Xiao Bai Yang ||Myanmar Translation||

31.2

[Unicode]

'ဟင်းချက်ဆောင်သို့ လက်ရှိနှင့် စဉ်ဆက်'

သူတို့ အကြာကြီး မအိပ်လိုက်ရ။ ၈နာရီဝန်းကျင် ရောက်ချိန်တွင် ချန်းကျင်းလိုက်နိုးခြင်းကို ခံလိုက်ရပြီး အလျင်အမြန် မျက်နှာသစ်၊ မနက်စာ စားကာ စစ်လေ့ကျင့်ရေးကွင်း၌ လူစုလိုက်ကြရသည်။

မနက်စောစော ကတိုက်ကရိုက်လုပ်နေရတာမို့ သူတို့နှစ်ယောက်ကြား စကားပြောဖို့ အချိန်တောင် မရလိုက်။ ပိုင်ရှင်းယွီ ခဏတာမျှ လွတ်မြောက်သွားသလို ခံစားလိုက်ရသည်။ အကယ်၍ ယွီဖုန်းချန်သာ 'ဒီတစ်ခေါက်ကော ခံစားလို့ကောင်းလား'ဟု မေးလာပါက သူ့မှာ ပြန်ဖြေစရာ အဖြေ တကယ်မရှိ။

ရွှီချွမ်နှင့် ဝမ်ရွှန်းဝေက လူအယောက်၂၀၀ တာဝန်ကျရာနေရာများကို စတင်ကြေညာလိုက်သည်။ ဝမ်ရွှန်းဝေ စာရင်းပြုစုထားသည်ကို ထုတ်ပြီးနောက် တစ်ယောက်ပြီးတစ်ယောက် နာမည်ခေါ်ထုတ်လိုက်သည်။

ပိုင်ရှင်းယွီ သူ သိတဲ့လူတော်တော်များများက ကင်းထောက် ထောက်လှမ်းရေး တပ်ခွဲ(၃)ရောက်သွားတာကို တွေ့လိုက်ရသည်။ ထိုတပ်ခွဲက ရွှီချွမ်၏ တပ်ခွဲဖြစ်ပြီး ယွီဖုန်းချန်၊ ချန်းလျန်၊ ဖုန်းသုန့်ယွမ်၊ တာ့ရှုန်း၊ ပါ့ထုအာ၊ လျန်းရှောင်းမောင်းနှင့် အခြားတပ်သားသစ်အချို့ တာဝန်ကျသွားသည်။ သေချာသလောက် ရမှတ်ကောင်းသည့် တပ်သားတိုင်းက ရွှီချွမ် ရွေးထုတ်သွားခြင်းကို ခံလိုက်ရသည်။ အဆုံးသတ်ရောက်လေ​လေ ကျန်ရှိသူဦးရေ တဖြည်းဖြည်းနည်းလာလေဖြစ်သည်။ ပိုင်ရှင်းယွီ လက်ဝါးတွင် ချွေးများထွက်စပြုလာပြီး သူ့ကို ဘယ်လိုကံကြမ္မာက စောင့်နေမလဲတောင် သူ မသိတော့။

နောက်ဆုံးမှာတော့ ဝမ်ရွှန်းဝေ စာရင်း၏ နောက်ဆုံးမျက်နှာကို လှန်လိုက်သည်။ သူ ခေါင်းမော့ပြီး ပိုင်ရှင်းယွီကို ကြည့်လာသည်။

"ပိုင်ရှင်းယွီ"

"ရှိ!"

"ကင်းထောက် ထောက်လှမ်းရေး တပ်ခွဲ(၃)"

ပိုင်ရှင်းယွီ အံ့ဩပြီးပျော်ရွှင်သွားရသည်။ သူ့ကို ရွှီချွမ်ကို လိုချင်လိမ့်မည်ဟု မထင်ထား။ ဒီပုံစံအရဆိုရင်ဖြင့် အနည်းဆုံးတော့ သူ ဖုန်းသုန့်ယွမ်၊ ချန်းလျန်တို့နှင့် တပ်ခွဲတစ်ခုတည်းမှာ အတူရှိနိုင်ပြီဖြစ်သည်။ ထို့ကြောင့် တွေ့ဆုံရသည်မှာလည်း ပိုလွယ်ကူသွားမည်ပင်၊ ယွီဖုန်းချန်ကိုလည်း ထိုနည်းလည်းကောင်းဖြစ်သည် .. သူ ယွီဖုန်းချန်ဘက်ကို မသိမသာခိုးကြည့်လိုက်သောအခါ ယွီဖုန်းချန်ကလဲ သူ့အားလှမ်းကြည့်နေသည်နှင့် ဆုံလေသည်။ သူ့မျက်ဝန်းများက ပျော်မြူးနေရိပ်သန်းနေသည်။ ပိုင်ရှင်းယွီ သူ့မျက်နှာကို တစ်ဖက်ပြန်လှည့်ကာ ဖုန်းသုန့်ယွမ်နှင့် ချန်းလျန်ကို မျက်စိမှိတ်ပြလိုက်သည်။