Xiao Bai Yang ||Myanmar Translation||

49

[Unicode]

'ကိုယ်ကာယကြံခိုင် လေ့ကျင့်ရေး'

သွားရမည့် ခရီးလမ်းက ရှည်လျားပြီး ခလုတ် ကန်သင်းများလှတာမို့ ကားပေါ်ရှိ လူတိုင်း သက်တောင့်သက်သာ ဖြစ်မနေ။ ပိုင်ရှင်းယွီ ထိုင်ခုံနောက်ကို မှီရင်း တစ်မှေးအိပ်ရန် လုပ်နေပေမယ့် သူ တကယ် အိပ်မပျော်နိုင်။ သူ သူနှင့် ယွီဖုန်းချန်အကြား ပြောခဲ့သည့် စကားများအကြောင်း ထပ်ခါတလဲလဲ တွေးမိနေသည်။ ထို့နောက်မှာတော့ သူတို့နှစ်ယောက်လုံး အခုအချိန်ထိ ဆိတ်ငြိမ်သက်လျက် ရှိနေကြသည်။

သူ ဘာလို့များ ဒီလိုမေးခွန်းကို အခုမှ တွေးမိရတာလဲ။ ယွီဖုန်းချန်က 'နှင်းကျားသစ် တပ်မဟာ' ကို သွားတော့မှာဖြစ်သည်။ အကယ်၍များ ယွီဖုန်းချန်သာ လူရွေးပွဲကို မအောင်မြင်ဘူးဆိုပါက ကျန်သည့် တပ်ခွဲ စစ်သားများလည်း တစ်ယောက်မှတောင် အောင်မြင်နိုင်မှာ မဟုတ်။ 'နှင်းကျားသစ် တပ်မဟာ'က သူ့အတွက်တော့ အလှမ်းဝေးလွန်းသည့် နေရာဖြစ်သည်။ တကယ့်အကွာအဝေးအနေနှင့်လည်း အရမ်းကို ဝေးလှပါသည် - တပ်မဟာ ရုံးချုပ်က Urumqiမှာ ရှိနေသည်မို့။ သို့ပေမယ့် စိတ်သဘောအရ ခံစားရသည့် အကွာအဝေးက ပို၍တောင် ဝေးနေသည်။ ဒီနေရာက သူ တစ်ခါလေးတောင် မျှော်မှန်း မတွေးရဲခဲ့သည့် နေရာတစ်ခုဖြစ်သည်၊ သို့ပေမယ့် ယွီဖုန်းချန်အတွက်ကတော့ သွေဖယ်ခြင်းရှိလာမှာမဟုတ်သည့် ပန်းတိုင်တစ်ခုဖြစ်သည်။ တခြားတစ်မျိုး ပြောရပါက ယွီဖုန်းချန်က အလွန်ဆုံးရှိ လအနည်းငယ်အတွင်း ခွန်းလွန်းတောင်မှ ထွက်သွားတော့မည်ဖြစ်သည်။ နှစ်အနည်းငယ် ကြာရင် သူကလည်း စစ်မှုထမ်းကာလ ပြီးဆုံးသွားမှာဖြစ်ပြီး ယွီဖုန်းချန်ကလည်း ဘယ်ဆီရောက်နေမလဲ ဘယ်သူမှ မသိ။ သူတို့၏ ရှင်းပြခက်သည့် ဆက်ဆံရေးကလည်း လအနည်းငယ်အတွင်း မရှိခဲ့သလို ပျောက်ကွယ်သွားတော့မှာဖြစ်သည်။

ပိုင်ရှင်းယွီ ဒီဆက်ဆံရေးကို အဆုံးသတ်လိုက်ရတာ ကောင်းသည်ဟု တွေးမိသည်။ သူလည်း ယောက်ျားတစ်ယောက်နှင့် အမြဲ ရစ်နှောင် ပတ်သတ်ပြီး နေနိုင်မှာ မဟုတ်၊ သို့ပေမယ့် သူ့နှလုံးသားထဲ ဒေါသနှင့် ခံပြင်းမှုများက ဘယ်လိုပေါ်ပေါက်လာသလဲ သူကိုယ်တိုင်ပင် နားမလည်။ ဖြစ်နိုင်စရာ အကြောင်းကတော့ အစကနေ အဆုံးအထိ ယွီဖုန်းချန်ဘက်ကပဲ သူ့ကို နိုးဆွမြူစွယ်ဖို့ လက်ဦးမှုယူခဲ့တာဆိုပေမယ့် သူ့ကို အလေးအနက်ထားပြီး တွေးထားခဲ့ခြင်း မရှိသောကြောင့်ပင်။ သူ အရူးလုပ်ခံလိုက်ရသလို ခံစားနေရသည်။ ယွီဖုန်းချန်က ဒီနေရာကို ခဏဝင်တည်းခိုရာ နေရာဟုသာ သဘောထားသည်။ သူ မကြာခင် ထွက်သွားရမည်ဆိုတာကို သိနေလျက်နှင့် သူ့အား နှိုးဆွဖို့ လုပ်နေသည်။ ဆိုတော့ သူဆိုသည်မှာ ယွီဖုန်းချန် ဒီနေရာမှာ ခေတ္တခိုနားနေချိန်အတွင်း အပျင်းပြေစေမည့် ပစ္စည်းလေးပင်။