طوبى الجزء الاول

الجزء الرابع والخمسين

#طوبى "أقحوان وفلة وياسمينه"
#جمان_فريد
#الجزء_الرابع_والخمسين"30يناير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
وروحوا ضيوف طوبى..
وقعدا ضم في الحوسه والجالي يساعد فيها..
طوبى:بإذن الله عزومتهم يوم الخميس..
الجالي وهو رافع سفرة الشاهي:وبديري لأمي العصبان اللي خاطرها فيه..
طوبى بإبتسامه مجامله:ايه..
مشي للكوجينه وهي وراه تقول..
طوبى:تربح فيا كان تغسلهم جولي بنركب نقرا..
الجالي حط السفرة ع الرخامه وقال:بري اقري..بس هاه ردي بالك تقولي الجالي غسل ماعين.
ضحكت وقالت:باهي تو نقول..
ومشت..
الجالي بصوت عالي:نوريك يافكرونه بعدين..
سمع ضحكتها ابتسم وبدي يغسل في ماعين الشاهي..
وهي ركبت فوق وخشت لدار النوم..
مشت لشنطتها بتاخدها..
سمعت صوت تليفون الجالي يرن..
شبحتله..كان ع الزيانه..
مشت تشوفه..
وقفت عليه..لقت..
أحمد حميدا يتصل بك...
حست بضيق رهيب..
خلاها تبي تفتح المكالمه..
بس من الخوف ماقدرتش ديرها..
فصلت المكالمه..
هي مسحت بيدها ع نص وجهها بعدين قعدت تقول؛تعوذي من الشيطان خلاص..هذا وسواس فوتيه..
وكيف جت بتمشي..
سمعت نغمه الرساله..
طول شافت للتليفون..
كانت واضحه من الستار..
(كلمني)
كلمه مش واضح منها شي..
بس طوبى فسرتها زي ماتبي هي..
"صاحبه ويبيه في شي ضروري واضحه ياطوبى..ماتخليش الشيطان يسيطر عليك ويخرب عليك عيشتك.."
ومشت بسرعه طلعت من الدار بطريقها للمرسم وكأنها هاربه..
خشتله وسكرت عليها..
وبدت تقرا في سورة الناس وهي تجهز في المكان للقرايه..
🍃والجالي ركب لدار النوم ..
خشلها وجي للتليفون..
خداه وشاف مكالمات نجاة ورسالتها..
طول مشي طلع من دار النوم وتوجه لمكتبه بعد ماشاف للمرسم..
خش للمكتب وسكر بابه بالمفتاح..
واتصل بنجاه..
مالحقش ينادي انفتح الخط..
"حبيبي"
الجالي؛نعم..
"شن الجفاف هدا!؟"
الجالي:مليار مرة نقولك معاش تتصلي بيا في الحوش..
"كلمتك نبيك في حاجه ضروريه بنمشوا لحوش مروة جايينها مالي راجلها تبينا نعاونوها"
الجالي؛باهي بري..لكن بيتان لا نجاة..
"ياودي عارفه..وينك انت"
الجالي:في المكتب..
"تخدم ع تصميم المبنى الاداري"
الجالي:توا بنبدا فيه..
"تمام بعتتلك صور لتصاميم اني درتها وقولي شن رايك"
الجالي؛تمام...تشاوات..
"نحبك"
الجالي:واني اكثر..
وسكر عليها..
بعدين مشت قعمز ورا المكتب فتح اللاب توب..
جوه الرسايل ع البريد الالكتروني..
فتحهم وقعد يشوف في التصاميم..
كانت متقنه وفيها ابداع واضح..
عجبوه بس في نفس الوقت حس بضيق..
طلع منهم....
وقعد يشبح للشاشه وهو يفكر..
بعدين ضم شواربه لداخل ورخاهم..وبدي يشتغل ع التصميم..
☘☘☘☘☘
"فتحت عمته معاي الموضوع ليلة البيان الحق مابيتش ندوي معاك فيه عارفه ردك"
سدرة بضيق:عطيت كلمة لطوبى مانقدرش نولي فيها..
مطيره:الكلام هدا سمعتيه الف مرة وبنعاود نقوله عيشي حياتك بنتي خلاص كبرتي وخياتك وعطتيهم وهنيتي عليهم هني ع روحك وهنينا عليك..
