"ပြန်သွားပြီး အဝတ်အစားတွေ ထုတ်သိမ်းထား။ ကားက တစ်နာရီနေရင် ရောက်လာလေ့မယ်။ ညွှန်ကြားထားတဲ့အတိုင်း သက်ဆိုင်ရာကားနောက်ကို တက်ပြီးလိုက်သွားကြ။"
"ဟုတ်!"
လူစုခွဲခိုင်းပြီးချိန်မှာတော့ ပိုင်ရှင်းယွီ ဖုန်းသုန့်ယွမ်အပေါ် ခုန်အုပ်ကာ ဖက်လိုက်သည်။ "အချစ်လေးရေ၊ မင်းကောကောက မင်းနဲ့ တပ်ခွဲတစ်ခုထဲ ကျပြန်ပြီ။ ဟားဟား"
ချန်းလျန်လည်း ပြုံးပြီးပြောလိုက်သည်။ "အရမ်းကောင်းလွန်းတယ်။ ငါတို့ အဖွဲ့မတူရင်တောင် တစ်ဆောင်တည်းမှာပဲ ရှိနေကြမှာ။"
"ဟုတ်တယ်၊ တကယ်ကောင်းလွန်းတာပဲ။ ငါတို့တွေ နောက်ဆို အတူရေချိုး၊ လေ့ကျင့်ခန်း အတူလုပ်ပြီး ကန်တင်းအတူတူသွားလို့ ရပြီ။" ဖုန်းသုန့်ယွမ် ပျော်ပျော်ကြီး ဆက်ပြောသည်။ "ကြည့်ရတာ တပ်မှုးက မင်းလုပ်ဆောင်မှုအပေါ် အတော်စိတ်ကျေနပ်သွားပုံပဲ။ မဟုတ်ရင် မင်းကို သူ တပ်ခွဲ(၃) ခေါ်မှာ မဟုတ်ဘူး။"
ပိုင်ရှင်းယွီ အောင်ပွဲခံလိုက်သလို ပြုံးလိုက်သည်။ "ကြည့်ရတာ ငါ့ရဲ့သေနတ်ပစ် စကေးကို ကြွေသွားတာနေမယ်။"
လူတိုင်း အဆောင်ကို ပြန်သွားပြီး သူတို့အဝတ်အစားများကို စတင် ထုတ်ပိုးလိုက်ကြသည်။ သုံးလကြာအောင် နေပြီးချိန်မှာတော့ ဒီနေရာမှာ လွမ်းဆွတ်စရာဆိုပြီး ရှိမနေပေမယ့် ဘယ်လိုပဲဖြစ်ပါစေ ဘဝမှာ စစ်တပ်ဆိုသည့် နေရာကို ပထမဆုံး ဝင်ရောက်ခဲ့ပြီးနောက် နေထိုင်ခဲ့ရသည့် အဆောင်ဖြစ်သည်။ ဒါက လူတော်တော်များများအတွက် တစ်ဘဝလုံးစာ အမှတ်ရစရာတစ်ခုဖြစ်လာမည်ပင်။ ထို့ကြောင့် သူတို့ ထုတ်ပိုးပြီးသည်နှင့် အဆောင်ခန်းနှင့် ရေချိုးခန်းကို အတူတကွ ရှင်းလင်းလိုက်ကြပြီး နောင်ရောက်လာမည့် တပ်သားသစ်များအတွက် အဆင်ပြေပြေ ရှိနိုင်အောင် အရာအားလုံးကို နေရာတကျ ပြန်ထားပေးခဲ့ကြသည်။
ရောက်ရှိလာသည့် စစ်ကားများဖြင့် တပ်သားသစ်၂၀၀က သူတို့သက်ဆိုင်ရာ တပ်ခွဲများဆီသို့ လိုက်ပါထွက်ခွါသွားကြသည်။ တကယ်တော့ စစ်တန်းလျားအသစ်များနှင့် တပ်ခွဲများက တပ်နယ်မြေတစ်ခုထဲမှာပဲ ရှိသည်ဆိုပေမယ့် စစ်တပ်နယ်မြေက ကျယ်ပြန့်လှသည်။ ထို့ကြောင့် လေ့ကျင့်ရေးစခန်းမှ သက်ဆိုင်ရာ တပ်ခွဲများဆီ ရောက်ရန် ဆယ်မိနစ်ခန့်မျှ မောင်းနှင်လိုက်ရသည်။ သူတို့အားလုံးအတွက် စစ်တပ်အတွင်း ဝင်ဖူးတာ ဒါပထမဆုံးဖြစ်သည်။ သူတို့ကားပေါ်မှ ဘေးဘီကို ကြည့်နေရင်း ရှေ့လျှောက်ကြုံတွေ့လာရတော့မည့် တရားဝင်စစ်သားနေ့ရက်များကို တွေးတောနေမိတော့သည်။
YOU ARE READING
Xiao Bai Yang ||Myanmar Translation||
Mystery / ThrillerThis is just a translation work. It doesn't belong to me. My Little Poplar [小白杨] Author - 水千丞 [Shui Qian Cheng] Total Chapters - 115 chapters + 4 Extras