"တံခါးကို လော့ခ် မချထားဘူး။ မင်းတို့ ကြိုက်တဲ့အချိန် ထွက်ခဲ့လို့ရတယ်။ ဒါပေမယ့် ခန္ဓာကိုယ်ကို တံခါးအပြင်ဘက် လက်ချောင်းတစ်ချောင်းစာလောက်ပဲ ထွက်ရသေးတာဆိုလည်း ပြိုင်ပွဲက ရပ်နားထွက်လိုက်ပြီလို့ ငါတို့ဘက်က သတ်မှတ်တယ်။"
လူကိုးယောက် အလျင်အမြန် လူစုခွဲပြီး မျက်လုံးများကို တင်းတင်း မှိတ်ထားလျက် နှာခေါင်းများကို ဖိပိတ်ထားလိုက်သည်။
မျက်ရည်ယိုဗုံးအတွင်း ပါရှိသည့် အငွေ့ပျံလွယ်တဲ့ ဘရိုမိုင်းဓာတ်ငွေ့ရည်က အခန်းငယ်လေးအတွင်း အလျင်အမြန် ပျံ့နှံ့သွားသည်။ မျက်လုံးစုံမှိတ်ကာ နှာခေါင်းပိတ်ထားခြင်းက အကျိုးသက်ရောက်မှု သိပ်မရှိ။ မကြာခင်မှာပဲ ကျိန်းစပ်စပ် ဓာတ်ငွေ့များက သူတို့မျက်လုံး၊ နှာခေါင်းများနှင့် လည်ခေါင်းတစ်လျှောက် ထိုးဖောက်ဝင်ရောက်လာတော့သည်။
ပိုင်ရှင်းယွီ အပြင်းအထန် နံရံထောင့်သို့ တိုးဝင်သွားဖို့ လုပ်ပေမယ့် သူ ကြိုးစားသမျှ အရာရာက အချည်းနှီးဖြစ်မည်မှန်း သိလို့နေသည်။ ကျိန်းစက်မှု အမြင့်ဆုံးအတိုင်းအတာရှိနေသည့် ဓာတ်ငွေ့များက သူ့မျက်နှာအစိတ်အပိုင်းတစ်ခုချင်းစီ အလုအယက် ရောက်ရှိလာပြီး သူ့မျက်လုံးများက စူးချဉ်လာပြီး မျက်ရည်များလည်း လိမ့်ဆင်းကျကာ အပြင်းအထန် ချောင်းဆိုးတော့သည်။
အခန်းအတွင်း ချောင်းဆိုးသံများ၊ နှာရှုံ့သံများဖြင့်သာ ပြည့်နှက်နေသည်။ စက္ကန့်နှစ်ဆယ်အတွင်းမှာပဲ လူကိုးယောက်လုံး ထပ်မတောင့်ထားနိုင်တော့။ သူတို့အကုန် အော်ဟစ်မြည်ကြွေးလျက် ကြမ်းပြင်ပေါ် လူးလှိမ့်နေရတော့သည်။
ပိုင်ရှင်းယွီ မေ့လဲတော့မလိုတောင် ခံစားနေရသည်။ သူ အခုဖြစ်နေသည့် ခံစားချက်ကို မဖော်ပြနိုင်။ နာကျင်ခြင်းနှင့် နေရခက်ခြင်းဆိုတာထက် ပိုသိသာထင်မြင်စေသော စကားများ မရှိတော့သောကြောင့်ပင်။ သူ့မျက်ရည်များနှင့် နှာရည်များက မျက်နှာတစ်လျှောက် စီးကျလို့နေပြီး ချောင်းဆိုးလွန်းနေတာမို့ ခါးတောင် ဖြောင့်ဖြောင့်မထားနိုင်တော့။ အသက်ရှုသွင်းလိုက်မိတိုင်း နောက်စက္ကန့်အတွင်း သေတော့မတတ်တောင် ခံစားရစေသည်။ ဒီ လူမဆန်အောင် ညှည်းပန်းနှိပ်စက်ခြင်းနည်းလမ်းက သူတို့လွန်ခဲ့တဲ့ သုံးရက်အတွင်း ကြုံခဲ့ရသည့် နာကျင်မှုများကတောင် မယှဉ်နိုင်။ တစ်စက္ကန့် ကုန်ဆုံးသွားဖို့က ဆယ်စုနှစ်တစ်ခုလောက်နီးပါး ကြာမြင့်နေလေသည်။
YOU ARE READING
Xiao Bai Yang ||Myanmar Translation||
Mystery / ThrillerThis is just a translation work. It doesn't belong to me. My Little Poplar [小白杨] Author - 水千丞 [Shui Qian Cheng] Total Chapters - 115 chapters + 4 Extras