سدرة بشي من الحزن؛عمتي اني مش صافيه وفيا حاجه مش مزبوطه مانيش عارفه تعب نفسي عضوي..عين سحر مش عارفه..يعني الراجل بعد ماياخدني يقعد يعاني فيا..
مطيره:ومرات ربك يخليك تبري ع ايديه..
سكتت سدرة وهي تفكر...
وعمتها قالت:صلي استخارة وتوكلي ع الله..
هزت راسها بالموافقه وفي داخلها قلق من الموضوع..
🍃وفي هالوقت..
بوها مشي المهدي وعبد القيوم لحوش البنت اللي يبيها الأخير..
كان عبد القيوم متحمس ع الآخر..
وقاعد عقله يتخيل في ماهو ابعد من زيارة اليوم..
النظرة الشرعيه..الخطوبه...الزواج..
عبد القيوم كان متفائل لأبعد حد...
☘وصلوا للحوش..
نزلوا من السيارة وهما يهدرزوا ع المنطقه..
بعدين دق لطفي ع الباب..
شويه وطلع واحد من خوت عبير عمره مايفوتش 16سنه..
بعد السلام سألوه عن بوه..
:قاعد تفضلوا..
لطفي؛بلغه قبل ولدي..
؛خشوا قبل مايجيش تقعدوا واقفين هكي..تفضلوا..
هما خشوا وقعدوا يقولوا بأصوات متقطعه:يزيد فضلك..بارك الله فيك...
سكر الولد الباب ومشي خش داخل يبلغ بوه..
وهما قعدوا يستنوا..
عبد القيوم كان يشوف في تفاصيل الجنان اللي كان كله مزلز
مافيشي اي شي مميز زيه زي هلبه جنانات لهلبه حياش..
بس هو قعد يتخيل في أم العيون الحايرة وهي تمشي فيه..
ضم فيه..تكنس فيه..
شاف للحوش..ودقات قلبه كل مالها تزيد تقوا كل مايخطر عليه ان اللي يفضل بينه وبينها بين حلمه الوحيد كلمة موافقه..
جي الراجل..
سمع صوته وهو يقول:اهلا وسهلا..
سلم عليهم كلهم..بعدين دخلهم لحوشه من غير مايسألهم من يكونوا...
☘☘☘☘
"انتي منظمة امورك بروحك...وتصرفتي منك ليك"
نسرين؛عارفته مش حيطلق بالساهل وعارفتكم انتم بتوقفولي فيها عندكم نقعد معلقه ولاتخشوا محاكم..
محمد شنيبه:اني كنت بنتفاهم معاه ونخليه يطلقك يبي نسرين:يابوي اني نعرف حامد اكثر منكم نعرف كيف يفكر خليني بالله نمشي فيها ونفتك منه بسرعه..
محمد وهو عاقد حواجبه بغضب:شن هي القضيه اللي رفعتيها..
نسرين:في الاول جيت بترفع دعوى طلاق ضرر بعدين غيرت لإستحاله العشره لأنها ماطولش..
محمد:ومن وكلتي محامي ولامحاميه؟
نسرين:محاميه يابوي..جارتنا نبيله..
ارتبك بعض الشي وقال وهو يهز في راسه:نبيله..
نسرين:محاميه ممتازة مافيش قضيه خسرتها..
شبحلها شويه بعدين قال:تعرفي مكان مكتبها؟
نسرين:ايه..في نادي الاتحاد..
محمد؛عطيهولي كامل .
نسرين:قصدك بتمشيلها!؟
محمد:ايه بنزيد نفهم منها وضعك..وبنسأل ع وضع خوك..
نسرين بإستغراب:من خوي؟
محمد:عمر..
بإستغراب اكثر:وعلاش بتسألها بوي؟
محمد؛مادخلكش بيه الموضوع هدا..هيا اعطيني النعته لمكتبها..
نسرين بريبه:حاضر..
☘☘☘☘☘
"عبد القيوم سمعت عنه وبعدين عرفته وجاورته وشفت اخلاقه وعرفت معدنه نعم الرجل ونعم التربيه"
والد عبير:الله يبارك..انت من وين في الشرق؟..
