Xiao Bai Yang ||Myanmar Translation||

14

[Unicode]

"ငါ့ပုံစံက အဆင်ပြေနေပုံ ပေါ်လို့လား။"

ပိုင်ရှင်းယွီ နောက်ဆုံးမှာတော့ သူ့အစ်ကိုက သူ့ကို စစ်တပ်ထဲ တစ်သက်လုံးနေဖို့ ပြောပြီး ဖုန်းချသွားမှန်း သဘောပေါက်သွားတော့သည်။ ထိုခဏလေးအတွင်းမှာ သူ အဆုတ်ကွဲအက်သွားသည်အထိ အော်ငိုပစ်ချင်မိသွားသည်။ သို့ပေမယ့် သူ ချုပ်တည်းထားလိုက်သည်။ တကယ်တမ်းမှာ, သူ့အစ်ကိုအကြောင်း သိသူပီပီ သူ့စိတ်ထဲတွင် မျှော်လင့်ချက် များများစားစား မရှိ။ သူ့အစ်ကိုက အမြဲ ဆုံးဖြတ်ချက် ခိုင်မာသူ ဖြစ်ပြီး သူ အကြင်နာမဲ့ဖို့ ဆုံးဖြတ်လိုက်ပါက သူနှင့် ပတ်သတ်သော လူများက ပါဝင် ကူပြောရင်တောင် အကျိုးထူးမှာ မဟုတ်။ အခုလေးတင် ကြားလိုက်ရသည့် သူ့အစ်ကို အသံအရဆိုလျှင် သူနှင့်သာ မျက်နှာချင်းဆိုင် တွေ့ပါက ပိုင်ရှင်းယွီ သူ့အစ်ကိုရှေ့တွင် ဒူးထောက်လျက်သား ဖြစ်သွားလေ့မည်ဟု ခံစားမိနေသည် ...

တာဝန်ကျလို့ စောင့်နေရသည့် တပ်သားလေးက သူ့အား ရူးနေတဲ့ လူတစ်ယောက်လို ကြည့်လာသည်။

"ရဲဘော်၊ မင်း အဆင်ပြေရဲ့လား။"

ပိုင်ရှင်းယွီ သူ့နှာရည်နှင့် မျက်ရည်များကို ပွတ်သုတ်ပြီး ပြောလိုက်သည်။

"ငါ့ပုံစံက အဆင်ပြေနေပုံ ပေါ်လို့လား။"

"အေး .. အေး၊ ဆက်ငို ဆက်ငို။ ငါ အပြင်ဘက်မှာ ဆေးလိပ် သွားသောက်လိုက်ဦးမယ်။" သူ နောက်ဆုံးမှာတော့ ကောင်လေးတစ်ယောက် ငိုနေတာကို မကြည့်နိုင်တော့ပဲ ထထွက်သွားတော့သည်။

ပိုင်ရှင်းယွီ ဖုန်းကိုင်ထားရင်းနှင့် သူ့အိမ်ဖုန်းနံပါတ်က သူ့အတွေးထဲ ဝင်လာသည်။ သို့ပေမယ့် သူ့လက်ချောင်းများက သံချေးတက်နေသည့်အလား ဘယ်လောက်ပဲ ကြိုးစားပါစေ၊ သူ့အိမ်ဖုန်းနံပါတ်ကို ရိုက်မထည့်နိုင်။ သူ သူ့အမေအသံသာ ကြားလိုက်ပါက သူ့ကိုယ်သူ ထိန်းချုပ်နိုင်တော့မှာ မဟုတ်။ .. သို့ပေမယ့်လည်း သူ့ကိုယ်သူ မထိန်းချုပ်နိုင်တော့ကော ဘာလုပ်လို့ ရမှာလဲ။ သူ့မိဘတွေက သူ့ကို အကြင်နာတရားမဲ့စွာ တပ်ထဲကို ပစ်ထည့်ခဲ့ပြီးပြီ။ သူတို့က သူ့ကို ပြန်လာခွင့် ပေးမှာ မဟုတ်။ ဒီဖုန်းခေါ်ဆိုမှုက သူ ခေါ်သည်ဖြစ်စေ၊ မခေါ်သည်ဖြစ်စေ၊ ရလဒ်က ပြောင်းလဲသွားမှာ မဟုတ်။ အကယ်၍များ သူ ဖုန်းခေါ်လိုက်ပါက, ည မအိပ်နိုင်ဖြစ်သည်အထိ ခံစားရမည်မှာ သူတစ်ဦးတည်းသာ။