများစွာကို ထုတ်ဖော်ပြဖို့ ဘာဆိုဘာကမှ တတ်နိုင်ခြင်း မရှိနေသည့်အချိန် ဒီလို အကွာအဝေးတစ်ခုမှ ချုပ်တည်းလျက် ရပ်ကြည့်နေရခြင်းက ပိုလို့ပင် ဆိုးလှသည်။
ပိုင်ရှင်းယွီအိမ်ရဲ့အနောက်ဘက်ခြံလေးထဲတွင် သူတို့ စကားအများကြီး ပြောဖြစ်ကြပြီး ပထမဆုံးအနေနှင့် ခွန်းလွန်းတောင်ပေါ်မှ ကိစ္စများကိုလည်း ဖွင့်ဟဖြစ်ခဲ့ကြသည်။ နေသာလှတဲ့ကောင်းကင်ပြာအောက်တွင် ကွယ်ဝှက်ထိန်ချန်ထားခြင်း မရှိတဲ့ စကားများစွာပြောဖြစ်ကြပြီး ဖုံးကွယ်ထားလို့တောင် မရနိုင်တဲ့ပိုင်ရှင်းယွီမျက်ဝန်းထဲက နာကျင်မှုများကို ကြည့်လျက် မာမာကျောကျောရှိလှတဲ့ စကားများကို နားထောင်ရင်း ယွီဖုန်းချန် နာကျင်မှုထဲက သာယာမှုရှာတွေ့သလိုတောင် ခံစားလိုက်ရသည်။ ဒါတွေအကုန်လုံးက သူ ခံစားသင့်တာများပင်။ သူ တကယ် ခံစားရဖို့ ထိုက်တန်ပါ၏။ သို့ပေမယ့် သူတို့နှစ်ယောက်ကြား ဘယ်လောက်ပဲ သံသယတွေ နာကျည်းမှုတွေရှိနေပါစေ၊ ပိုင်ရှင်းယွီ သူ့ကို ဘယ်လောက်ပဲ ငြင်းဆိုပါစေ၊ သူ ဘယ်တော့မှ လက်လွှတ်လိုက်မှာ မဟုတ်။ ပိုင်ရှင်းယွီဆိုတာ သူ့ဘဝထဲ ဆက်ရှိနေပြီး သူ့အပိုင် ဖြစ်ကိုဖြစ်နေရမည်။
YOU ARE READING
Xiao Bai Yang ||Myanmar Translation||
Mystery / ThrillerThis is just a translation work. It doesn't belong to me. My Little Poplar [小白杨] Author - 水千丞 [Shui Qian Cheng] Total Chapters - 115 chapters + 4 Extras