عبد القيوم بإبتسامه؛انا من الجنوب الشرقي مش من الشرق..من الكفرة...لكن قعدتي فترة دراستي في بنغازي..اصولي تارقيه..
الراجل وهو متفاجئ:انت تارقي؟
عبد القيوم وهو مبتسم:ايه..
لون وجه الراجل تغير بس قعد محافظ ع ابتسامة المجامله وهو يقول:بالجودة..
عبد القيوم:بيك اجود..نبي نقولك اني نا الحمد لله مرتاح ماديا..ولو ع السكن حيكون في طرابلس ولو تبوا قريب عليكم ماعنديش مشكله..ولو حصلت مواقفه مبدئيه نخبر هلي يجوا هنا ونديروا خطبه رسميه بإذن الله..
الراجل هز راسه مسايرة..
والمهدي لاحظه وتكلم طول:لما يجيني حد يبي يناسبني ونشوف جيرانه جايين معاه نعطيه طول من غير مايفكر اللي جايين معاه جيرانه مش خوته ولابوه ولاحد من اهله شهادته فيه مجروحه..اني مأجرله الشقه اللي قاعد ويشهد الله اني من يوم عرفته عرفته راجل وجدع ومش حتلقى بأخلاقه في وقتنا هدا عمله نادرة اللي زي عبد القيوم..
لطفي:ونزيد ع كلام المهدي ان صديقي اللي كان مأجرله في بنغازي لما كلمني عليه قالي مافيش منه في جيله..وهدا في عمله سألت عنه وممكن هادي حاجه اول مرة يسمعها مني مافي حد ماشكرلي فيه وفي اخلاقه..
عبد القيوم وهو مبتسم بإحراج؛بارك الله فيكم..
والد عبير:ربي يحفظك ويكثر وأمثالك..ع العموم موضوع زي هدا الراي الاول والاخير فيه لصاحبة الشان نشوفها ونرد عليكم ان شاء الله..
عبد القيوم؛خلاص نعطيك رقمي...
الراجل مسايرة خدي رقم عبد القيوم اللي كانت واضحه فيه اللهفه مهما حاول يدرقها..
من حبه الشديد لأم العيون الحايره..
من توقه وشوقه انها تكون حلاله ماباش يشوف لأي شي ممكن يحبطه..
شي اللي شافوه لطفي والمهدي ..
~~~~~~~~
لطفي وهو يتعشا:من لما قاله اصلي تارقي الراجل وجهه تغير..
مطيره:وجعني مسكين بيردوه ع هكي..
سدرة؛معليشي بس  ماينلاموش..هو مافيشي مايتعيب بس في اعتبارات تانيه مهمه..العرق تقارب العادات والتقاليد..
لطفي:الرسول قال لافضل لعربي ع اعجمي الا بالتقوى..والراجل ليبي مسلم ساد..
سدرة؛مش عارفه بوي..بس في المواضيع هادي اني نفضل ان العربي ياخد عربيه والجبالي ياخد جباليه والتارقي ياخد تارقيه منهم  فيهم بش مافيش حد يحس بروحه غريب وسط بيئة التاني..
مطيره:قنعني كلامك..
لطفي:واني قاعد مش معاه ولو كانوا طوبى وولاغرفه قاعدات وطلب وحده فيهم نعطيه من غير مانرد عليها الشيرة..
☘☘☘☘☘
"وجهه انقلب اول ماقاله تارقي"
عائشه:زي ماتوقعت..
المهدي:تعرفي لو رده بنمشيله وبنسمعه وسخ وذانه..
عائشه:لامهدي مش هكي..الزواج قسمه ونصيب مش بالغصب.
المهدي:الراجل يبي البنيه من جده كان تشوفي كيف كان ملهوف اليوم..تي الراجل سيب بلاده وناسه وجي هني ع خاطرهامش عارف كيف بيتحمل الكسرة اللي بتصيرله لما يردوه..
عائشه؛ربي يجبره ويعوضه بخير منها..
المهدي؛اني نعرفه معاش يتزوج بكل كان دارها بيظلم بنت ناس تانيه معاه يعيش معاها جثة وقلبه مع غيرها..
الكلام كان سكين انغرس وسط جرح قلب عائشه وزاد فتحه..
هو استاقظ لروحه شن قال قعد يشبحلها..
شاف دموعها في عيونها وهي تقول:ربي يفرج عليه..خل نمشي نوتيلك عشاك..
ومشت طلعت من حداه..
بعد مافاتت من جنبه هو غمض عيونه بشده من الأسف بعدين فتحهم وشبح للروشن الدار وهو مضايق..
☘☘☘☘☘
والتارقي..
كان في الجنان يشوف في الاقحوان كان منظره حلو بالمره..
يفكر فيه بيها...كأنه مقعمز قدامها ويتأمل فيها..
قطع عليه لحظة هالتأمل صوت حسين وهو ينادي..
"تارقي"
~~~~~~~
حسين بإبتسامه فرح؛فرحتلك والله ربي يتمم ع خير..
عبد القيوم رفع حاجبه؛اهم شي تكون متفكر كلامك..
حسين وهو مبتسم:عندي كلمتي ياتارقي الفاتحه متاعك من بابها لمحرابها عليا..
ضحك وقال:مش قايلك نبصر معاك راهو..
حسين؛حتى كان قلتها...
ضحك..بعدين تنهد  وقال:تعرف انا اللي صبرت سنين طويله مش قادر نصبر كم يوم..
حسين؛هدا وقت الصبر هو...
عبد القيوم:ماصبرت الا واجد لين مل مني الصبر...نبي نكمل كل شي بسرعه..نبي الفرح قبل رمضان..مانبي منهم شي نبيها هي بس..
ابتسم حسين وقال:هانت خلاص..
عبد القيوم؛يارب..بعدين شبح لحسين شويه وقال..شن عندك..؟
تنهد حسين من وسط قلبه وقال:شن ماعنديش ياتارقي..الحمد لله ع كل حال..
عبد القيوم:كان تبي تحكي نسمع..
حسين ابتسم وقال:اني جيتك نشوف كان عندك اخبار حلوة تخليني نفرح شويه..والله مستاحش نفرح ياتارقي وفي حياتي مافي شي يفرح والحمد لله..
ابتسم عبد القيوم وبدي يقول..
بكرا تروق..
قعد يشبحله وهو منصت..
وعبد القيوم كمل يقول..
بكرا اتروق ،،،
ماينسى الخالق فالحياه مخلوق
توكل على ربك اوبكرا اتروووق.
.
مايدوم الحال ،،،
لوطال     همك   فالحياه  لوطال
بكرا الفرج باذن الله الكريم اتنال
هذا وعد من ربي اتنال    احقوق

ماتقول.     ضاع العمر ...لا مزال
ماملي      كيفك...  ابقي مخنوق

واليوم   متريح    هنى ..    البال
ماتخاف الحياه مدام   ربك فوق
بكرا تروق..
حسين بإبتسامه:سلمت..
عبد القيوم هز راسه وهو يشوفله بإبتسامه..
☘☘☘☘☘
تاني يوم..
الساعه 10:00صباحا..
في كلية الاقتصاد..
كان نضال يعطي في محاضرة..
مرته وحده من الطلاب اللي يحضروا فيها..
تمت وطلعوا الطلبه..
وقعدت هي أخر وحده..
لما شيتاتها ولبست شنطتها ومشتله..
نضال:راك تقولي جعانه..نذبحك..
اريج:جعانه وبنموت الجوع وماتعشيتش امس بطني طول محاضرة مفتوحه فيها جبهه..نبي ناكل يعني نبي ناكل.
نضال:وبعدين ناديك كستنا..
اريج:ناديني حتى لوز خزايني..
ضحك ولبس شنطته متاع اللاب توب وخدي يدها ومشوا طلعوا مع بعض..
اريج؛تعرف قالتلي صاحبتي يعلقوا ع الحركه هادي هلبه..
نضال:فوتيهم المتخلفين ماندورش فيهم المهم ربي راضي الباقي طزز..
اريج:وخيتي سلمه راجلي السخصيه..
نضال بإبتسامه:شن خاطرك تاكلي..
اريج:بيتزا وطابونه..
نضال:والله غير البيتزا ماخاشه بطنك حاجه ياهامه..
اريج:حي عليك نضال كان تطلع واحد قفاص ياهمي.!
نضال؛تو بتخليني نقول دوة مانحبهاش..تعرفيني مش هكي معاش تستفزيني...
اريج:باهي خودلي طابونه معاها  جعانه..
نضال:تعالي هكي..حطها وراه وهما يمشوا لما جو شباب فايتين..
وبعد فاتوا ردها جنبه..
اريج:هاه شن قلت..
نضال؛باهي ياكستنا..
قعدت تضحك..
نضال؛مكسراتي..قررت قرار لارجعة فيه..
اريج:قرار شني اسم الله!
نضال:عيوناتي بتسيبي الخدمه في المصحه..
اريج بضيق:تو مش تفاهمنا عليه الموضوع هدا؟
نضال:اني ماعنديش مشكله في الخدمه..اني عندي مشكله ع السبب تخدمي غ خاطره..وانت توا قلبي مراة في ذمة راجل هو الملزم بيك..
اريج:نضال..
قاطعها وقال؛حبيبي الموضوع منتهي خلاص انتي تفرغي للقرايه وبس واي شي ناقصك اي شي تبيه مش مسامحك تسكتي وماتقوليش..نغضب عليك ياأريج..
ضحكت وقالت؛بلا أوفر خلاص تو نسيب بس خليني نكمل الشهر هدا معاش قعد فيه شي 8 ايام بس..
نضال:Ok
وصلوا الكافتيريا وخشوا الزوز.
🍃وفي كل تانيه بعيده..
كانت طوبى مقعمزة مع صاحباتها يهدرزوا في موضوع مهم
"تارقي!"
عبير:تخيلوا..تارقي معاش لقيت من تزوج خلاص والله نقعد مضحكة العيله..
:حتى هو جريء صراحه وواثق من روحه..
:الحق اني اول مرة نسمع بوحده خطبها تارقي..
طوبى:باهي لحظه اني مش عارفه وين المشكله وكانا تارقي ليبي زيه زينا..
عبير:لامش زينا ياطوبى..اني سمعت ان هلبه منهم مجنسين..
طوبى:دوة فاضيه التوارق زيهم زي الجباليه في هالبلاد مش عرب لكن ليبين أبا عن جد..
عبير:حتى لو كانوا ليبين مستحيل ناخد تارقي هدا اللي ناقص..
:باهي وبوك شن قاله؟
عبير:قال انحرجت من الرجاله اللي جو معاه واحد منهم قال معروف في البلاد والله ماعاد نجيب اسمه بالك الهادي زليطني وعيلته معروفه قتله نردوا الشيره ع صاحبة الشأن ونرد عليك..بيفوت ايام بعدين يكلمه..
طوبى؛باهي شن بيقوله؟
عبير:السبله المعروفه البنت ماتفكرش في الزواج وتبي تقرا..
طوبى بضيق:حسه وجعني مسكين..
:صراحة حتى اني شكله يعرفك ويبيك..
عبير:ربي يرزقه بوحده تناسبه..
تنهدت طوبى وشافت لساعة التليفون بعدين قال:هي نوضوا معاش مازال ع المحاضره..
ناضوا البنات..
وطوبى ساعدت عبير بش تنوض ومشوا مع بعض..
☘☘☘☘☘
في مدرسة الاشراق الخاصه...
اللي تملكها سدرة الواعر..
وقت الحصص والساحه فاضيه.
لمت صاحباتها وقعمزوا فيها ع كراسي يهدرزوا في موضوع مهم..
نسرين ودموعها ينزلوا:عمته نتصل بيها رقمها مسكر شكله اشبح شن دارلها بش سكتها اللي درته كله راح ع الفاضي..
فايزة وسدرة قعدوا يشبحولها بضيق..
نسرين:بالله عليك فايزة انتي اوقفي معاي بالله عليك..اشهدي باللي داره معاك الكلب هدا..بالله عليك..
سدرة شبحت لفايزة بعدين شدت ذراعها..
بلعت فايزة ريقها وقالت؛باهي..
نسرين وهي مندهشه:بالله حق..!
فايزة ودموعها في عيونها؛ماتهونيش عليا..
ناضت نسرين وضمتها وهي تقول:ياعمري قداش فرحتيني..
وسدرة تمرر في نظرها عليهم وهي مبتسمه..
☘☘☘☘
وفي مكتب المحاميه نبيله..
كان محمد شنيبه ضيف مفاجئ جدا بالنسبه ليها ماتوقعتش حضوره..
محمد وهو حاط رجل ع رجل ويشوفلها بإبتسامه؛ارتحت لما عرفتك ماسكه قضيه بنتي وجيتك نبي نستفسر منك اكثر...قداش وقت تاخد الدعوة؟
نبيله؛ماطولش اقصى حد سته شهور..
محمد؛باهي نسرين ضروري تحضر؟
نبيله:لو استدعاها القاضي..
هز راسه وقال:ان شاء الله مايستدعيها ..
نبيله: العيب مش في خشة المحاكم حاج محمد العيب في سكاتكم ع عمايل نسيبكم واجبار بنتكم انها تكمل معاه وكرامتها مهدورة خوف من الطلاق..
شبحلها شويه بعدين:صح غلطنا لكن نيتنا واضحه مانبوش صغار بنتنا يتشردوا..
نبيله:هادي المشكله لازم يستخدموا الصغار كوسيله ضغط ع المراة..
محمد:اني مش قد كلامك يااستاذة هدا علاش بنطلع من الموضوع هدا بنخش في موضوع تاني..
نبيله:اللي هو؟
محمد؛اكيد واصلك اللي صار بين ولدي عمر ومرته..
نبيله قعدت تشبحله بدون ماتبدي ردة فعل..
محمد؛اني نبي ولدي يطلقها..لكن من غير ماتاخد منه قرش واحد..
ابتسمت يتعجب وقالت؛كيف!.
محمد؛مرت عمر كان تكسر في كلامه وماتبيش تمشي في طوعه لما كلمها تغير التخصص اللي تقرا فيه..واني الحق بعد مشيت وشفت بعيني كيف تخدم وسط التريس وتهدرز وتضحك معاهم عرفت علاش ولدي حمق هالحمقه وضربها..برغم اني ضد اللي داره مفروض طلقها وقتي ولادخل روحه في متاهات..
نبيله؛معليشي ياحاج كلامك في حق المراة بالشكل هدا يعاقبك عليه القانون واني مانقبلاش..
محمد؛هذا كلام بيني وبينك ياأستاذة معليشي..المهم توا ماتقدريش تساعدينا؟
نبيله:لا..
ناض وهو بقول بإبتسامه؛باهي بارك الله فيك اللي وهبتينا من وقتك..
نبيله هزت راسها وهي مبتسمه بالغصب..
هو قال:السلام عليكم.
ومشي بيطلع  وهو يقول: ان شاء الله مش أخر مرة.
قعدت تبع في بعيونها لين طلع بعدين وقالت بحمق:هدا وين تأكدت ان ولده هو اللي ماينفعش مادام هدا بوه...
☘☘☘☘
"إياد مرة تانيه؟!"
سدرة بآبتسامه:ايه وشكلها التانيه ثابته..
فايزة :جديات!..
هزت راسها وهي مبتسمه..
نسرين؛احسن حاجه درتيها لعمرك..
فايزة؛مافي حد يستاهلك كان اياد اللي وين يشوفني ينشدني عنك..
نسرين؛والله فرحت من قلبي واخيرا ياسدرة..
تنهدت وقالت؛ان شاء الله خير..
الزوز قالوا؛يارب...
🍃وقبل الاستراحه..
ولت فايزة لعملها..
والمهدي جي لنسرين بش يروح بيها..
نسرين:الحمد لله رضت تشهد معاي .
المهدي:كويس..
سكتوا شويه بعدين قال:شن حال اللي كنتوا عندها..
نسرين؛كويسه..الحمد لله..
تنهد من قلبه وقال:نحلم بيها الفترة الأخيره..
نسرين:تحلم بيها؟
المهدي؛احلام ماطمتش ومانبيش نحكيها..مرات نفكر ونقول ربي يبعتلي في الاحلام هادي بش يعذبني اللي درته فيها..
نسرين؛انت مادرت شي مهدي سدرة بإرادتها اختارت وضعها..
المهدي بضيق:كان فهمتها وراعيتها وصبرت عليها راهو ماكانش هدا حالنا..
نسرين:خلاص بطل تلوم روحك كله نصيب..ربي مش كاتبكم لبعض..انتي نصيبك في عيشه وهي نصيبها في غيرك..
عقد حواجبه وقال:من غيري!؟ قصدك جاها موضوع هي!؟
نسرين بنفاد صبر:ايه جاها موضوع مهدي خلي المراة تعيش حياتها زي ماانت عشت حياتك ودرت صغار..
هو بهدوء مخيف:مني!؟
نسرين؛مش ضروري تعرف..
المهدي بحده:نسرين!..
تنهدت بملل وقالت؛الدكتور إياد..
شد فرينو فجأة قريب اخته تجهض..
نسرين بخوف؛مهدي خيرك!
هو رجع شغل السيارو وتحرك بسرعه..
نسرين بخوف:ووك عليا..بالشويه يانهاري الاسود!..
وهو اللي يشوفه كيف يسوق بسرعه بستغرب في هدوء ملامحه..
ونسرين تكلم فيه وهو مش معدل عليها..
لين وقف قدام مصحة القدس..
نزل من السيارة...وهي نزلت تجري وراه لين وصلت فيه وهي تقول..
نسرين؛مهدي بالله عليك اعقل مهدي فكنا من جو المراهقين..
المهدي:سكري فمك..
وقف ممرضه وقال؛اياد بن زايد وينه؟
؛اخر الممر لف ع اليمين تلقاها يلف ع الحالات..
مشي وخلاها ونسرين وراه..
وصل في الممر اللي قالت عليه..
لقي اياد واقف ع زوز طلبة امتياز يتناقش هو وياهم..
مشاله..وصل فيه..
ضربه ع ظهره برووس صوابعه.
التفت اياد..لما شافه استغرب..
المهدي:نبيك شويه..
اياد شبحله شويه..بعدين استأذن من الطلبه..
ومشي وهو يقول؛تفضل..
والمهدي معاه ونسرين وراهم وهي خايفه..
وصل للمكتب قعدت واقفه بعيد..
اشرله اياد يخش..
هو خش وخش بعده اياد وسكر الباب..
نسرين بقلق:يارب سترك!..
🍃اياد؛ان شاء الله خير!
المهدي؛ماخلقش ربي غيرها!.
اياد بعدم فهم:من هي!؟
المهدي:دكتور واصله لهني..وحط يده ع انفه بعدين قال..فوتهم الطروح..
اياد:انت في مكتبي مانبيش نغلط فيك ياتتكلم باحترام ووضوح ياتفضل اطلع برا..
قدمله خطوه وقال:سدرة المنتهى..انسى ان ربي خالقها..
اياد:علاش تقول فيه الكلام هدا!؟
المهدي بعصبيه:مصر طلعني من طوري..اسمع جاي اسمع..تبي تتزوج اني نجيبلك اللي خير منها الف مرة لكن هي فوتها...
اياد ربع ايديه وقال:برغم اني مازال مش فاهم شي..لكن نبي نطلب منك طلب..ولو لمرة وحده اثبتلي ان المراة هادي تهمك فعلا اثبتلي انك تعزه حق مش تحب تتملكها وماتبيهاش تكون لغيرك تبيها تعيش عمره كله بروحها وتموت بروحها وانت عندك عيلة وصغار..اتقي الله فيها وساد اللي درته فيها من سنين لتوا..لو ليها عندك قدر..خايها تشوف في حياتها وتمنالها الخير..سادها اللي شافاته وعاشاته..
المهدي وجعه الكلام وأثر فيه..
واكثر مايقهر فيه.
هو التشكيك في مشاعره اتجاهها اللي كان يصدر من الكل.
مالقاش بشن يرد ع اياد..
انحسب وطلع من المكتب..
وخلا اياد حاير ومش فاهم شي..
🍃اما هو مشي طلع واخته وراه..
لما شافت الحاله اللي طلع بيها مابتش تكلمه..
طلعوا برا وركبوا السيارة وتحرك طول...
☘☘☘☘☘☘
صوت ضحكته عبا الحوش.
وهو يتأمل فيها بإبتسامه..
هدا ضحك وجاه شد راسه بإيديه وقال:يعني هي توا تفكر متأكد!؟..
مهند؛زي مانشوف فيك قدامي..
ضرب جبهته بجبهة ولد وقال:ولدي..
ضحك مهند..
وخر عنه اياد وقال:كان واقفت زواج طول راهو..
مهند بضحكه؛هدا اللي نبيه دكتور ..
ضربه بقبضة يده ع كتفه وقال:يامشاغب..
قعد يضحك مهند ع كلمة بوه..
واياد يتأمل فيه بإبتسامة حب..
☘☘☘☘☘
"وواوو ع الحب"
مهند  وهو يتكلم بالتليفون:كان عاجبك الحب خيرك ماتحبيش..
"مالقيتش من نحب"
مهند؛حبي اللي يحبك..
"من هو هدا'
مهند؛واحد مش تلقي حد يحبك زيه..راضي بيك بعيوبك وبلاويك يخي يحبهم حتى هما شن تبي اكثر من هكي..
ضحكت وقالت.
"نفكر زي خالتي"
مهند:وردي عليا..
"بتراجي هلبه راهو"
مهند؛اني ندوي ع خالتك ردي عليا لما توصل لقرار..
"مبردك مهند..ابرد منك مافيش"
مهند بضحكه؛ايه حقه كلمتيها ع موضوع الدعايه...
"نسيت بكل"
مهند؛حتى اني عارفك مذهوبه شيرة..
"ياسر مهند عاد والله نحرج"
مهند:احرجي الشهر فيه 30يوم بترضي بروحك ارضي كان هدا ملحي..
"خزي عليك خزي"
وهو يضحك عليها...
🍀🍀🍀🍀🍀
بعد مرور يوم..
الخميس..
25من شهر يناير 2018..
في مكتب الجالي ونجاة معاه..
الجالي:وريتهم تصاميمك بس اختاروا تصميمي اني..
نجاة؛مش مشكله شني اني وشن انت حني واحد عمري..
ابتسم مجامله وقال:تسلمي قلبي..
فجأة..
دق باب المكتب..
الجالي:تفضل..
فتحت السكرتيره وهي تقول:باش مهندس وصلاتك طلبيه انت طالبها..
هو بإستغراب:اني؟
السكرتيره ايه جايبه واحد واقف برا..
الجالي وهو عاقد حواجبه:ترا دخليه..
؛حاضر..
بعدين خلت الراجل يحش وهو رافع صندوق متوسط الحجم وحطه ع الأرض..
الجالي ناض وقف وقال؛ترا افتحه..
فتحه..ونجاة تراقب في اللي قاعد يصير..
شاف الجالي في وسطه لقي اللوحات.
رفع حواجبه تعجبا..
بعدين طبس وقعد يطلع فيهم بالوحده ونجاة تشوفله..
الجالي:قبل نبي التسليم والاستلام يكونوا وجه لوجه لعند عادي قاعد مافات شي نجيك لعندك وتسلمك حقك.
ونجاة تسمع فيه وهي مش فاهمه شي..
بعد مارفع اخر اللوحه..
لقي ظرف لونه بيج غامق...
حط اللوحه ع الطاوله بعدين رجع  خدي الظرف..
لما فتح طلع منه تلاته الاف جني.
انصدم لما شافهم
لمح ورقه مطبقه في الظرف..
طلعها...فتحها وقعد يقرا فيها..
(جيت بناخد الدفعة التانيه لكن وين قعدت مع روحي وفكرت في وضعك موظف في الدوله ومتزوج يعني وضعك اصعب رجعتلك فلوسك وفوقهن حبيبة سمحه..تستاهل من يصبي معاك)
رقت العصبيه لأقصى المراحل عند الجالي..
غمض عيونه..وحرك راسه يمين..بعدين يسار وقال للراجل؛توكل..
نجاة وهي تشوف في حالته ناضت وطلعت من فلوس من شنطتها وعطتهم للعامل وطلعاته..
ولت للجالي وهي تقول؛شن هدا جالي شن القصه؟
بنبرة تخوف:اطلعي..
هي مازادتش حرف..
طول مشت طلعت وهي قلقه..
اما هو ..
فتح عيونه..
وقعد يفكر شويه بعدين قال:تو نوريك ياجربوع..

#يناير_30
#طوبى

....يتبع....
(بعض الحوارات ماتعبرش عن  وجهة نظري تعبر عن وجهة نظرة الشخصيات فقط)